Sete fèminas sardas sunt istadas premiadas custu mangianu dae Coldiretti Donna Impresa cun su prèmiu Fèminas 2019.

Su prèmiu benit intregadu cada annu a is fèminas sardas chi si distinghent in su traballu issoro, giughende artu su nùmene de sa Sardigna e donede peri isperu bonu pro su benente.

Is prèmios, assignados custu mangianu in sa sala cunvegnos de su Bancu de Sardigna de Casteddu, pertocant sete diversas categorias: sport, sièntzia, arte, ispetàculu, comunicatzione, massaria e istitutziones.

Pro sa categoria sport est istada premiada Marianna Lauro de Piaghe.

Pitzoca chi dae 20 annos est in cadira a rodeddas pro un’intzidente, ma chi at tentu su brè de non si betare a terra e de sighire a praticare su sport suo, su tennis, binchende 12 tìtulos italianos e partetzipende pro 3 bias a is paraolimpìades, e tra non meda peri a sa de bator bias.

Pro sa categoria Iscièntzia est istada premiada Elisabetta Pastorini de Casteddu, chi traballende nche dd’at fata a si laureare in odontoiatria e est resèssida, a pustis de s’èssere ispetzializada in estètica dentale, a otènnere, gràtzias a s’Acadèmia de modellatzione dentale, s’AFG, su reconnoschimentu dae su Senadu de sa Repùbblica de primore italianu in su mundu.

In su setore Arte su reconnoschimentu est andadu a Pina Monne de Irgoli, residente in Tinnura, s’artista de su muralismu chi trasformat is muros de is andaleddas mudas in libros colorados chi contant s’istòria millenària de su mundu de su sartu.

Pro s’Ispetàculu su prèmiu andat a Michela Giangrasso de Casteddu chi dae is passarellas est passada a fàghere sa regista de Miss Italia in Sardigna, e in prus donat boghe a is fèminas in unu programma televisivu.

Sa vicecaporedatora de su TgR Sardegna Flavia Corda est istada premiata in sa categoria Comunicatzione.

In prus de contare s’Ìsula at abertu is ghennas de su giornalismu a is fèminas: est istada tra is primas 10 fèminas a s’èssere iscrita in s’albu de is giornalistas professionistas in s’Ìsula e in su 1988 est istada sa prima fèmina tra 30 òmines a intrare a fàghere parte de sa redatzione de su Tgr Rai Sardegna.

Is sorres Valentina e Francesca Argiolas de Serdiana ant bintu su Prèmiu Fèminas in sa categoria Massaria. Totu e is duas paris sunt sighende a iscrìere s’istòria de sa Cantina Argiolas, leader de sa viticultura sarda.

Claudia Mura de Cadesedda, chi cun s’impinnu suo, in contratendèntzia a su disinteressu mannu de is giòvanos pro sa polìtica, binchet imbetzes su Prèmiu Fèminas in sa categoria Istitutziones.

Is primores agrualimentares de sa Sardigna bolant a Matera, capitale europea de sa Cultura 2019, pro sa tres dies de su “Villaggio contadino” promòvidu dae sa Coldiretti.

In su tzentru istòricu meravilliosu de sa “Tzitade de is pedras”, capitale europea de sa cultura 2019, sunt presentes, tra is primores italianos de su mercadu de “Campagna amica”, su casu de berbeghe de Òsile e su pane carasadu.

Duos produtos tìpicos chi dae eris e finas a domìniga su primu de nadale rapresentant sa Sardigna e donant gosu a is palados de is medas istràngios chi prenent a incarcu su tzentru istòricu de sa tzitade lucana, gràtzias a sa sienda agrìcula Sa Moddixia de Genuri e sienda Mandras Largas de Òsile.

Sa sienda de Genuri, comune minore de sa Marmidda, produet dae su trigu nòbile Capelli su pane carasadu e sa pasta, e in modu particulare frègula e loroghitas.

Mandras Largas, imbetzes, cun su late de is berbeghes suas faghet su  casu de bergheghe de Òsile, postu tra is sigillos de s’atlante de sa biodiversidade de Campagna Amica.

In sa tres dies sa Sardigna est presente fintzas in s’espositzione de is biodiversidades cun s’Abbamele, unu de is produtos gastronòmicos prus antigos de sa cultura rurale de Sardigna, e sa Pompìa, agrùmene ispetziale chi faghet in Sardigna ebbia, tra Thiniscole e Orosei.

«Gràtzias a is bidditzolos, iscusòrgiu de is biodiversidades e de s’agrualimentare “fatu in Itàlia” autènticu – at naradu su presidente de Coldiretti Sardegna Battista Cualbu – semus promovende sa regione nostra cun is primores agrualimentares nostros.

Ddu faghimus a costadu de is tzitadinos, chi s’ammuntonant in ogna tapa de su bidditzolu de Coldiretti chi dae duos annos est tenende si a fùrriu de s’Itàlia.

Una promotzione direta, sena intermediàrios, fata dae is massajos nostros chi contant a sa gente is produtos issoro donende valore a sa Sardigna prus bera, sa de su sartu, sa de is produtos traditzionales, gràtzias a is  cales si costoit e s’amparat su territòriu».