Is istudiantes de s’Isportellu Linguìsticu de s’Unione de is Comunas de s’Ogliastra ant retzidu is atestados de frecuèntzia a  is cursos de limba e cultura sarda realizados dae s’Isportellu Subracomunale de Àrthana.

S’editzione 2018 de “L’ischis ma non l’ischis” in Macumere at superadu de seguru is aspetativas pro gradimentu e partetzipatzione de pùblicu, consolidende s’initziativa organizada dae s’Istitutu Camillo Bellieni comente a una bera  festa manna de sa limba sarda, una ricurrèntzia oramai  annuale. Sinnu chi sa sensibilidade a pitzu de su tema creschet cada annu de prus, interessende is istitutziones, is apassionados e mescamente is giòvanos.

In sa sala cunvegnos de sa Biblioteca Comunale, sa presidente Is.Be Maria Doloretta Lai at moderadu is interventos de su mangianu, totus in limba sarda. Su primu est istadu cuddu de su sìndigu Antoni Onoradu Succu, su cale at espressadu apretzamentu pro sa resèssida de s’atopu, manifestende sa voluntade de organizare in su benidore, paris cun su Bellieni, àteras initziativas culturales.
Agradèssidos meda sunt istados is intramesos musicales propostos dae sa corale “Santa Anastàsia” de Buddusò chi, a pustis de s’abertura cun su clàssicu “Nanneddu meu”, at propostu unu repertòriu ricu de valore.  “Sa passione pro sa limba e sa cultura sarda depet istupare dae su coro – at afirmadu su diretore iscientìficu Is.Be, Michele Pinna – e su traballu de s’operadore linguìsticu est cuddu de agiudare a recuperare custa passione chi a bias non nche dda faghimus a reconnòschere, ma chi  dimorat semper s’ànima nostra”.

Sa manifestatzione rapresentat s’apuntamentu conclusivu annuale pro is istudiantes de totus is cursos de limba sarda chi ocannu si sunt acumpridos, ultres in Barì, peri in Bortigale, Maltis, Macumere, Oroteddi, Bolòtana, Nùgoro, Marrubiu, Buddusò e Fonne. Is cursistas ant retzidu is atestados de partetzipatzione dae is manos dotzentes Ivan Marongiu, Daniela Masia Urgu, Lucia Sechi, Francesca Sini, Adriana Cocco e Immacolata Salis. A nde fàghere àteros.

Prus tutelas pro sa limba sarda. Marilotti de is 5 Isteddos: «Pro salvaguardare su sardu tocat chi ddoe siat su prenu reconnoschimentu de sa limba».

A pustis de degheoto annos su parlamentu est brontu a dare su bia lìbera a sa Carta europea de is limbas regionales o minoritàrias. Aprovada in Istrasburgu su 5 de onniasantu de su 1992, sa Carta fiat istada sutascrita dae s’Itàlia in su 2000 ma dae tando no est istada mai ratificada. Immoe unu disinnu de lege chi tenet comente a primu firmatàriu su senadore de su Movimentu 5 Isteddos Gianni Marilotti, aberit su caminu a custa novidade importante chi at a cunsentire de tutelare mègius a totus is livellos sa limba sarda, in is iscolas comente a in is universidades e in sa pùblica amministratzione, siat pro mèdiu de una programatzione adeguada in is palinsesti de su servìtziu pùblicu siat in sa retza.

«Sa ratìfica de sa Carta europea est una recherta chi dae tempus beniat avantzada dae totu su movimentu linguìsticu sardu» ispiegat Marilotti «pro ite garantit unu reconnoschimentu prus ampru de su patrimòniu culturale nostru. Gràtzias a sa ratìfica, at a èssere possìbile difatis crèschere in manera ulteriore s’impreu de sa limba sarda in sa pùblica amministratzione e in s’àmbitu de s’insegnamentu. Sa ratìfica donat difatis prus fortza a sa lege 482 de su 1999 in contu de minorias linguìsticas e a sa lege regionale in aprovada dae pagu».

Sa Carta est giai istada firmada dae 33 istados membros de su Cussìgiu de Europa e tenet comente obietivu cuddu su de promòvere s’usu de is limbas minoritàrias, pro more de amparare s’eredade e is traditziones culturales europeas, paris cun su respetu de sa voluntade de is sìngulos de pòdere impreare custas limbas in s’àmbitu de is fainas pùblicas o privadas. Su testu de sa Carta s’agatat in  custu ligàmine.

Sa mancada ratìfica sua est istada santzionada dae padu dae s’Artu commissàriu de is minorias natzionales de s’Osce (s’Organizatzione pro sa seguridade e cooperatzione in Europa) Lamberto Zannier, chi su 16 de mese de argiolas colafu, a oru de sa cunferèntzia internatzionale in su tema de is raportos tra Istados in matèria de minorias, aiat torradu a allegare sa netzessidade de “fàghere passos cuncretos pro amparare su deretu de is minorias a mantènnere biva sa cultura issoro” e pro custu aiat cumbidadu su Parlamentu italianu a aviare a sa lestra s’iter pro sa ratìfica de sa Carta europea de is limbas regionales o minoritàrias de Istrasburgu.

«Su respetu de is deretos umanos, paris cun cussos de is persones chi apartenent a minorias linguìsticas, difatis, comente est ispetzificadu in su Tratadu de Lisbona, est unu de is printzìpios subra cales si fundat s’Unione Europea» at naradu Marilotti. «Cun custa ratìfica, sa limba sarda at a tènnere in fines unu prenu reconnoschimentu e at a èssere prus fàtzile a nde cunsentire s’usu in totus is cuntestos, assigurende•nde aici sa salvaguàrdia e s’isvilupu».