Su Faru de Mangiabarche de Calasetta, si ponet a su primu postu de sa classifica po su momentu, de su 12° censimentu de sos “Luoghi del Cuore” favoressidu dae su Fundu Ambiente Italianu (FAI). Cun 6.736 votos, su faru est su pius votadu in Sardigna, sinnu de s’attentzione e de s’affettu de sa comunidade po custu logu conicu.

Su risurtadu alcansadu fintzas ai como testimonzat s’importantzia de custa istruttura, non solu po sos chi bistant inie, ma puru po chie, in sos annos, at tentu manera de nde apprezziare s’ammaju unicu e s’istoria.

Sighint in sa classifica su burgu de Tratalias cun 743 votos e su museu ispartu Liliana Cano in Uliana cun 634 votos. Atteros logos de interessiu de s’isula, mancari eppant partetzipadu a su tzensimentu, no ant superadu sos 500 votos. Custu evidentziat comente su Faru de Mangiabarche tenzat unu zubilu particulare, distinghindesi comente unu simbulu de s’iscrocca chi est bistadu capatze de acciappare s’attentzione e s’accottu de sa populatzione. A livellu natzionale su Faru de Mangiabarche est a su 7° logu, pretzedidu dae logos conicos.

Fraigadu in su 1935, su Faru de Mangiabarche est postu supra una sicca manna chi est perigulosa po chie andat in mare, comente narada su mattessi nomene suo, e si acciappat a casi 400 metros dae sa costera occidentale de s’isula de santu Antiogu. Custu faru est bistadu postu dae sa Rivista “Sette” in mesu de sos doighi faros pius tipicos de su mundu, s’unicu de s’Italia, e at leadu un’importantzia manna po sa bista e po su turismu. Su faru no est solu unu puntu de riferimentu po chie andat in mare, ma fintzas una cona chi contat istorias de mare,abbenturas e protessione.

Bell’e gai, su fattu chi siat espostu a su mare e su bentu faghet diventare sa costoidura sua meda cumplicada e chi costat meda. Po custu motivu, su censimentu de su FAI non est solu una tzelebrassione de sa bellesa de su logu, ma unu appellu beru po garantire interventos de costoidura chi lu salvent dae sa ruina. Su votu est una manera pratica po dare boghe a chie disizzat de diffendere custu patrimoniu.

Sas votassiones ant addurare abbertas fintzas a su 10 de aprile 2025,offerrinde a sos tzittadinos s’occasione de agguantare sa deffensa de custu faru istravanadu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sardigna, differridu in Giunta un’attera borta su càmbiu intre Satta e Agus

S’isettu andat prus de su chi si previdiat. In sas oras passadas si pensaiat chi sa sostitutzione de s’assessore a s’Agricultura, Gianfranco Satta, poderat essere fatta giai in su mentres de sa Giunta a pustis de sa manòvra finantziària. Si pensaiat chi su  cambiu esseret derettu, fintzas dadu pro seguru, e imbetzes su càmbiu no est ancora arribadu. Sa situatzione abbarrat frimma, e custu alimentat dimandas supra de sos tempos e de sos intentos de sa majoria.

Satta, chi dae tempus non tenet prus sa cunfiàntzia de su partidu sou de riferimentu – sos Progressistas, ghiados dae su sìndigu de Casteddu Massimo Zedda – diat dèpere èssere cambiadu cun su capogruppu de sos matessi Progressistas in su Cunsizu regionale, Francesco Agus. Si tratat de unu cambiu cunsideradu oramai iscapidhu dae sas fortzas polìticas implicadas, ma, a dispetu de custu, mancat ancora una data pretzisa. Custa allentada est in dèpidu a causare irritatzione creschente in intro de su partidu, in ube in medas diant àere prefferridu una detzisione lestra pro apartare àteras tensiones e intzertesa.

In su mentres prima de sa Giunta giamada a aprovare sa finantziària regionale de 10 miliardos de èuros, Satta at sighidu a si mustrare operosu e cuntzentradu in su tribagliu sou. At ispiegadu de èssere ancora impegnadu in su tentativu de dare rispostas a su mundu agrìculu, unu campu chi in custos meses at mustradu dificultades e dimandas insistentes. At ammentadu de àere giai fissadu impignos istitutzionales diferentes, intre sos cales
un’addobiu programmadu pro su 20 de santandria cun su ministru de s’Agricultura Lollobrigida. In cussa ocasione ant a èssere discuttidas sas preoccupatziones fatas dae su Cunsòrziu de su Pecorinu Romanu, ligadas a sos dazios subra de sas produtziones de su casu impostas dae sos Istados Aunidos cun s’amministratzione Trump, unu tema chi sighit a creare dudesa pro sos tribagliadores sardos.

Satta, a sighidu, at mustradu de si cunsiderare in antis de totu unu cunsizzeri regionale de sa Sardigna e de intendere in manera forte sa responsabilidade de s’incàrrigu assessoriale chi tenet.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”