Cussa lepiesa chi naschet dae su coro e si traduidi in donzi movimentu de su corpus, est sa fortza chi at ispintu duas zovanas atletas, Rebecca Pitzianti e Greta Teng, assa parte de unu risurtadu istravanadu. Seighi annos, ambasduas campionas de Pole Dance, sunt partidas dae sa palestra insoro de Sestu, un’angulu pitticcu de su mundu, po arrivare fintzas a Uppsala n Svezia, inube ant conchistadu sa medalla de arghentu in sa categoria Artistic Pole Junior Double, a sos campionados de su Mundu de Pole Dance.

Unu sutzessu chi at premiadu su tribagliu tostu, sa passione e su talentu, e chi at bidu puru Rebecca conchistare su quartu postu in sa categoria Artistic Pole Junior Mixed, unu risurtadu desampladu.

Su percursu chi che at giuttu sas duas zovanas atletas a che pigare supra su cataffale est bistadu sinzadu dae meses de allenamentos cadrios,sacrifitzios e una passione chi las at unidas comente una fortza chi non si biede ma chi est poderosa. Su segretu insoro? Sa lepiesa chi ponent in donzi movimentu, comente cussa de una fozza chi ballat in su bentu.

Cussa mattessi lepiesa, chi prima de tottu naschet in su coro, e at rendidu donzi movimentu insoro naturale, cadriu e delicadu. Rebecca e Greta ant ischidu trasformare sa fadiga in d’una arte chi at faeddadu deretta a su coro de su pubbricu.

S’allegria po su risurtadu segudadu est evidente in sas paraulas de sas duas atletas. Rebecca chi est emossionada, ammentat s’intensidade de s’esperientzia bivida in Uppsala: sa felicidade de pigare supra su cataffale, ma puru sa bellesa de biere medas ballarinas postas impare po unu accadessimentu chi at fattu divennere su mundu de sa Pole Dance un’ispettaculu mannu e internatzionale. Greta, dae parte sua, evidentziat cantu siat bistadu istravanadu de ballare impare a sa cumpantza sua de isquadra, cun d’unu armudiu chi at fattu divennere sa mustrada insoro meda pius potente.

S’ispettaculu che che las at giuttasa a su sutzessu est bistadu un’ammisturu de impignu, creatividade e tennica. Unu contu de fortza e grassia, in su cale Rebecca fit una tigre e Greta sa domadora sua, una mataffara chi reflettit s’intesa de sas duas atletas e s’ecchilibriu perfettu de sa potentzia e sa dilighesa. Custu intritzu de fortza e armudiu at conchistadu sos zuighes, ma fintzas su pubbricu chi at sighidu cun s’alenu suspesu donzi movimentu. Bellecchi sa timidesa chi annoditat sa manera de faeddare de su sutzessu, supra su cataffale Rebecca e Greta ant mustradu corazzu, determina e un’intesa funguda chi at dadu vida a una proa unica.

Sa preparatzione est bistada longa e letrancosa: oras passadas a mezorare donzi movimentu, donzi filera, donzi particulare, po creare una proa chi esseret pius de una simple mustrada. Greta, difattis, evidentziat cantu esseret importante po issas chi s’ispettaculu no esseret solu una mustrada de abilidade fisica, ma un’opera de arte chi tepiat resessere a comunicare s’essentzia de sa Pole Dance: unu ballu chi non si allindat a essere fisicu, ma chi est unu beru e propriu viazzu emotzionale. E bi sunt resessidas, trasmittinde a su pubbricu e a sos zuighes sa bellesa de s’arte
insoro, fatta de lepiesa e fortza.

Su biazzu a Uppsala no est solu s’istoria de unu sutzessu isportivu. Est unu esempiu de comente sa passione, sa determina e su corazzu si potant trasformare in arte,ispirande chie tenet su corazzu de sighire sos sonnios suos, fintzas cando su percursu paret diffitzile e incertu. Rebecca e Greta, cun sa passione insoro po sa Pole Dance, ant mustradu chi donzi zestu, si benit fattu cun su coro, podet divennere unu bolu in derettura de sa bittoria, unu bolu chi non si frimat a sa gara, ma chi abbratzat sa bellesa e sa potentzia de su ballu.

Su sutzessu insoro in Uppsala no est solu unu puntu de arrivu, ma una testimonia de comente su ballu, in pius de essere una forma de espressione fisica, est puru unu viazzu de su coro, inube donzi movimentu contat un’istoria e inube s’intesa de duas animas podet revertire donzi movimentu in d’unu bolu in derettura de sa bellesa e sa bittoria.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Ozzastra terra de istoria: sos printzipales sitos archeologicos de bisitare intre nuraghes,biddas antigas e monumentos de sa tzivilidade nuragica.

S’Ozzastra est una de sas zuras de sa Sardigna prus riccas de istoria antiga. In cust’iscrocca si agattant sitos archeologicos meda chi contant sa vida de sas populassiones chi istaiant in s’isula mizza e mizza de annos faghet.

Intre montes, campedas e campagnas si podent biere nuraghes, tumbas de tzigantes, tumbas antigas irfossadas in sa rocca e restos de biddas. Bisitare custos logos est commente faghere unu biazu in su passadu e connoschere menzus s’istoria de sa Sardigna e de sas tzivilidades chi ant bividu s’isula prima de s’arrivu de sos romanos.

Unu de sos sitos prus connoschidos est su Nuraghe Ruinas, chi si agattat in s’iscrocca de Arzana. Custu nuraghe est unu de sos prus artos de sa Sardigna e si agattat in d’una posissione crara dae sa cale si podent biere sos montes de su Gennargentu. In s’iscrocca de Triei si agattat sa Tumba de sos Tzigantes de Osono, unu de sos monumentos de interru prus importantes de s’Ozzastra. Un’atteru situ interessante meda si agattat in s’iscrocca de Bari Sardo, inube bi est su Nuraghe Sellersu. In s’iscrocca de Cardedu si agattat invetzes sa Necropoli de Monte Arista, una zura in sa cale sunt bistadas agattadas tumbas meda irfossadas in sa rocca.

Intre sos sitos prus importantes de s’Ozzastra bi est fintzas su cumplessu archeologicu de s’Ortali’e su Monti, in s’iscrocca de Tortolì. Si trattat de unu de sos sitos prus bisitados de sa zura e accansat monumentos divressos intre sos cales unu nuraghe mannu, una tumba de sos tzigantes e restos de biddas antigas. Importante meda est fintzas su situ archeologicu de s’Arcu ‘ e is Forros, in s’iscrocca de Villagrande Strisaili. Custu logu fuit una bidda nuragica manna chi in passadu teniat fintzas unu rolu religiosu e de negossiu. Sos archeologos ant agattadu restos de cresias, magasinos e buttegas po tribagliare sos metallos.

S’Ozzastra est duncas un terra ricca de testimonzas archeologicas chi permittint de iscoperrere s’istoria prus antiga de sa Sardigna. Sos nuraghes, sas tumbas e sas biddas antigas sunt unu patrimoniu pretziosu meda chi contat s’issida de s’isula. Bisitare custos logos cheret narrere connoschere menzus su tempus passadu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22