Su Faru de Mangiabarche de Calasetta, si ponet a su primu postu de sa classifica po su momentu, de su 12° censimentu de sos “Luoghi del Cuore” favoressidu dae su Fundu Ambiente Italianu (FAI). Cun 6.736 votos, su faru est su pius votadu in Sardigna, sinnu de s’attentzione e de s’affettu de sa comunidade po custu logu conicu.

Su risurtadu alcansadu fintzas ai como testimonzat s’importantzia de custa istruttura, non solu po sos chi bistant inie, ma puru po chie, in sos annos, at tentu manera de nde apprezziare s’ammaju unicu e s’istoria.

Sighint in sa classifica su burgu de Tratalias cun 743 votos e su museu ispartu Liliana Cano in Uliana cun 634 votos. Atteros logos de interessiu de s’isula, mancari eppant partetzipadu a su tzensimentu, no ant superadu sos 500 votos. Custu evidentziat comente su Faru de Mangiabarche tenzat unu zubilu particulare, distinghindesi comente unu simbulu de s’iscrocca chi est bistadu capatze de acciappare s’attentzione e s’accottu de sa populatzione. A livellu natzionale su Faru de Mangiabarche est a su 7° logu, pretzedidu dae logos conicos.

Fraigadu in su 1935, su Faru de Mangiabarche est postu supra una sicca manna chi est perigulosa po chie andat in mare, comente narada su mattessi nomene suo, e si acciappat a casi 400 metros dae sa costera occidentale de s’isula de santu Antiogu. Custu faru est bistadu postu dae sa Rivista “Sette” in mesu de sos doighi faros pius tipicos de su mundu, s’unicu de s’Italia, e at leadu un’importantzia manna po sa bista e po su turismu. Su faru no est solu unu puntu de riferimentu po chie andat in mare, ma fintzas una cona chi contat istorias de mare,abbenturas e protessione.

Bell’e gai, su fattu chi siat espostu a su mare e su bentu faghet diventare sa costoidura sua meda cumplicada e chi costat meda. Po custu motivu, su censimentu de su FAI non est solu una tzelebrassione de sa bellesa de su logu, ma unu appellu beru po garantire interventos de costoidura chi lu salvent dae sa ruina. Su votu est una manera pratica po dare boghe a chie disizzat de diffendere custu patrimoniu.

Sas votassiones ant addurare abbertas fintzas a su 10 de aprile 2025,offerrinde a sos tzittadinos s’occasione de agguantare sa deffensa de custu faru istravanadu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Su Prefetto de Casteddu, Giuseppe Castaldo, at pubbricadu una determina chi vedat de usare sas “keybox” e tottu sas cosas chi serbint po reconnoschere dae attesu, po sos affittos curtzos. Sa disposta, mandada a sos sindicos de s’iscrocca de Casteddu e de sa Provintza de su Sud Sardigna, e a su presidente de sa Camera de Cummerciu de Casteddu, sighit sa disposta de su Ministeru de S’internu po motivos de siguresa pubbrica.

Sa proibissione est po sos affittos pius curtzos de trinta dies, incluidinde sas regulas de barattu de domos chentza chi si paghet nudda, e chi sunt comente sos b&b. Sos meres de custa attividades ant essere obbrigados a reconnoschere sos istranzos cun sa presentzia insoro e trasmittere sos numenes de sos istranzos a sa Questura de cumpetentzia intro 24 oras dae s’arrivu, o de sighida si si frimmant pius pagu de unu die.

Sas “keybox”, chi si usant po permittere de bintrare in sas domos po mesu de coditzes oppuru craes dassadas in cassittas automaticas, non sunt cunsideradas securas. Segundu sa deretta de su Ministeru, custu sistema no permittit de controllare s’identidade de sos istranzos e nemancu de accertare si sos documentos presentados siant de sa mattessi pessone. Custa mancantzia tiat podere faghere divennere pius fatzile s’affittu a pessonas chi sunt chircadas dae sa lezze, o chi siant supettadas, poninde problemas de sicuresa pubbrica.

Su Prefettu, evidentziat chi sa connoschentzia personale de sos istranzos est una cosa a sa cale non si podet rinuntziare. In pius de su cuntrastu de s’usu de sos b&b comente furriadorzu po zente periculosa, sa misura tenet s’intentu de garantire una siguresa e trasparentzia pius manna in su campu de sos affittos curtzos, chi est registrande unu creschimentu in s’iscrocca. Po sos meres de sos b&b chi offerint affittos curtzos, su regolamentu novu imponnet unu cambiu de signifficu in sa manera de faghere sas cosas.

At a servire connoschere de pessona sos istranzos po controllare sos documentos, garantinde sa cufformidade cun sas dispostas. Sa Prefettura at accraradu chi non si ant ammittere macchissias, e sos controllos supra su rispettu de sas regulas novas ant a essere meda de pius de prima.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22