Sas salas po sas operassiones de s’ispidale oncologicu Businco de Casteddu sunt arriscande sa serrada, unu progettu chi at bogadu a fora una opposissione forte meda dae parte de paritzos assotzios impignados in sa tutela de sos dirittos de sos malaidos e de sa salude pubbrica.

S’initziativa creffida dae s’Arnas Brotzu po torrare a novu s’ispidale e movere carchi cumpartu, est a su tzentru de una critica tosta dae parte de paritzos assotzios.

Custa organizassiones si sunt dae pagu assortidas cun su presidente de su Cunsizzu regionale Piero Ciomandini, su cale at promittidu de che leare sa chistione a s’attentzione de sa Cummissione Salude. Sos Assotzios narant chi su Businco tenet un’istoria de estremadia in su campu de sa “senologia”, in sa “ginecologia” e in sa cura de sos dolores e non depet essere sacrificada po iscopos chi sunt pagu craros. S’appellu dimandat de frimmare a sa lestra su progettu e no escluidit attos fortes comente manifestassiones pubbricas e una denuntzia a sa Procura de sa Repubblica.

Su Businco est riconnoschidu comente un’ispidale chi est a daenanti meda po sa cura de sos bugnos, unu rolu chi como podet essere cumpromittidu. Sos assotzios evidentziant comente sas detzisiones de s’Arnas Brotzu no teppant essere impostas dae una parte sola. In manera particulare, su tramudu de sas divisiones de “Chirurgia Toracica” e “Ginecologia”, e fintzas s’iscartu de sa sala po sas operassiones dedicada a sa “Terapia del Dolore”, amminettant de illaunire sa balidia totale de s’ispidale.

S’avvisu de sa serrada de sas salas po sas operassiones po un’ammodernamentu, non si podet faghere chentza cunsiderare sa realidade de sos malaidos. Sos malaidos e malaidas non si podent permittere de bivere po 2-3 annos in mesu de sa duda, arriscande de teppere affrontare simanas de biatzos po sa salude, una solutzione chi non si podet agguantare po chie non tenet dinari chi bastet po sas ispesas.

Secundu sos assotzios, s’effettu supra sa calidade de sas curas si biet giai dae como. Oe, su tempus mesanu po un’operassione a su sinu est de casi 70 dies, ma cun sa serrada de sas salas po sas operassiones, custu tempus est destinadu a si allonghiare semper de pius.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Miraculu meigu in su Brotzu: mama e fizu salvados dae una rara infetzione chi los podiat faghere morrere.

Un’operassione meiga desamplada, fatta in s’ispidale Brotzu de Casteddu, at permittidu de salvare una femina zovana raida e su pitzinnu suo dae un de sas infetziones pius graves e raras chi siant mai bistadas rescontradas in sa ginecologia. Sa solutzione, cunsideradu unu casu sanidariu de importantzia mondiale, est bistada pubbricada supra sa Rivista de grandesa iscientifica Case Reports in Women’s Health.

Sa femina, una zovana casteddaja raida dae solu doighi chidas, est arrivada a s’ispidale in cunditziones disisperadas: un’infetzione chi la podiat furminare, unu cuadru de animia grave e una cumplicassione rara meda- una granchena ispabina- poniant a arriscu in pagu tempus sa vida sua e de su pizzinnu. S’operassione in sa parte de Ginecologia de su Brotzu at mustradu unu momentu importante po sa meighina de su tempus nostru, no solu po sas difficultades de su casu, ma po sa prontesa e sa pretzisione cun sa cale est bistadu accomettadu.

A sa base de su cuadru sanidariu bi fit sa “Sindrome di Fournier”, una maladia grave meda chi faghet morrere impresse meda sa petta modde, e chi corpat de pius sos omines che i sas feminas. In custu casu, sa cumparfida sua in andantzia fuit una emergentzia bera chi no si connoschiat, acchessada dae un’atteru problema chi teniat dae prima, sa carentzia de globbulos biancos, chi faghiat divennere s’organismu de sa femina meda debile.

Gratzias a unu atzertamentu de sa maladia lestru e coidau, sos duttores ant potidu faghere a sa lestra un’operassione chirugica de livellu artu meda. S’operassione est bistada controllada dae su proffessore Antonio Macciò, gavacciu de Ginecologia e Ostetricia a s’universidade de Casteddu e direttore de sa Ginecologia Oncologica de s’ispidale Businco, su tribagliu de su team , in su cale bi fuint mastros de partu, silugianos, istudiosos de su sambene e ispecializzados in s’istudiu de sa pedde modde, at permittidu de frimmare s’infetzione e affortigare sas cunditziones de sa malaida.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22