Su cunsizzu istitutzionale de su campu de s’Egas si est assortidu eris po approare su Pianu de sas tariffas de Abbanoa, chi at a balere po su 2024- 2029. A su cunsizzu ant partetzipadu sos sindicos chi rappresentant tottu sos logos de sa Sardigna, accansande sos chi sunt bistados elegidos dae pagu de Casteddu e Carbonia, paris cun su delegatu de sa Regione.

Su Pianu novu punnat a garantire un’ecchilibriu intre sustenibilidade accolomica po sos tzittadinos,firmesa finantziaria po Abbanoa e abbuttinos importantes meda po sa retza de distribussione de s’isula. In manera particulare, po su 2024 est bistada cunfirmada s’assentzia de aumentos de su pretziu po sos consumadores, teninde frimmu su costu de s’abba po sas familias sardas.

Po su 2025 si prevedid unu creschimentu de 1,5%, unu seperu chi serbit po abbilantzare su bisonzu de ponnere impare sas tariffas a sos accreschimentos de s’inflatzione, minimande sos effettos supra sas familias. Po agguantare sos pius poberos, su pianu incluidit fintzas unu finantziamentu de duos miliones de euros po su “Bonus idricu annuntile”, cun su propositu de garantire tariffas chi si potant pagare e accottare chie est in difficultade.

Un’aterru puntu importante de su Pianu, est su potentziamentu de sos impiantos, accottados dae su Fundu po sos abbuttinos novos(FoNI), chi prevedid unu contribbudu de casi 40 miliones donzi annu incumintzande dae su 2026. Custu dinari at essere destinadu a ponnere a postu sa retza , a mezzorare su sistema de depurassione de s’abba e ponnere a postu sas caudas. In pius, sos tribaglios si ant a cuncentrare po minimare su problema de sas perdidas de s’abba e po garantire sa menzus ispartidura de s’abba in tottu sos logos de s’isula.

Su pianu est duncas unu passu de fundamentu po garantire unu controllu de s’abba chi si potat pius accottare in Sardigna. Usande custu modellu, si pensat de rispondere a sas porfias semper pius prentzantes de sa tutela de s’abba, assigurande a su mattessi tempus unu servitziu de calidade po sos tzittadinos.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sas vias de sa tramuda, a daenantis cun iscavos e balorizzatzione: risurtados novos in sos nuraghes de Tortulè e Triei.

Andant a daenantis cun resurtados importantes sos interventos de iscavu,accontzu e balorizzatzione de sas alas nuragicas intzididas in su disignu “Sas vias de sa tramuda” in Ozzastra. Duos in particulare sos logos interessados dae sos tribaglios: su nuraghe s’Ortali ’e su Monti in s’iscrocca de Tortulè, e su nuraghe Bau Nuraxi de Triei, ambos duos a su tzentru de avantzamentos importantes supra su pianu iscientificu e de su recreu pubbricu de su tempus benidore.

A s’Ortali ‘ e Su Monti, unu de sos sitos  appillados prus nodidos e bisitados de s’Ozzastra, est finida sa fase de iscavu archeologicu. Su cumplessu, chi accansat nuraghe,pobuladu, tzirculu megaliticu, domus de janas e tumbas de tzigantes, sighit a torrare notissias novas mancari sos istudios los fettant dae tempus meda. Sas scruccullas fattas dae pagu ant fattu iscoperrere atteras zuras de interessiu, amprariande sas connoschentzias supra su situ e arricchinde s’esperientzia culturale apparada a sos bisitadores.

S’interventu, fattu sutta s’affilamentu de sas Sovrintendentzias archeologicas, est bistada fatta mescamente po una turre accosta e s’antemurale de su nuraghe. In su mentres de sos tribaglios sunt bistados iscopertos po su prus, picculos de isterzos de attividades in domo, comente su tessinzu e s’ammaniada de sa cosa de pappare. Finida sa fase de iscavu, su disignu bintrat como in d’una fase nova chi prenettat interventos de accontzu, su faghere un’impiantu novu de sa lughe- pensadu fintzas po su sero, e sa creassione de unu caminu novu po bintrare a su monumentu. Si at a faghere puru s’azzorronamentu de su sistema de sas notissias e de sos poster, po rendere prus fatzile sa bisita e mezzorare sa cumpresa de unu situ de cumplessidade manna. Sa summa totale de sos tribaglios, partidos in su mese de aprile 2025 est de casi 200.000 euros.

Novidades importantes arribant puru dae su nuraghe Bau Nuraxi de Triei, inube in su mese de martu passadu sunt bistados cussinnados sos tribaglios de iscavu. Su situ, chi est mannu meda e de importantzia iscientifica, fuit bistadu scudrignadu solu in partzialidade in sos annos Ottanta. S’interventu de oe interessat in manera particulare sa zura chi andat a sa parte de su riu, una zura sinzada dae sa prena de su 2008 chi aiat fattu dannos a una parte de su cumplessu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22