Si est fatta eris in Tramatza, s’assembrea de sos sotzios de Orizonte Comune, sa movida tzivica sarda chi si est istrutturande po sas eletziones regionales e comunales de su tempus benidore.

In su mentres de s’addobiu, s’assembrea at cunfirmadu Franco Cuccureddu comente cordinadore e responsabbile de sa movida, dandeli s’incarrigu de la ghiare po fraicare sas listas de sas eletziones. Cunfirmadu fintzas Lorenzo Muggianu comente tesoreri.

S’assembrea at fintzas nomendau sos membros de su cordinamentu regionale, chi arribant dae sas 8 provintzias sardas. In mesu de issos bi sunt:Roberto Carta e Stefano Cossu po sa Gaddura, Antonio Cardin, Gianni Carbini,Claudio Piras,Massimo Rizzu,Ottavio Sanna,Franco Satta e Maria Lucia Tirotto po Tattari, Gian Mauro Demontis po Nugoro e Massimo Cannas po s’Ozzastra. Po Aristanis Piero Franceschi, Cristina Manca, Velio Melas e Gianfranco Secci, mentres Daniela Deidda, Sergio Murgia e Alex Sanna partetzipant po su Mediu Campidanu. Po finire, Giorgio Alimonda, Alberto Fois e Marco Loi sunt bistados elegidos po su Sulcis, e noe po sa tzittade metropolitana de Casteddu, in mesu de sos cales bi sunt Massimo Castangia,Marzia Cilloccu, Riccardo Cioni, Carla Cuccu e Marcello Polastri.

Su cordinamentu regionale est cumpletadu dae sos cunsizzeris regionales chi nde faghent parte de dirittu: Sandro Porcu, Salvatore Cau, Lorenzo Cozzolino e da su mattessi Cuccureddu, chi est assessore a su Turismu. Cussos chi ant a partetzipare po contu de sos cordinamentos provintzales si ant a nominare cando ant essere frommados sos cordinamentos locales.

In su mentres de s’assembrea est bistadu dadu un’accottu forte a su caputruma de Orizonte Comune, Sandro Porcu, e a tottu sos cunsizzeris regionales de majoria, chi in sas urtimas chidas ant tentu critigas e attaccos supra sos social media. Custos attaccos, deffinidos “poberos e chentza sensu”, li sunt bistados fattos po su pagu impignu insoro in s’amparu de sas proceduras zustas supra de temas delicados commente sa tutela de sa bista e s’approbazione de sos arrancos rennovabiles.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Su Prefetto de Casteddu, Giuseppe Castaldo, at pubbricadu una determina chi vedat de usare sas “keybox” e tottu sas cosas chi serbint po reconnoschere dae attesu, po sos affittos curtzos. Sa disposta, mandada a sos sindicos de s’iscrocca de Casteddu e de sa Provintza de su Sud Sardigna, e a su presidente de sa Camera de Cummerciu de Casteddu, sighit sa disposta de su Ministeru de S’internu po motivos de siguresa pubbrica.

Sa proibissione est po sos affittos pius curtzos de trinta dies, incluidinde sas regulas de barattu de domos chentza chi si paghet nudda, e chi sunt comente sos b&b. Sos meres de custa attividades ant essere obbrigados a reconnoschere sos istranzos cun sa presentzia insoro e trasmittere sos numenes de sos istranzos a sa Questura de cumpetentzia intro 24 oras dae s’arrivu, o de sighida si si frimmant pius pagu de unu die.

Sas “keybox”, chi si usant po permittere de bintrare in sas domos po mesu de coditzes oppuru craes dassadas in cassittas automaticas, non sunt cunsideradas securas. Segundu sa deretta de su Ministeru, custu sistema no permittit de controllare s’identidade de sos istranzos e nemancu de accertare si sos documentos presentados siant de sa mattessi pessone. Custa mancantzia tiat podere faghere divennere pius fatzile s’affittu a pessonas chi sunt chircadas dae sa lezze, o chi siant supettadas, poninde problemas de sicuresa pubbrica.

Su Prefettu, evidentziat chi sa connoschentzia personale de sos istranzos est una cosa a sa cale non si podet rinuntziare. In pius de su cuntrastu de s’usu de sos b&b comente furriadorzu po zente periculosa, sa misura tenet s’intentu de garantire una siguresa e trasparentzia pius manna in su campu de sos affittos curtzos, chi est registrande unu creschimentu in s’iscrocca. Po sos meres de sos b&b chi offerint affittos curtzos, su regolamentu novu imponnet unu cambiu de signifficu in sa manera de faghere sas cosas.

At a servire connoschere de pessona sos istranzos po controllare sos documentos, garantinde sa cufformidade cun sas dispostas. Sa Prefettura at accraradu chi non si ant ammittere macchissias, e sos controllos supra su rispettu de sas regulas novas ant a essere meda de pius de prima.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22