Su skipper sardu, Andrea Mura, si cunfirmat unu de sos mègius de sos italianos in sa Global Solo Challenge, una cumpetitzione de nàvigu èpica a inghìriu de su globu a sa sola, sena iscalos e sena assistèntzia, in intro de  s’Open 50 Vento di Sardegna. Mura dae pagu at iscaladu sa classìfica, colende dae sa de chimbe a sa de bator positziones in pagu prus de una chida de gara.

A su cumandu de sa classìfica b’est Mowgli, sa barca de su frantzesu Philippe Delamare, chi at inghitzadu su 30 cabudanni. Sighint First Light de s’istadunidensu Cole Brauer e Shipyard Brewing de s’àteru istadunidensu Ronnie Simpson, ambos duos mòvidos su 29 de santugaine. Sa barca Bendigedig de su gallesu Dafydd Hughes, mòvida su 26 de austu, est a su de bator postos.

Andrea Mura, mòvidu su 18 de santandria dae A Coruña, dimustrat su determinu e s’abilidade suos, ocupende sa de chimbe positziones. Como, nche at isciaddisu s’ecuadore e s’agatat in s’Atlànticu Meridionale a largu de sas costas de su Brasile. S’obietivu imbeniente suo est de cròmpere a Cape Town e rugrare su Capu de Bona Speranza, su primu de sos tres mannos capos chi at a afrontare in su percursu de 26 mìgia mìllios nàuticos.

Sa marrania de Mura est difìtzile meda sende chi li tocat a surcare  sos otzèanos solu, sena firmadas e sena assistèntzia, at a pòdere contare petzi in sa barca sua, Vento di Sardegna, sa cumpàngia sua in custa ventura.

Sa cumpetitzione est unu bancu de proa pro sas abilidades nàuticas e sa resistèntzia fìsica e mentale de sos skipper, e Andrea Mura dimustrat de tènnere totu sas cartas in règula pro cumpètere a sos màssimos livellos. Cun galu medas mìllios marino de de percùrrere, cada die rapresentat unu disafiu nou e un’oportunidade pro Mura de dimustrare sa capassidade sua de naigare a sa sola sos otzèanos.

Sa Global Solo Challenge oferit una vetrina istraordinària pro sos amantiosos de vela de totu su mundu. Sa cumpetitzione no est petzi una gara de lestresa, ma fintzas una proa de resistèntzia e determinatzione, e Andrea Mura est de seguru unu de sos protagonistas de custa ventura istraordinària. Isetamus de bìdere comente  at a andare custu disafiu èpicu a inghìriu a su mundu e cales impresas noas at a afrontare Mura in sos tretos imbenientes de navigatzione.

 “Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Sa proposta de leze Pratobello 24 arribat in Cunsizzu regionale:partit s’iter istitutzionale.

Sa proposta de leze de initziativa populare Pratobello 24 bintrat in finis in su caminu istitutzionale de su Cunsizzu regionale de sa Sardigna. Su presidente de su Cunsizzu, Piero Comandini, at accraradu s’imbiada de su testu a sas cummissiones cumpetentes, faghinde partire s’iter de s’esamene chi prevedit su regulamentu de su Cunsizzu e marcande unu coladorzu isettadu dae meses dae sos chi ant poderadu s’initziativa.

Est unu risurtadu importante no solu supra su pianu de sas protzeduras, ma puru politicu e de signifficu. Pratobello 24 naschet, difattis, dae unu appellu populare mannu e partetzipadu: in s’istiu de su 2024 sos obreris fundadores ant regortu 211.000 frimas in tottu s’isula, unu numeru istravanadu chi testimonzat s’interessiu e sa partetzipassione deretta de una parte manna de sa cittadinantzia supra sos temas a su tzentru de sa proposta.

Cun s’assignadura a sas Cummissiones, si aberit como unu mamentu de cunfrontu e devuccamentu. In su mentres de sos tribaglios istruttorios ant essere iscurtados sos delegados de sos comitados chi ant fattu partire s’initziativa, chi ant podere faghere intendere sas resones insoro, e sos intentos de sa proposta de leze, naschida dae s’imbassu e fraigada po mesu de unu percursu de partetzipassione isparta. Sos ascurtos ant essere unu mamentu crae po garantire unu faeddu derettu
intre istitutziones regionales e tzittadinos, in su signu de trasparentzia e cundivisione.

Sas Cummissiones ant aere sa faina de controllare su testu, baludare sas osservatziones o probostas de modifica e faghere sa relatzione po la faghere arribare in Aula. Solu a s’accabbu de custu coladorzu sa proposta at podere essere chistionada e votada dae su Cunsizzu regionale, giammadu a narrere su parrere suo supra de un’initziativa chi at giai mustradu una lezittimassione populare manna meda.

S’intrada formale de Pratobello 24 in Cunsizzu regionale est duncas unu coladorzu importante in su caminu legislativu sou e unu bancu de proa po sos istrumentos de democratzia de intzidida chi prevedint sas lezes regionales. Unu signale importante fintzas supra su rolu de sos tzittadinos in sas detzisiones, giamados no solu a espressare cunsensu, ma fintzas a dare unu contribbudu in manera attiva a su fraigu de sas politicas pubbricas chi appartennent a su tempus benidore de sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22