Santu ‘Uanni Sruexu. Una die chi a printzìpios deviat destinada a una bella e ispantosa manifestatzione automobilìstica s’est furriada imbetzes a una tragèdia sena rimèdiu in s’istrada istatale SS 195. Impinnada in unu sorpassu, una Ferrari nch’est acabbada a pitzu de unu camper chi lompiat dae s’àtera direzione,  causende sa pèrdida de duas fidas umanas.

Sos mortos, unu maridu e sa mugere de 67 e 63 annos, tzitadinos isvìtzeros residentes in Selva de Badde Gardena, ant pèrdidu sa vida in s’intzidente. Sa còpia aiat pigadu a pesone sa bella màchina de lussu, una Ferrari, pro pòdere leare parte a una bella e istravanada manifestatzione automobilìstica chi fiat in programma in sa bidda de Teulada e chi si diat èssere concruida tra unas cantas dies in sa tzitade de Terranoa. S’interventu de su 118 est istadu inùtile: sos duos fiant giai mortos in intro de sa vetura chi in un’ìbitu at pigadu fogu. Sos pompieris nd’ant mortu su fogu e ant agatadu sos duos passegeris abrigiados. Fintzas sas Fortzas de s’òrdine sunt arribbadas in deretura in su logu de s’intzidente, ma s’ùnica cosa chi ant pòdidu fàghere est istada cussa de providire a sa serrada de su caminu a su tràficu pro permìtere a sos Vìgiles de su fogu de completare sos traballos de bonìfica e pro fàghere totu sos rilevamentos.

S’intzidente at interessadu fintzas unu camper e una Lamborghini, agiungende àteru disisperu a sa tragèdia lègia. Sos chi istaiant in intro de su camper fiant originàrios de su Südtirol, mentras sos chi fiant in sa Lamborghini fiant tzitadinos indianos bènnidos dae Mumbai chi aiant programmadu n’essida pro unu pràngiu a Masua, chi però est istada in interrùmpida manera mala dae custu disacatu mannu.

Custa tragèdia terrorosa est unu promemoria tristu de sos arriscos assotziados a sa ghia e a sa lestresa, e nos ammentat comente siat importante adotare cumportamentos seguros e responsàbiles cando semus in caminu, siat a pee, siat guidende. Sa comunidade locale de Santu ‘Uanni Sruexu est abbarrada meda corfida dae custa disgràtzia e s’est unida cun dispragere a su dolore de sas famìlias corfidas dae su lutu.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Einstein Telescope, sa Sardigna puntat supra Sos Enattos: un’istrumentu pro istudiare s’univressu.

S’Einstein Telescope est un’istrumento iscientificu addaenantis medas chi at a permittere a sos istudiosos de iscrudignare sas undas gravitatzionales chi arribant dae s’univressu primarzu e de istudiare sos fenomenos de su trettu chi oe non podimos ancora biere.

Si trattat de unu osservadoriu de ingendra nova chi nos at a podere azzuare a cumprendere menzus comente est naschidu e creschidu s’Univressu. Gratzias a sa dilighesa manna sua at essere possibbile iscrudignare abbenimentos cosmicos istravandos comente sa tumbada intre toffos nieddos o intre istellas de neutrones abbeniddos miliardos de annos faghet.

Sa Sardigna at a presentare ambas sas possibbiles formas de s’osservadoriu: cussa a triangulu e cussa cun duas istrutturas a forma de L. Carchi istudiu at mustradu chi sa soluzione cun duas L diat podere dare risurtados iscientifficos menzus e minimare carchi arriscu tennicu. S’idea est cussa de faghere custa solutzione imparis a sa Sassonia, creande una collaborassione intre Istados Europeos divressos supra unu de sos disignos iscientificos prus importantes de sos annos imbenientes.

Pro sos iscientziados su situ de Sos Enattos, in s’iscrocca de Luvula, est unu de sos logos menzus in su mundu pro fraigare custu osservadoriu. Est difattis una zura meda muttiga dae su puntu de bista sos terremotos e casi briva de cale si siat burdellu motivadu dae sas attividades de s’omine. In prus sa rocca presente sutta de terra est adatta meda a sos iscavos netzessarios pro fraigare sas istrutturas chi ant a accasazzare sos istrumentos iscientifficos.

Su fraigu suo diat podere mustrare un’occasione manna po s’iscrocca. Unu disignu comente custu podet battire imbestimentos novos e occasiones meda de formazione. Sa presentzia de s’osservadoriu diat podere favoressere sa creschida de sa chirca iscientifica e apparare possibilidades novas pro istudiantes,chircadores e tennicos chi tribagliant in sas zuras de s’iscientzia e de s’inzennieria.

Unu fraigu iscientificu gai importante diat podere battire beneffissios fintzas a s’accolomia locale. A inghiriu de su disignu diant podere naschere attividades novas ligadas a sa chirca, modernissassione e servitzios chi serbint pro accotzare unu tzentru iscientificu internatzionale mannu meda. In prus diat podere affortigare sa collaborassione intre universidades, tzentros de chirca e istitutziones europeas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22