S’est mortu eris in bia de Ligùria a Cristino Picciau, su peduleu de Casteddu. Totus lu connoschiant o ischiant chie fiat. Comente sa cantante Claudia Aru chi in sa pàgina cosa suaa de Facebook at iscritu “At a èssere curiosu no lu bìdere prus in cuddu semàforu acanta non nos at mai negadu unu risitu e in ue pro mene fiat normale a li dare calicunu soddu. Devet èssere lègiu a beru a si mòrrere a solos. Ispero chi  sa vida noa sua siat prus pagu mala. Bonu biàgiu”.

“Cristiano tenet una famìlia chi l’at semper suportadu e sustentadu — at iscritu in Facebook Veronica Picciau sa sorre concuina -, amus semper chircadu in cada manera de l’agiudare e de nche essire dae su mundu de sa droga. In veridade non fiat sena domo, pro ite unu logu acanta andare lu teniat. Ogna tantu torraiat a domo de sos babbos, chi tenet 90 annos colados, chi ddu costoiant comente faghent sos genitores cun totu sos fìgios, ma issu at seberadu de sighire in cuss’ànadala  e nemos podiat seberare a su postu suo ite vida fàghere”.

Comente est essida sa noa mala de sa morte sua, in totu sos mèdia sotziales sunt essidas medas frases e messàgios de condulèntzia. Cristiano Picciau fiat connotu meda in tzitade. Aiat 51 annos e biviat in caminu, ma non fiat unu barbone.

Parentes e connoschentes in sas retes sotziales, ant iscritu chi costumaiat a  torrare a domo sua su sero. Pròpiu pro custu motivu non fiat sighidu dae sos servìtzios sotziales de su Comunu de Casteddu. A de die pediat sa limùsina in sos semaàforos. Fiat connotu pro sa geniosidade e sa gentilesa sua. “M’at semper corfidu sa discretzione sua e sa bellesa sua”, at agiuntu sa  cantante Claudia Aru. At a abbarrare semper in sa memòria de sos casteddajos.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Un’organissasione criminale abbarbada in su mesudie de sa Sardigna, ma cun coffuzones internatzionales fortes in Belgio e Paesi Bassi, est bistada iscupulada in d’una operassione padria dae parte de sas fortzas de s’ordine chi ant arrestadu tres pessonas e at secuestradu benes po pius de tres miliones de euros. Secundu cantu ant nadu sos de sa politzia, sa truma fit responsabbile de aere battidu in Sardigna una cantidade manna de cocaina, po unu totale de 77 chilos.

Sa droga beniat carrada cuada supra de camions mannos chi partiant dae su nord Europa, passande divressas frunteras fintzas a arribare in s’isula.

Una borta arribada a destinu, sa cocaina beniat bendida in su mercadu locale, cun d’unu balore tantadu intre tres e ses miliones de euros. S’iscrucculla at permittidu de assebertare un’organissasione de otto pessonas, tres de sas cales abbisadas comente fundadores de s’attividade illetzida, mentres atteras chimbe diant aere tentu rolos de azzudu de s’organissasione. Sa truma, mancari esseret discreta meda, fuit istrutturada bene e teniat fintzas cabbales accolomicas de signifficu.

Sas iscruccullas ant difattis battidu a su secuestru de pius de 90 parados, intre domos e terrinos postos a su pius in su mesudie de s’isula, paris a paritzos camions e disponibilidades de dinari. Una parte de su patrimoniu, chi si pensat siat de sas pessonas sutta de iscrucculla, est bistada agattada fintzas in sos Paesi Bassi. In su mentres de sas attividades de iscrucculla sunt bistados secuestrados puru vinti chilos de cocaina sinchera meda, mentres tres curreos incarrigados de che leare sa cocaina sunt bistados arrestados.

S’organissasione impittaiat maneras diligadas, impittande macchinas modificadas po cuare sa droga e chircande de faghere faddire sos controllos po mesu de caminos istudiados in tottu sos particulares.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22