Antonio Cardia nos at lassadu a pustis de àere traballadu pro setanta annos in sa butega sua de bia de Cimarosas. Fiat naschidu in Solèminis ma giai dae minoreddu si fiat tramudadu a bìvere a Casteddu. A printzìpiu aiat traballadu in una butega de  Ceraxus, ma a pustis aiat abertu unu salone in bia de Cimarosa, in Casteddu. Istimadu dae bighinos e clientes at semper fatu cussu traballu. Finas a duos annos a oe fiat galu in atividade, ma a pustis, pròpiu cando s’edade e sos doloreddos non si lu permitiant prus, at detzisu de si retirare. Onga tantu segaiat sos pilos a amigos e parentes, giustu pro non pèrdere s’abitùdine.

Pro pario annos est est istadu su barberi prus betzu de Itàlia, ma a pustis est istadu superadu dae  un’àteru barberi sardu, ma de Portu Turre. Cando sa noa de sa dipartida sua s’est ispainada in sa retza, totus ant bòlidu dedicare unu pensamentu a custa figura importante de Casteddu Peri sa sotziedade de fùbalu de su Casteddu (Cagliari Calcio) at publicadu unu messàgiu de passièntzias pro s’iscumparta de su barberi Antonio Cardia iscriende in sos canales sotziales cosa sua: S’est mortu Antonio Cardia, istòricu propietàriu de su salone de bia de Cimarosa, acanta at traballadu finas a  95 annos, frecuentadu in sos annos fintzas dae medas giogadores rossoblù. Si nd’andat un’icona de sa tzitade”.

Unu de sos fìgios de Antoni, Lorenzo Cardia, at sighidu su traballu de su babbu, pro mandare a in antis sa traditzione de famìlia. Est istadu pròpiu issu a dare sa noa mala de sa morte sua. S’interru at a èssere, mèrcuris su 30 de santandria 2022, a ora de sas 15:30, in sa crèsia de Santa Lughia.

“Progetu finantziadu cun s’Avisu Pùblicu IMPRENTAS annualidade 2021-2022”

Un’organissasione criminale abbarbada in su mesudie de sa Sardigna, ma cun coffuzones internatzionales fortes in Belgio e Paesi Bassi, est bistada iscupulada in d’una operassione padria dae parte de sas fortzas de s’ordine chi ant arrestadu tres pessonas e at secuestradu benes po pius de tres miliones de euros. Secundu cantu ant nadu sos de sa politzia, sa truma fit responsabbile de aere battidu in Sardigna una cantidade manna de cocaina, po unu totale de 77 chilos.

Sa droga beniat carrada cuada supra de camions mannos chi partiant dae su nord Europa, passande divressas frunteras fintzas a arribare in s’isula.

Una borta arribada a destinu, sa cocaina beniat bendida in su mercadu locale, cun d’unu balore tantadu intre tres e ses miliones de euros. S’iscrucculla at permittidu de assebertare un’organissasione de otto pessonas, tres de sas cales abbisadas comente fundadores de s’attividade illetzida, mentres atteras chimbe diant aere tentu rolos de azzudu de s’organissasione. Sa truma, mancari esseret discreta meda, fuit istrutturada bene e teniat fintzas cabbales accolomicas de signifficu.

Sas iscruccullas ant difattis battidu a su secuestru de pius de 90 parados, intre domos e terrinos postos a su pius in su mesudie de s’isula, paris a paritzos camions e disponibilidades de dinari. Una parte de su patrimoniu, chi si pensat siat de sas pessonas sutta de iscrucculla, est bistada agattada fintzas in sos Paesi Bassi. In su mentres de sas attividades de iscrucculla sunt bistados secuestrados puru vinti chilos de cocaina sinchera meda, mentres tres curreos incarrigados de che leare sa cocaina sunt bistados arrestados.

S’organissasione impittaiat maneras diligadas, impittande macchinas modificadas po cuare sa droga e chircande de faghere faddire sos controllos po mesu de caminos istudiados in tottu sos particulares.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22