Casteddu s’abrontat a festare Annunou. Est cunfirmadu, a animare sas primas oras de su 2023 at a èssere Blanco. Rèdutze de sa resessida a su de 72 Fèstival de Sanremo bintu paris cun Mahmood e a pustis de àere rapresentadu s’Itàlia a s’Eurovision song contest 2022, su rapadore brescianu at a cantare in su palcu a dae in antis su Munitzìpiu pro prus de un’ora a cumentzare dae sas 23.

A cunfirmare s’eventu est istadu su sìndigu Paolo Truzzu. “Blanco est un’artista chi agradat a totus. Mescamente  a sos giòvanos ”. A pustis de duos annos matanosos, s’intentzione de s’Amministratzione comunale est istada sa de “ofèrrere unu bellu momentu de istentu e ispàssiu”.

In prus, “s’ocasione at a pòdere èssere isfrutada pro promòvere s’imàgine de Casteddu”. A tretu de torrare a cramare su pùblicu siat in sa Sardigna siat in Itàlia, su cuntzertu de Blanco at a pòdere “creare ocasiones noas de traballu pro su setore alberghieru, extra-alberghieru, de sa ristoratzione e de sos servìtzios”. E non b’at in nde dudare, si si pessat chi “giai a pustis de sos primos “lecito” sas pertzentuales de sas istruturas chi cunfirmaiant de tènnere sas prenotatziones cumpletas pro Annunou sunt coladas dae su 3% de su 19 santugaine a su 57% de su 30 santandria”, at ispiegadu su primu tzitadinu.

Respetu a sos annos colados sa fòrmula però est cambiada. “Non prus un’Annunou difùndidu”, at naradu s’assessore Alessandro Sorgia. “Prusaprestu un’ùnicu eventu mannu cun un’ùnicu grandu artista in sa su logu istòricu de sa tzitade, in su palcu chi at a èssere ammaniadu dae in antis a su Munitzìpiu, in sa rugrada intre sa bia de Roma e su largu Carlo Felice, pro dare a totus sa possibilidade de si gosare s’ispetàculu. Cosa chi at a agiudare a torrare sùlidu a sas fainas produtivas. Fintzas a sos ambulantes, ca semus resonende pro su sèberu de un’àrea de dedicare a issos, in manera cumpatìbile cun su pranu de seguridade e de òrdine pùblicu”, at concruidu su titulare de sas Fainas produtivas e turismu.

Pro Luca Usai, chi su cuntzertu l’at organizadu a sa minuda, “cun Blanco b’at sa possibilidade sa festa pro su primu de s’annu de Casteddu si cunfiguret comente s’Annunou de Itàlia”.

“Progetu finantziadu cun s’Avisu Pùblicu IMPRENTAS annualidade 2021-2022”

Sa Maniffattura de su Tabaccu de Casteddu est pronta a accasazzare dae su 16 a su 18 de Aprile, un’abbenimentu dedicadu a tzelebrare sa zura blue de sa Sardigna. Po mesu de unu disignu riccu de dibattidos, musica e attividades de coghina, s’abbenimentu chircat de iscumbattare e balorizzare sa vida longa, commente un’ istrumentu chi serbit po faghere arrivare turistas, poninde s’attentzione supra sa ricchesa de sa coghina locale, commente elementu chi siat sa crae de un’esperientzia turistica bera e chi non si potat ismentigare.

Martis 16 Aprile, sos espertos de su marketing de su turismu, de sa salude, de sa tradissione de sa coghina e de s’accolomia pubbrica, ant a discutire de commente sa vida longa si potat trasformare in d’unu beru jubilu po visitadores dae tottu su mundu, chi disizzant de iscoperrere sos segretos po una vida pius longa e sana. S’addobiu at accommettare chistiones divressas de interessiu particulare, in mesu de sas cales, s’istoria de su pane de sos chi tenent chent’annos “Kentos” de Orroli, s’esperientzia de sa cooperativa Allevatrici de Sardigna e sa pubblicidade de sos prodottos sardos in sos paisos de s’Iscandinavia.

Merculis 17 bi at essere unu laboratoriu de buttega; bi ant a partetzipare espertos de custu campu, commente Raimondo Mandis e Luigi Mundula. At a sighire una mustra de coghina cun s’azzudu de su Casteddu Calcio, inue carchi giogadore ruju e blu si at a chimentare cun sas retzettas de sa tradissione sarda, ghiados dae sos coghineris William Pitzalis e Marco Abis.

Su colominzu de s’abbenimentu at essere gioggia 18 Aprile, cun d’unu laboratoriu de buttega, dedicadu a su mandicu de s’identidade de sa Sardigna, sighidu dae unu laboratoriu de coghina, dedicatu a sa preparassione de sas minestras e de sas suppas de sa tradissione, de sas cales sos chi ant a partetzipare ant a tennere s’occasione de las assazzare paris cun sos coghineris. Sa serana, si at a congruire cun d’unu cuntzertu “Bisajos” de su musicista Gavino Murgia e cun sa partezipatzione de su mastru Luigi Lai cun sas launeddas suas.

“Chent’annos paris!” est un’occasione unica po esplorare sos segretos de sa vida longa sarda, imparande derettu dae sa tradissione de sa coghina e da sa sabidoria de chie at fattu de sa vida longa e de sa salude un’usantzia.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22