Comente ischimus totus sa tzitdade de Terranoa (Olbia) est antiga meda. Su tzentru de sa tzitade moderna s’agatat in bona parte subra de s’àrea ocupada dae sa tzitade antiga. Sas testimonias monumentales chi apartenent a sos perìodos pùnicu e romanu sunt rapresentadas mescamente dae sos muros pùnicos, dae s’acuedutu romanu e de sos relitos de sa flota de naves romanas.

Su patrimòniu archeològicu de sa tzitade est in prus formadu dae medas giatzimentos subàcueos. Unu tzensimentu galu in cursu at permìtidu de individuare belle una chentina de giassos chi nos dant s’imàgine de su bratzu de mare frontale a sa tzitade frecuentadu meda, non petzi de sas mannas naves oneràrias, ma fintzas dae piticas imbarcatziones chi carraiant mertzes fatu de sa costa cun navigatzione de piticu cabotàgiu, impreende comente aprodu cròvinos fatu de sa costa (Porto San Paolo, Cala Moresca) e ìsulas a presu de sa costa (Spalmatore, Tavolara). Unu de sos agatamentos sutamarinos de importu mannu est istadu sa conca de istàtua in terracota chi rapresentat a mannesa naturale su deus Èrcule. Si tratat de sa còpia de unu pèrdidu originale in brunzu chi si deviat agatare in su santuàriu tzitadinu dedicadu a su deus e realizada in Terranoa in su sèculu II a.C.

Su tretu visìbile e visitabile de sos muros pùnicos est formadu dae una muradura retilìnea a dòpia cortina, costituidu dae contones mannos in  granitu subra de sa parte esterna e e blocos prus piticos subra de sa parte interna, una ghenna de intrada e un’àteru tretu retilìneu cun una turre de defensa a fundu de forma retangulare, formada inghiriende cun contones una roca naturale. A s’internu de sa turre est presente una bartza pro sa regorta de s’abba, como interrata pro la preservare. Unos cantos blocos tenent galu una traballadura a “bugnato”, chi si podet bìdere peri àteras istruturas de defensa de su mundu pùnicu.

Su tratzadu de s’acuedutu, movende dae Cabu Abbas, curret pro belle 7 km e intraiat in su tzentru urbanu dae Nord.

In sa tzitade antga sunt  istadas agatadas cantidades mannas de repertos tzeràmicos de vàrias èpocas, prendas, monedas, làntzias, colunnas de granitu, ossos de animales, trastos pro sa pisca e mescamente 24 relitos de naves, in bonu istadu de cunservatzione, duas de s’època de Nerone, 16 de su sèculu V d.C. e duos de s’edade giudicale.

Ma unu de is agatamentos prus importantes est costituidu dae su recùperu de una flota imperiale datàbile a su sèculu V cumposta dae naves in orìgine longas intre sos 18 e sos 30 m, dispostas in manera parallela tra issas e perpendiculares a sa lìnia de costa, afundadas sa matessi profundidade, in abbas bassas. Dae sa positzione issoro si podet pensare chi siant istadas afundadas mentras fiant ormegiadas in portu, fatu de pontiles de linna de sos cale sunt istados agatados fintzas sos restos. Custu at fatu pessare chi sa destruidura esseret acontèssida pro totus in su matessi momentu a pustis un’eventu violentu, comente si podet bìdere peri dae sos rastos de abrigiaduras chi sint abarrados in sos bucones de linna cuberados.

“Progetu finantziadu cun s’Avisu Pùblicu IMPRENTAS annualidade 2021-2022”

Casteddu, comintzat su Cossizu Metropolitànu nou: 70 comunes unidos po una comunidade cumpartida.

Su 16 de santuaini, in s’aposentu consiliare de su Palatu Règiu in Casteddu, est istadu fatu s’atopu de insediamentu de su Cossizu Metropolitanu nou, a pustis de sas eletziones chi bi sunt istadas su 29 de su mese coladu. Cust’atopu est su comintzu uffitziale de su mandadu amministrativu nou, a inube sunt andados sos rapresentantes elèzidos dae totu sos logos chi sunt parte de sa Tzitade Metropolitana de Casteddu.

S’atopu est comintzadu cun sas paràulas de su sìndigu metropolitanu Màssimu Zedda, chi at dadu su ben’ènnidos a totus. Posca at dadu a totu sos cossizeris noos carchi cossizu de comente fàghere po su tempus bennidore. Zedda at nadu chi sa punna pius manna de s’imbeniente siat cussa de fàghere una comunidade unida meda e capatze a valorizare sas cosas bellas chi in totu sas biddas bi sunt.

Custa est una de sas cosas chi pius tocat de fàghere, gai de àere mezoros mannos po totu sas biddas, chi sunt 70. Zedda lis at nadu puru chi tocat de afortire s’idea de apartenèntzia a su logu insoro, chi est semper mudande dae oe a cras. E custu tocat de lu fàghere chistionandesi pari- pari e cun sabiore meda. At nadu fintzas chi su Cossizu Metropolitanu est de importu mannu po dare su pesu zustu a totu sas biddas, gai de pòdere crèschere totus in donzi setore.

Su sìndigu at nadu chi tocat de ispalatare sas origas, iscurtande sas dudas e sas lementas de totus, gai de sas biddas mannas e gai e-totu de sas minores. Custu s’at a pòdere fàghere si b’at àere azudu dae parte de sos ufìtzios tènnicos e de chie tribàlliat in su Cossizu Metropolitanu, gai de bi tènnere un’andàina semper bia de novas, de ideas e de proponimentos.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22