Andamus a connòschere sa famada Gruta de Janas e sas intzisiones suas leghende su chi nos narat sa descritzione leada dae su giassu ìnteret de bauneiturismu.eu. Su nùmene de custa pitica gruta cuada in su costone a sos pees de “Montargia”, su bastione calcàreu chi dòminat s’ala arta de su tzentru abitadu de Baunei (su bigonadu mutidu “Bidda ’e Susu”, ) est uguale medas àteros tuvos de s’Ìsula chi sa traditzione populare at semper contadu cun mistèriu. Difatis, gasi comente  sa “Gruta de Janas”, a su matessi modu sas necròpolis prenuraghesas istuvidas in sa roca, presentes in totu sas zonas de sa Sardigna,  benint mutidas “Domus de Janas” (“domos de sas fadas, de sas maiàrgias”). Oe pro sos archeòlogos s’arcanu de sa funtzione de sas “Domus de Janas” est istadu iscoviadu, mancari abarrant misteriosos unos cantos aspetos de sos rituales funeràrios e de sa religiosidade prenuraghesa.

“Gruta de Janas” est aberta a su pùblicu (est istadu creadu un’àndala de atzessu, a sa base de su muru de “Montàrgia”) e mèritat de èssere insertada in una ghia istòricu-turìstica pro su particulare pamentu suo istalagmìticu, decoradu cun unu disinnu articuladu malu a interpretare. Si tratat de una rafiguratzione costituida dae unu totale de 18 canaleddas pagu profundas chi s’ispàinant dae una conca printzipale profunda unos cantos tzentìmetros, e si unint a vàrias copellas terminales dispostas sena perunu critèriu aparente.

Pròpiu pro sas caraterìsticas peculiares de su motivu iscavadu in su pamentu, sa gruta est istada ogetu in su 2005 de una campagna de iscavos archeològicos de sa diretzione de s’archeòloga Maria Ausilia Fadda. In ocasione de custu interventu sa zona est istada acresurada e in su cantzellu de intrada a su giassu sunt istados postos unos cantos cartellos esplicativos chi ispiegant sas caraterìsticas prus importantes de “Gruta de Janas”.

Sos testos, firmados dae sa Fadda ispiegant chi “sa gruta si ponet a notu pro sa presèntzia de una rafiguratzione articulada meda chi torrat a su Neolìticu finale (4000-3200 a.C.) impreada fortzis pro ritos propitziatòrios acapiados a sa fertilidade”. Intzisiones sìmiles sunt istadas iscobertas e istudiadas fintzas in Piemonte e Ligùria, analogias chi segundu  Fadda “diant pòdere cunfirmare galu de prus sos ligàmines fortes de s’àrea continentale cun sa Sardigna, chi esportaiat s’ossidiana dae sos giatzimentos de su Monte Arci finas in su sud de sa Frantza. Custos cuntatos de caràtere cummertziale ant influentzadu  meda sa produtzione de manufatos tzeràmicos, comente sos vasos a buca cuadrada, sìmiles meda a sos de produtzione lìgure, e sos vasos cun superfìtzies traballadas a istralùtzidu, comente a sos de su Midi frantzesu”.

“Progetu finantziadu cun s’Avisu Pùblicu IMPRENTAS annualidade 2021-2022

Sos pischeddos sardos connottu de s’artesandu e identidade.

Sos pischeddos sardos sunt una de sas espressiones prus beras de s’artesanadu de s’isula. Fattos tottu a manu contant unu connottu antigu fattu de cinnos tramudados in su tempus e de unu ligonzu forte cun s’iscrocca. Ispartos in tottu sa Sardigna custos manivattos benint creados impittande materiales naturales comente trastanza,iscrareu,saliche e pramma nana. Sas tennicas de tribagliu furriant dae zura a zura ma dimandant abilidade manna e passentzia po intritzare sas fribbas e creare oggettos resistentes e funtzionales.

Donzi pischeddu naschet pro unu motivu pretzisu. In su tempus passadu beniat impittadu in sa vida de donzi die po regollere e cusservare sos produttos comente pane, ranu e olias, ma fintzas pro su trazu de sa cosa de pappare. Sos pischeddos prus bene fattos, fuint invetze destinados a sas occasiones prus importantes comente festas de su connottu e tzerimonias. Fintzas oe in medas biddas de s’isula custa attividade est fatta dae artesanos chi custoint e trasmittint sas tennicas de su connottu. Donzi cantu est unigu e a s’ispissu decoradu cun disignos simples chi muttint sa natura e sa cultura locale.

Addìa de s’utilidade insoro sos pischeddos sardos sunt una cona importante de s’identidade. Contant s’istoria de sas comunidades e s’appitzigu cun s’ambiente chi at semper apparadu su chi serbit po los faghere. In sos urtimos annos est creschidu s’interessu assa parte de custu artesanadu fintzas gratzias a su turismu e s’iscoperta de su connottu locale. Sos pischeddos sunt oe appretziados non solu comente oggettos de impittu, ma fintzas comente elementos decorativos capatzes de aunire connottu e alliccu de custu tempus.S’intritzu est bistadu giuttu a su tzentru de dibattas e istudios e tzelebradu fintzas cun metodos prus modernos dae sas ingendras novas.

In d’unu mundu semper prus orientadu a sa produssione industriale sos pischeddos sardos sighint a essere unu esempru beru de tribagliu lentu e poderabile. S’iscampare insoro dipendet dae sa capatzidade de balorizzare custu patrimoniu e de lu tramudare a sas ingendras novas pro itte non benzat ismentigadu ma sigat a bivere in su tempus comente cona de sa cultura de s’isula.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22