Sa situatzione difìtzile de sa sanidade in Sardigna, ancora prus grae in Ogiastra, at portadu a su consigeri regionale Salvatore Corrias a iscriere una lìtera de denuntzia a su guvernadore
Christian Solinas.

Su polìticu ogiastrinu, at cumbidadu fintzas a su presidente a andare in su territòriu pro bìdere cun is ogros suos is dificultades fitianas de sa populatzione e de su sistema sanitàriu. Si liget in sa missiva: “Garbosu Presidente, scrio a Fostei, in deretura a Fostei, deliberatamente a Fostei, foras de su rollu chi tengio a comente de Consigeri regionale, pro lu contare ancora sa situatzione de sa sanidade in Ogiastra, situatzione chi conoschet bene, tanto de s’èssere pigadu pubblicamente s’impignu a agatare solutziones, no ùrtimu su 21 de arbili coladu, cando – presentes totus is rapresentantzas localis, istitutzionales e sotziales – su problema printzipale parriat èssere sa nòmina de su diretore generale, gai mannu chi totus is àteros, no esistiant. E gai est acontèssiu.

Epuru, dae tando, sa ASL nostra unu diretore lu tenet, ma is problemas, mancare is impignos mannos pigados, is problemas verdaderos, abbarrant. Antzis, aumenatant. Dae tando est silentziu, nemos faeddat, asuta de s’efetu de una (in)cosciente narcosi, a palas su prus de is perfetos silentzios de is innotzentes. Dae tando peruna boghe de democràtica denuntzia si nd’est pesada.

E sa mia, oe, est una boghe de denuntzia. Su spidale de Lanusei est patende meda: su Puntu nàscida non nc’est prus; Cardiologia at serradu (e a su nàrrere chi una batalla po s’Emodinàmica, is cardiopàticus, l’ant fata); su Pronto Socorso est un’anticamera sbuida, in unu spidali cun pagus ortopedicus e prus pagus anestesistas; su servìtziu de Neuropsichiatria est sboidu; s’elisuperficie a servitziu de s’emergentza-urgentza, mancai is promissas mannas, non est mai partia.

Sa medighina territoriale est unu puzzle chene tesseras, abompiadu de chini, intra milla dificultades, est sa ghia, ma chene risultados: comunidades interas sunt chene medicu de famìlia e chene guàrdia medica né turistica, in custu territòriu turisticamente vocadu; su servìtziu de su 118, in Tortolì, bivet a comente podet a sa ridutzione manna de su personale
solu gratzias a su sacrifitziu de is operadores in servìtziu.

Custus sunt is problemas, e sa rispusta de bos’àterus est semper e solu una: non ci sunt medicos, e sa curpa est de chini, finas a immoe, no at scipidu programmare, e po agatare una solutzione iat a serbire una rivolutzione, o una riforma, comente cussa aprovada, sustenida fintzas cun is agiudos cumpratzidos de nos (in is bursas de stùdiu e in is RAR chi ancora depint cunsignare), una riforma monca, atzopiada dae is atos aziendales chi no ant tentu ancora esecutzione.

E tando is medicos – bivat sa rivolutzione – ddus importamos de Cuba, chene pensare a is medas, giòvanos professionistas, sardos, ogiastrinos, chi si nde andant ca agatant in àteros logos una diversa e prus forte motivatzione, cussa chi custo sistema, chi bos’àteros, solu bos’àteros, oe, seis is responsabiles, no est in gradu de ofrire e garantire.

Deo creo, de fronte a is fainas e a is giustificatziones, chi pagu ballint, de s’Assessore a sa sanidade e de s’aparadu suo finas a is ùrtimas articolatziones territoriale, de creo chi totu  custo non si potzat bariare prus.

No innoghe, non dae nos, in ue patimos sa pandemia de su spopolamentu. No innoghe, non dae nos, in ue s’ammarariamos a comente in tzitade e imbetzamos de prus. No innoghe, non dae nos, in ue ònnia sfortzu est fatu po abompiare s’emorragia de is giòvonos chi si ndi andant pro non torrare. Deo la cumbido duncas a bènere inoghe in Ogiastra, Presidente. Bengat, fintza a manere informale bengat a bìdere su spidale nostru sboidu de medicos, ma non de patzientes, bengat a bìdere su traballu mannu de is operadores sanitarios nostros, chi pro amore, solu pro amore de custa terra e de su traballu intzoru, abompiant. Bengat, Presidente, bengat a bìdere sa gente cantu patit. Gai at a podere pigare cuscientzia de sa gravidade de sa situatzione. Deo seo pronto a lu fàghere acatu. E cun mie totus is ogiastrinos, cussos chi ant pèrdiu sa fiede e sa passientzia. In abetu de una rispusta, cordialmente la saludo”.

“Progetto finanziato con l’Avviso Pubblico IMPRENTAS annualità 2021-2022”

“Su Nenniri”, s’antigu connottu sardu chi abbisat sa Pasca.

Cun s’arribu de sa Pasca, in biddas meda de sa Sardigna torrat unu de sos connottos prus antigos e ammaghiantes de s’isula:”su Nenniri”. Si tratta de chimizones de ranu o atteros semenes creschidos a s’iscuru, chi affigurant sa torrada a bida e s’isperantzia, ligados a sos ritos de sa Chida Santa. S’ammanitzu incuminzat parizzas dies prima de Pasca, sos semenes benint postos a brotare in bottos pitticcos, a s’ispissu prattos o canisteddos,cuzigados e attesu dae sa lughe. In custa manera creschent fines,craros e delicados, leande unu colore giallu chisinathu tipicu meda.

Sa forma insoro chidrina e s’aera casi de “sufferentzia” crischiant comente iscromba su sacriffitziu e sa morte de Cristus. In su mentres de sa Chida Santa,”is nenniris” che benint leados in cresia e impittados pro adornare sas tumbas, sos artares pro su Giovia Santu. In carchi bidda benint postos cun contivizu particulare impare a frores,qandelas e pannos, creande bistas simples ma prenas de signifficu.Est unu zestu chi aunit fede e connottu populare, chi andat dae ingendra a ingendra.

In comunidades meda, mescamente in sas biddas prus pitticcas, s’ammaniada de sos nenniri est fintzas unu mamentu de cundivisione.A s’ispissu sunt sas feminas e sos bezzos a si nde occupare, impare cun zovanos, chi gai imparant su balore de custos ritos antigos. Custu connottu tenet raighinas attesu meda, mancari ligadas fintzas a ritos de sa laurantza prima de Cristu, chi tzelebraiant su cursu de sa natura e sa torrada a bida pustis de s’jerru.Cun su tempus, custos signifficos si sunt intritzados cun sa religione cristiana, dande vida a una cosa chi oe mustrat impare morte e torrada a bida.

“Su nenniri” non est solu unu elementu de decoradura, ma unu signu fungudu de sa cultura sarda. In d’unu mundu chi cambiat a sa lestra, custos connottos sighint a bivere gratzias a sa memoria de sas comunidades e a su disizu de no perdere sas raighinas insoro.Cun sa Pasca chi est accanta, cussos chimizones divennint gai unu nuntzu simple ma forte:pustis de donzi tempus buggiu, sa vida agatta semper sa manera de torrare a naschere.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22