In s’ierru de su 2019 sos allevadores sardos aiant detzìdidu de protestare pro pedire prètzios prus giustos respetu a sos 55 tzentèsimos a su litru pro su late de berbeghe e 44 tzentèsimos pro cussu de cabra pagados dae sos industriales. “Mègius a nche lu imbolare chi atzetare prètzios gasi bassos” naraiant sos pastores in su freàrgiu 2019, chi aiant peri meletzadude blocare sas eletziones regionales de su 24 freàrgiu si non s’esseret arribbados a unu acòrdiu cun sas istitutziones: “No at a intrare nemos a votare!”

Sas protestas si fiant concruidas cun una crèschida de sos prètzios pagados a sos pastores, chentinas de denùntzias e diversos protzessos. Duos de custos s’ant a tènnere etotu in sas chidas imbenientes, cando sos acusados ant a èssere mutidos a rispòndere de su reatu de blocu istradale. “Ambos sos protzessos sunt sos ùnicos in Sardigna acanta si protzedit pro su reatu de blocu istradale” iscriet a riguardu s’assòtziu indipendentista Libertade.

Eris una fila longa de tratores e àteros mezos agrìculos cun deghinas de allevadores sardos duncas ant protestadu contra su caru energia e s’aumentu esageradu de sos costos de sas matèrias primas.

Sos pastores si sunt atopados eris a merie in su bìviu Vitzi-Sòlogo, dae ue si sunt postos in caminu fatu de sa SS 131, in diretzione zona industriale de Pradu Sardu (Nùgoro).

“Nos bolides iscraos, ais a tènnere  rebellos” est istadu iscritu in unu de sos medas  cartellos picados a sos tratores.

S’initziativa de chèscia arribat a pustis de s’àtera protesta manna de sos pastores de su 2019, cando aiant fuliadu su late in caminu pro otènnere unu prètziu prus giustu pro su late.

 “Progetto finanziato con l’Avviso Pubblico IMPRENTAS annualità 2021-2022”

S’atteru manzanu, bi est bistada un’accorrada importante meda de su comidadu de sa provintzia de Nugoro, de s’ordine e sa seguresa pubbrica, cun sa presidentzia de su Prefettu de Nugoro Dionisi, a sa cale ant partetzipadu sos cumandantes provintziales de sas Fortzas de s’ordine, e de sa polizia de sos cartzereris Antoni Galati. S’argomentu printzipale est bistadu un’attera borta cussu de s’emergentzia chi bi est in sa presone de Badu e’ Carros, una chistione custa, chi est dimandande interventos chi si leant tottu paris.

Respundinde a s’imbiu de s’Esercitu po controllare sa presone dae sa parte de fora, si ispettant interventos puru da parte de s’amministrassione de sa Presone. Su provvedidore at isboddiadu tottu sos particulares de s’imbiu intro de pagu tempus, in Sardigna de 71 agentes mascros,21 feminas e 34 arrezzentes, chi arrivant dae sos cursos
chi sunt finidos dae pagu.

Su segretariu generale de sa Uil Pa Polizia de sas Presones de sa Sardigna, Migheli Cireddu, at faeddadu de sa desemplada assione leada dae su Prefettu Dionisi, chi at collaboradu meda cun su Provvedidore Galanti, po i sfidare sa situassione cun meda detzisione. Bell’e gai, Cireddu at evidentziadu chi s’imbiu de personale nou, est solu unu signale positivu, no est sa solutzione deffinitiva, ispetzie si cunsideramos sos pensionamentos chi ant esser fattos in pagu tempus.

Su personale de sa polizia de sa presone, in manera particulare in Nugoro e Tattari, sighint a tribagliare in manera precaria, cun orarios de tribagliu longos meda e paga claresa de su controllu. Cireddu at nadu puru chi bi est s’abbisonzu de torrare a ordimizare su tribagliu e de interessare de pius sos sindacados in custu processu, in manera chi sas intetziones bonas de sas istitussiones si potant traduire in assiones e mesorias beras.

S’impignu de onzi die, de su cumandu regionale e de su Prefettu, est appretziadu meda, ma est urgente chi si passet dae sas ideas a sa pratichesa,interessande sos de sos sindacados in s’ordimizu de su tribagliu. Solu in custa manera si at a podere iscansare chi carchi derettura e cumandante, mancari tenzant sas menzus intentas, sigant a
faghere dannos mannos a livellu logale.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22