Durante s’esploratzione de una gruta sunt istados iscobertos ossos umanos,  Est sutzèdidu a tres ghias escursionìsticas lanuseias, Claudio Orrù, Silvia Piroddi, e Giuseppe Fa, de s’Assòtziu Mamutera Trekking.

Sos tres fiant esplorende una zona pagu connota de Gàiru Scalu, cando ant notadu s’intrada de una gruta. Donende cura meda sunt intrados in su conchile e ant iscobertu sa presèntzia de chentinas de ossos umanos antigos meda. Sos tres escursionistas ant avisadu in deretura sos Carabineris chi ateretantu ant ativadu totus sas protzeduras de verìfica de s’iscoberta dae banda de sa Subrintendèntzia. Sos espertos non nde sunt seguros seguros, ma pensant chi si tratat de unu logu de sepoltura antigu meda. Est su de tres acatamentos de custa genia fata in Ogiastra.

Difatis in su mese de martzu de s’annu coladu fiant istados agatados dae sa politzia de Lanusè àteros cògios umanos, pròpiu in un’àtera gruta de Gàiru, in su sartu a inghìriu de Genna de Lua, sa fratzione de Gàiru Tacu Isara. Su personale de su cummissariadu de Lanusè los aiat iscobertos in localidade Càbudu de Abba e los aiat afidados a s’istitutu de meighina legale de s’universidade de Casteddu, pro more chi essat atzertada s’època de su detzessu. In custu casu sos ossos funt prus reghentes de sos chi sunt istados agatados dae sos escursionistas lanuseinos. No est craru si sos ossos coberados apartèngiant a un’òmine o a una fèmina, ma non parent reghentes. Semper s’annu colad e semper in una gruta in Gàiru, ma in localidade , sos carabineris de sa cumpangia de Jersu aiant iscobertu àteros restos umanos, chi fiat resurtados de prus a mancu de una trentina de annos a oe e cun probabilidade de un’òmine a suta de sos trinta annos.

 “Progetto finanziato con l’Avviso Pubblico IMPRENTAS annualità 2021-2022”

Si est custituida in su notaju sa Delegassione po Poderare sa naschida de sa IGP porcheddu de Sardigna, e si est assemidada in manera uffitziale sa Delegassione Iscentifica, chi in sa prima assortida, fatta in Macumere, in s’agentzia de Contas, su 15 de Abrile, at tribagliadu po approntare, medas puntos de su regolamentu de produssione de custa saporitesa totta sarda.

S’intentu, preparare sos documentos chi serbint de presentare a sa Commissione Europea po alcansare su riconnoschimentu de s’arrennomini IGP e faghere naschere una delegassione chi tenzat commente faina printzipale cussa de creare un’unione de sos pastores, masellajos e sos trasformadores de s’eccellentzia sarda, chi potant ordiminzare una filera e dare unu fentomu balidu a su mercadu, po tottu cussu chi appartennet sas fases de pesadura e de trassa de sos porcheddos chi teppent andare a su mercadu.

A sa mattessi manera,bardare sa produsssione locale sarda dae su periculu de battire importassiones chentza controllu perunu, e duncas tutelare s’issida de su prodottu. Unu arminzu balidu puru po sos consumadores, chi ant podere tennere unu trattadore chi potat garantire supra su rispettu de unu regolamentu de produssione. Fases importantes meda, cussas de sa naschida de sas duas delegassiones.

Importante meda at essere sa retza de sos sardos in Italia e in su mundu: su motivu de sa presentzia in sa delegassione de Bustianinu Mossa, presidente de sa Fasi, sa retza de sos corriglios sardos in Italia.”Sos emigrados” si dant itte faghere in cust’intentu commente consumadores,sustenidores,ambasciadores, narat Mossa. Semus 2,5 miliones sos sardos fora de sa Sardigna, ispartinados in tottu su mundu.

Solu in Italia sa Fasi contat casi 30.000 iscrittos, in 68 delegassiones presentes in 12 regiones de s’Italia. Sa pius a mesudie est Ciampino. Su tzentru e su norti de s’Italia sunt su puntu de arribu menzus de operajos, pastores,sordados e istudiantes ligados in manera chi non si podet isligare dae sa cultura sarda chi prima de tottu est sa cosa de mandigare. Esist commente una venerassione de su porcheddu. E difattis partizas sunt sas initziativas chi tenent commente base custu prodottu pittitteri.

Tenimos po custu un’istruttura de negossiu de produttos de calidade funguda, a sa cale si diritzant sos sardos emigrados.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22