Mosè Cao est istadu mortu cun duos corpos de fusile.

S’autopsia de su mortu, agatadu in unu putzu a presu de su caminu provintziale 56 Lotzorai-Talana, at cunfirmadu chi sa vìtima est s’òmine ogiastrinu iscumpartu su 18 de cabudanni coladu in Tortolì.

Cunfirmadas fintzas s’ipòtesi sighida dae deretu dae is investigadores: omotzìdiu.

Segundu su chi est esssidu a campu, in su corpus sunt istadas agatadas duas ballas chi diant èssere istadas isparadas dae unu fusile de cassa chi ant corpidu sa vìtima.

S’esàmene est istadu fatu a s’ispidale de Lanusè, pro disponimentu de sa Procura, dae su mèigu legale Matteo Nioi, agiudadu dae unu biòlogu pro su prelevamentu de is tessutos chi ant a serbire a analizare su Dna de Cao. De sutaliniare chi sa cunfirma chi si tratet de s’operaju iscumpartu a fine istiu est giai arribbada dae is tatuàgios- reconnotos dae is parentes – e dae is pròtesis dentàrias — reconnotas dae su dentista de s’òmine -.

In prus sunt istados dispostos fintzas is esàmenes istològicos pro istabilire cun seguresa sa data de sa morte.

Is incuirentes sunt sighende a indagare pro cumprèndere calicuna cosa in prus de sa vitzenda. Is indàgines fiant istadas giai aviadas dae s’iscumparta de s’òmine, cun sa pm Giovanna Morra chi aiat abertu unu fascìculu pro secuestru de persone a càrrigu de disconnòschidos. Immoe cun s’acatamentu de su mortu, s’ipòtesi de reatu divenit su de omitzìdiu voluntàriu.

Sa vìtima, traballaiat comente operaju in is cantieris comunales de sa bidda sua — Lotzorai — ma in passadu fiat istadu denuntziadu pro tràficu de droga.

In is annos colados aiat subidu fintzas una cundenna a 13 annos in unu protzessu pro tràficu internatzionale de droga. Is incuirentes chircant indìtzios in s’ambiente de su tràficu e de s’ispàtziu droga, pro chircare de agatare s’autore de s’omitzìdiu.

Sa populatzione ogiastrina est abarrada ispantada e corpida meda pro custu fatu chi at insambentadu sa zona.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Continuidade de s’iscrocca, billettos a pagu preziu fintzas po sos familiares de sos chi bistant in Sardigna.

Si podent comporare da oe sos billettos in continuidade de s’iscrocca riservados a sos familiares de sos chi bistant in Sardigna. Sa novidade est po su sistema de pesos de servitziu pubbricu chi regulat sos collegamentos aereos da e pro s’isula e accreschit su numeru de pessonas chi podent godire de sos pretzios aggevolados.

Sos billettos si podent comporare po sos bolos dae su 29 de martu, die in sa cale at a bintrare in fortilesa su sitema novu de sa continuidade de s’iscrocca. Cun custu seperu sa Sardigna reconnoschet su dirittu de biazzare a pretziu bassu, non solu a chie bistat in s’isula, ma puru a chie, mancari bivat in d’unu atteru logu, tenet unu ligonzu istrintu cun chie bistat in Sardigna.

S’assessora regionale a sas Carraduras Barbara Manca at nadu chi si trattat de unu passu in daenantis importante meda pro itte affortigat su cuntzettu de continuidade de s’iscrocca e tenet contu de su balore de sas famiglias in d’una iscrocca de isula comente sa Sardigna. Su risurtadu est fruttu de su tribagliu leadu a daenantis dae sa Regione Autonoma de sa Sardigna impare cun su Ministeru de sas Infrastrutturas e de sas Carraduras e sa Cummissione Europea, rispettande sas regulas europeas po sos collegamentos garantidos dae s’Istadu.

Ant a podere godire de sos pretzios aggiudados, cun d’unu accreschimentu minimu in cunfrontu a cussos istabilidos po sos chi bistant inoghe, ma cun d’unu pretziu massimu giai istabilidu, sos parentes fintzas a su terzu gradu. At a serbire a fizzos, babbos e mamas, frades e sorres, giagios e nepodes,tios e atteros nepodes. S’azzudu balet fintzas po maridos e muzzeres e po sos fizzos de sos famigliares chi tenent dirittu a s’iscontu.

Sa misura punnat a alcansare chie at dassadu sa Sardigna po motivos de tribagliu o de istudiu ma sighit a mantennere unu ligonzu forte cun s’isula, gai comente sas famiglias chi bivent partidas intre regiones divressas. S’intentu est de faghere divennere prus simple e prus pagu caru su viazu po chie depet torrare a domo pro motivos famigliares.

Sa cabuda de sos billettos a pretziu bassu affortigat duncas su dirittu a si podere movere in d’una regione chi po sa posissione geografica sua depet faghere sos contos cun collegamentos prus cumplicados e caros in cunfrontu a atteras zuras de s’Italia, azzuande non solu sos chi b’istant ma fintzas sas famiglias insoro.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22