Grandu festa de is Maneskin a Las Vegas.

Amajadores, iscadenados, risolutos. Comente annuntziadu, sa banda romana at abertu su cuntzertu de is Rolling Stones conchistende su pùblicu de s’Allegiant Stadium cun is cantzones famadas issoro, dae “Muti e Buoni” a “I Wanna Be Your Slave”, dae “Mamma Mia” a sa rieditzione de “I Wanna Be Your Dog” de is Stooges.

Damiano, Victoria, Ethan e Thomas ant fatu donu de sa mùsica issoro a is de Istados Unidos, in ue su tour est unu triunfu mannu, bestidos cun tutas istrintas isteddos e istrìscias si sunt presentados gasi: “Hello Las Vegas! Est un’onore èssere inoghe e tènnere sa possibilidade de sonare in su palcu de sa banda prus manna de semper”.

Mesora de grandu ispetàculu. E subra de su palcu no est mancadu s’abbratzu de su cantante Damiano a sa bassista Victoria. Is Maneskin sunt otenende unu sutzessu mannu prus de is aspetativas: sa mùsica, sa capatzidade de cantare bene in inglesu e su de èssere foras dae is ischemas sessuales est faghendeddos amare fintzas addae de s’Otzèanu.
Mick Jagger ddos at tzelebrados ponendesi in posa paris cun Damiano, Victoria, Ethan e Thomas, est a nàrrere is Maneskin. Su cantante de is Rolling Stones at postu in is pàginas de is retes sotziales suas una fotografia cun is bator pitzocos romanos chi ant abertu su cuntzertu suo.

“Great night in Vegas with Maneskin” – “Note manna in Vegas cun is Maneskin” -, at iscritu a costadu de sa foto. Tra is cummentos, non mancat su de su matessi Damiano, cun tres caritedda ispantadas.
Su primu cantante de is Rolling Stone, cun custu gestu, at cunsacradu sa banda italiana a unu mundiale pro sa mùsica italiana.

In prus su grupu romanu benit dae sa vitòria de Sanremo, oramai vetrina de sa cantzone italiana e dae s’Eurovision.
Cosas chi non si bidiant dae deghènnios pro sa mùsica italiana, capatza torra de barigare s’otzèanu e forsis is Maneskin diant pòdere fintzas abèrrere su caminu a medas àteros grupos e artistas.
Amus a bìdere, ma de seguru s’Itàlia diat pòdere otènnere bona fita de mercadu a sa mùsica ispànica, tra is prus bèndidas in su mercadu americanu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Su Casteddu, chi mancari apat gherradu a coro betadu pro totu sa partida, at pérdidu contra sa Roma, una de is iscuadras prus fortes de su campionadu.

Una partida giogada bene dae is sardos, ma no est bastadu pro bìnchere contra is romanos.

In s’istàdiu Unipol Domus su resurtadu finale est istadu de 1-2 pro is grogu-rujos, a pustis de una partida istragosa pro totus e is duas is iscuadras.

Is òmines de Mazzarri, a diferèntzia de sa gara de domìniga contra sa Fiorentina, at giogadu bene, mancari is medas giogadores chi no ant pòdidu giogare pro more de is dannos tentos in is giorronadas coladas.

Su Casteddu at àpidu sa botza pro su 1-0 in su primu tempus giai, cun su defensore Bellanova chi at corpidu sa travessa, cun su portieri Rui Patrizio bellu che superadu.

In su segundu tempus is sardos sunt resèssidos a marcare sa rete de su vantàgiu de s’atacante Pavoletti, lestru in su comintzu de sa partida a fàghere gol in àrea de rigore.

Is ruju-blu galu, cun su tzentru a in antis toscanu, tenent s’ocasione de marcare su 2-0, ma custa borta su portieri romanu non si fàghet cullionare.

S’iscuadra ghiada dae Mourinho no abarrat a castiare, e in duas ocasiones s’acòstiat a su parègiu. A su minutu 70 is grogu-rujos agatant su gol de s’1-1 cun unu corpu de conca de su difensore Ibanez chi istampat sa porta guardada dae su portieri Cragno.

A pustis de custa rete sa Roma est mere de su campu e pro su Casteddu est un’istragu mannu firmare is atacantes aversàrios, ma is meres de domo gherrant finas a s’ùrtimu cun mèritu.

Mancari sa gana dimustrada dae is òmines de Mazzarri, sa Roma marcat su 1-2, gratziàs a una punitzione bella a beru de su capitanu Pellegrini.

Isperamos pro sa partida benente chi su Casteddu diat a tennere prus bona sorte contra su Bologna a s’istàdiu Renato Dall’Ara.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22