Cun su trassa de su votu segretu, su disinnu de lege contra s’omotransfobia non colat in Senadu: 154 is votos in favore de is pregiuditziales postas dae Fratelli d’Italia e Lega, 131 is contràrios e duos is astènnidos.

Su disinnu de lege torrat duncas in Cummissione Giustìtzia dae ue, est difìtzile meda chi bèngiat torrada a propònnere tra ses meses, gosi comente est prevìdidu dae su regulamentu.

Tristu meda Alessandro Zan, primu firmatàriu de sa proposta de lege chi pro s’èsitu de su votu in senadu betat sa curpa de s’afossamentu de sa lege a cussos chi, pro meses, a pustis de s’aprovatzione a sa Càmera, ant postu fatu a is sirenas sovranistas chi boliant aterrare Ddl Zan. In prus Zan at naradu chi est istadu traitu unu patu polìticu chi boliat fàghere fàghere a su Paisu unu passu de tziviltade.

Contra su disinnu de lege su tzentru-dereta at botadu unidu. In su matessi tempus at fatu discutire s’istrategia adotadu dae su Partidu democràticu. Su segretàriu Enrico Letta, duas dies a oe, aiat donadu incàrrigu pròpiu a Zan de tratare cun is àteras fortzas polìticas pro valutare unos cantos cambiamentos a sa lege.

Custa abertura a su diàlogu, diat àere dèpidu sarbare sa lege dae sa protzedura, prevìdida dae su regulamentu, de non passare a s’esàmene de is artìculos (sa gosi narada tagliola) chi, però, est istada posta su pròpiu a su Senadu e, fintzas cun su votu segretu.

Custu at permìtidu a is gosi mutidos “francos tiradores” de tènnere s’ampramanu pro votare contra: a contos fatos diant dèpere èssere istados 16 is chi ant ‘traitu’. Custu at causadu meda amargura a s’internu de su Partidu democràticu e de su tzentrumanca.

In medas sunt discuntentos e narant chi non s’est bòlidu afrontare una chistione acanta su Paisu est meda de prus a in antis de is àulas de su Parlamentu. Su segretàriu Enrico Letta, nointames, at bòlidu su reclamare sa bonesa de sa lege e de is isfortzos fatos pro dda portare a in antis.

Fintzas s’ex primu ministru Giuseppe Conte at afirmadu chi s’Itàlia at fatu unu passu in segus e non faghet a si bregiare pro su chi est capitadu. A dda pensare in modu diferente est su tzentru-dereta, chi at festadu pro sa bulladura de sa lege.

Ma is assòtzios chi dae annos sunt lutende contra s’omofobia sunt chesciosas e forsis in dies sighentes ant fàghere una manifestatzione de protesta pro su chi est acontèssidu in Parlamentu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Grandu resèssida de Nicola Bartolini in is Mundiales giaponesos de ginnàstica.

S’atleta sardu de sa Pro Patria Bustese faghet prestatzione etzetzionale a su corpus lìberu e divenit campione de su mundu.

S’Itàlia torrat in su pòdiu prus artu a 24 annos dae s’ùrtima vitòria de Yuri Chechi a is aneddos. In s’ispetzializade, in passadu, solu unu brunzu in su 1966 cun Menichelli.

Est su segundu oro asulu in s’istòria: su primu fiat arribbadu in su 1913 cun Giorgio Zampori. Bartolini trìunfat cun su puntègiu de 14.800 (6.2 su Puntègiu D). A palas suas su giaponesu Kazuki Mina•mi (14.766) e su finlandesu Emil Soravuo (14.700).

Su cuartesu si fiat presentadu a s’atu conclusivu cun su segundu puntègiu de calìfica (14.966, 6.2 sa nota de partèntzia) e teniat totu is cartas in règula pro pigare in su pòdiu, ma a sa fine at fatu meda de prus de su chi si pensaiat.

In abrile Bartolini aiat bintu una medàllia de brunzu a is Europeos: de sa rassegna continentale est istadu capassu de artziare su Puntègiu D de bator dètzimos, fundamentale pro pòdere intrare in màssima cumpetitzione internatzionale.

Un’aumentu de is dificultades chi però no at influidu in sa limpiesa de s’esecutzione, su puntu suo de fortza chi fintzas oe dd’at permìtidu de bìnchere cun unu puntègiu netu de 14.800 (6.2).

Sa diferèntzia intre su sardu e totus is aversàrios suos dipendent pròpiu dae custu: s’esertzìtziu suo est dae manuale de su Prùere de Magnèsiu pro sa netesa de is lìnias, sa pretzisione in totu is arribos, is imperfetziones limitadas a s’etzessu,

Duos “avitamentos” e mesu a in antis, dòpiu “càrpiu” cun mesu giru, Tsukahara avitadu. Unu e mesu duos avitamentos, duos e mesu-unu a in antis. Serrada cun unu super triplu avitamentu. Custos is elementos prus significativos de una prova colada oramai a s’istòria e chi aprèsiat a Nicola Bartolini a is mannos de sa ginnàstica artìstica italiana.

Una bella satisfatzione a pustis de sa delusione de no àere pòdidu partetzipare a is Giogos de Tòkyo 2020. Su ginnasta asulu s’est postu a palas aversàrios de bàlia comente su giaponesu Kazuki Minami (14.766, chi moviat dae 6.5), su finlandesu Emil Soravuo (14.700, 6.0), e su sudcoreanu Ryu Sunghyun (14.600)

Attività realizzata col contributo della Regione Sardegna – IMPRENTAS 2020-2021. LR 22/2018, art. 22