Su Casteddu torrat dae Firenze a butzacas bòidas.

In s’Istàdiu Artemio Franchi su giogu bellu dd’at fatu un’iscuadra ebbia: sa Fiorentina, chi at meritadu de bìnchere 3-0 contra is òmines de Walter Mazzarri, chi a s’imbesse ant fatu una gara lègia a beru.

Sa partida de sa chida colada contra sa Sampdoria, chi is casteddajos ant bìnchidu pro 3-1, aiat indanimadu is casteddajos, ma s’iscunfita in terra toscana at a èssere mala a ingùrtere pro s’allenadore ruju-blu. Tocat a nàrrere chi in custa prima iscuta de campionadu s’iscuadra de Vincenzo Italiano est una de is prus balentes e massimamente in domo no est gasi fàtzile a dda bìnchere.

Però su Casteddu est caladu in campu sena gana e no at gherradu nemmancu pro lòmpere a su pro su prus a su parègiu. Totu cosas chi, si si bolet abarrare in Sèrie A, no andant bene nudda.

Sa prima rete de sa Fiorentina est lòmpida gràtzias a su rigore de Biraghi. Su segundu gol est arribbadu imbetzes a coa de su segundu tempus, cun unu tiru de Gonzalez. Poi, su cannoneri Vlahovic est istadu bravu meda a cungiare su resurtadu in su 3-0, cun unu bella istamborrada iscuta dae punitzione.

S’atacante de natzionalidade serba at àpidu àteras ocasiones puru, ma pro sorte bona de su Casteddu no est resèssidu a marcare àteras retes.

Siat in su primu, siat in su segundu tempus, is òmines de Mazzarri no ant tentu peruna ocasione de torrare a abèrrere sa partida, mancari s’allenadore apat proadu a cambiare su giogu faghende intrare giogadores prus pasados.

In sa gara benidora pro is sardos at a mancare su difensore Caceres, chi at tentu dannu in sa partida de notesta.

Una mancàntzia manna pro is casteddajos chi mèrcuris ant a èssere impinnados in una partida istragosa meda contra sa Roma, ghiada in custa istajone dae s’allenadore portoghesu Mourinho.

Fintzas si su tècnicu Mazzarri at a dèpere fàghere a mancu de medas giogadores importantes, isperamus su pròpiu de pòdere bìdere una bella gara, cun unu Casteddu prus inganidu e prus gherradore.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Su benidore est semper prus a presu.

A nos fàghere acurtziare ancora de prus, est sa briantzola Oversonic Robotics chi at presentadu ‘RoBee’, unu protòtipu de 170 tzentìmetros de artària in printzìpiu destinadu a traballaduras perigulosas e posca a su campu sanitàriu, cumpresos is repartos comente su Covid in ue s’espositzione de su personale podet èssere un’arriscu.

Sa start up istimat de pònnere in su mercadu is primos esemplares a cumentzare dae su 2022, cun unu totale de 50 robot bèndidos durante s’annu.

S’amministradore delegadu e co-fundadore de s’azienda, Paolo Dentes, at afirmadu chi sunt giai istados fatos is primos pre-òrdines, e at iscoviadu chi mancari siant in su cumintzu de sa faina impresnditoriale noa, cun probabilidade meda sa Bursa at a èssere unu possìbile arribu naturale pro una sotziedade de custa casta.

In austu ddoe est istada una crèschida de capitale dedicadu de Oversonic Robotics pro s’intrada de Fintel, sa finantziària de sa famìlia Bulgarelli, chi at achiridu su 33% de sa sotziedade briantzola.

Sa sotziedade, chi tenet comente co-fundadore Fabio Puglia, laureadu in matemàtica e fìsica cun indiritzu in astrofìsica a s’Universidade istatale de Milanu, intrat in unu setore de primore a livellu mundiale e puntat subra una màchina de pesu cumprèndidu tra is 65 e is 75 chilos (a segunda de sa cunfiguratzione de impreu) chi rèplicat non isceti in manera estètica s’istrutura mecànica de su corpus umanu, cun 40 giunturas mòbiles e unu servìtziu cumpletu de sensores chi ddis permitit de bìdere e navigare in manera autònoma in s’ispàtziu a inghìriu.

Is duos cofundadores ant afirmadu chi giai dae custu atòngiu at a èssere sutapostu a totus is tzertificatziones, e a pustis at a èssere unu produtu adatàbile a beru a is bisòngios de su mercadu: fintzas personalizàbile, ma de prodùere in iscala manna.

Un’innovatzione importante chi permitit a s’Itàlia de intrare dae protagonista in custu mundu tecnològicu meda e cun possibilidades infinidas pro su benidore.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22