Sa bidda de Teulada, ma fintzas s’opinione pùblica natzionale, est ispantada pro sa morte de de su coghineri.

Una morte lègia a beru cussa de Alessio Madeddu, piscadore e coghineri de Teulada mortu cun unas cantas caladas de istrale in su ristorante suo de Portu Bèciu (Porto Budello).

S’òmine fiat connotu fintzas in Utàlia pro more de sa partetzipatzione sua a su programma televisivu 4 ristorantes, presentadu dae su coghineri famadu Alessandro Borghese.

Su modu ischietu suo de fàghere e su prontu suo a betare sa botada dd’aiat fatu devènnere unu pessonàgiu istimadu meda dae is teleispetadores.

Sa popularidade sua fiat istada matziada però dae unu fatu de crònaca, cando s’annu coladu, a pustis de un’intzidente in màchina, no aiat ubbididu a is carabineris a fàghere sa proa de s’etilòmetru. Madeddu si fiat pilisadu meda contra is òmines de s’arma e pro vengatzione fiat torradu cun una palamecànica e aiat fatu rumbulare sa vetura de servìtziu de sos militares.

Pro custu fiat istadu cundennadu a 6 annos de presone pro dòpiu intentadu omitzìdiu, pena chi fiat iscontende a is arrestos domitziliares in una domo a probe de su ristorante cosa sua.

Pròpiu in cue eris est andadu a ddu chircare su mortore suo, chi in custas oras est istadu agatadu e at trogadu totu a is incuirentes. Su tratat de su paneteri Sant’Anna Arresi, Angelo Brancasi, 43 annos, originàriu de Erice, chi segundu sa cunfessione diat àere mortu a Madeddu pro motivos passionales.

A su chi contant unos cantos giornales locales, su sitzilianu fiat gelosu de sa mugere chi traballaiat in su ristorante de sa vìtima e chi si dda intendiat cun Madeddu.

Segundu is incuirentes su paneteri diat àere fatu essire s’òmine dae sa domo acanta fiat iscontende is arrestos domitziliares, duncas ddu diat àere prima fertu in caminu, e posca dd’at corpidu a morte cun unas cantas caladas de segure in su mentras su coghineri fiat chirchende de torrare a imbucare a domo sua pro si sarbare.

S’assassinu immoe s’agatat in su càrtzere de Uda.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Su Casteddu, chi mancari apat gherradu a coro betadu pro totu sa partida, at pérdidu contra sa Roma, una de is iscuadras prus fortes de su campionadu.

Una partida giogada bene dae is sardos, ma no est bastadu pro bìnchere contra is romanos.

In s’istàdiu Unipol Domus su resurtadu finale est istadu de 1-2 pro is grogu-rujos, a pustis de una partida istragosa pro totus e is duas is iscuadras.

Is òmines de Mazzarri, a diferèntzia de sa gara de domìniga contra sa Fiorentina, at giogadu bene, mancari is medas giogadores chi no ant pòdidu giogare pro more de is dannos tentos in is giorronadas coladas.

Su Casteddu at àpidu sa botza pro su 1-0 in su primu tempus giai, cun su defensore Bellanova chi at corpidu sa travessa, cun su portieri Rui Patrizio bellu che superadu.

In su segundu tempus is sardos sunt resèssidos a marcare sa rete de su vantàgiu de s’atacante Pavoletti, lestru in su comintzu de sa partida a fàghere gol in àrea de rigore.

Is ruju-blu galu, cun su tzentru a in antis toscanu, tenent s’ocasione de marcare su 2-0, ma custa borta su portieri romanu non si fàghet cullionare.

S’iscuadra ghiada dae Mourinho no abarrat a castiare, e in duas ocasiones s’acòstiat a su parègiu. A su minutu 70 is grogu-rujos agatant su gol de s’1-1 cun unu corpu de conca de su difensore Ibanez chi istampat sa porta guardada dae su portieri Cragno.

A pustis de custa rete sa Roma est mere de su campu e pro su Casteddu est un’istragu mannu firmare is atacantes aversàrios, ma is meres de domo gherrant finas a s’ùrtimu cun mèritu.

Mancari sa gana dimustrada dae is òmines de Mazzarri, sa Roma marcat su 1-2, gratziàs a una punitzione bella a beru de su capitanu Pellegrini.

Isperamos pro sa partida benente chi su Casteddu diat a tennere prus bona sorte contra su Bologna a s’istàdiu Renato Dall’Ara.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22