Federica Pellegrini saludat s’ùrtima finale manna sua cun su risitu in is lavras.

At istratzadu su billete pro sa de chimbe finales olìmpicas consecutiva cun is ungras e cun is dentes, dimustrende torra de èssere una campionissa.

Nemos est resèssida a fàghere mègius issa – francu Michael Phelps in is 200 mariposa, in campu maschile – in s’ùrtima proa individuale de sa vida sua a Chimbe Chircos.

Sa “Divina” est calada in sa pischina de Tòkyo pro dare s’adiosu a is 200 metros lìberos chi sunt devènnidos dae su 2004 su regnu suo. Serrat a su de 7 postos (1’55”91), su mègius tempus istajonale suo, ma a bìnchere est istada s’australiana Ariarne Titmus, 20 annos, 13 de mancu de Fede, chi a pustis de s’oro in is 400 si pigat fintzas cuddu in is 4 pischinas (in 1’53”50, primadu olìmpicu). Sa medàllia de prata est andada a s’atleta de Hong Kong, Siobhan Haughey, 23 annos (1’53”92) e sa de brunzu a sa canadesa Penny Oleksiak, 21 annos (1’54”70).

Sa Pellegrini At fatu su chi boliat fàghre: èssere presente. At iscritu s’istòria in is 4 bartzas: una medàllia de prata (Atene 2004) e un’oro olìmpicu (Pechinu 2008), 4 tìtulos mundiales e 8 bias de fila de pare in su pòdiu continentale, su primadu de su mundu (1’52”98) conchistadu in su 2009.

E si concruit inoghe s’Olimpìade – garas individuales -: no at a partetzipare a sa gara de is 100 metros istile lìberu. Dd’at bòlidu meda custu ùrtimu “ballu” in pischina. Otenende su 15° e penùrtimu tempus in is baterias e su 7° subra de 8 pro is medàllias.

Alleghende de is possibilidades suas de vitòria fiat istada realista, narende chi su pòdiu pro issa fiat serradu, e s’obietivu realìsticu fiat partetzipare custa finale. Immoe d’abetat una vida sena su cumpàngiu suo dae cando fiat pitzinna: su nàdidu.

S’at a iscùdere a modde ma sa vida e a dd’abetare ddoe at a èssere s’amore. Bona vida a Federica Pellegrini e gràtzias pro totu su chi nos at regaladu in custos duos 20 annos.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Semper prus a probe s’òbrigu de su passaportu birde pro sos logos a arriscu de ammuntonamentu.

Difatis sa proposta at otentu su parre a favore de is presidentes de Regione. E cras su guvernu at a aprovare su decretu chi imponet fintzas s’òbligu de presentare, in zona bianca, sa tzertificatzione birde pro ispetàculos, biàgios e isport.

Ancora de definire si sa medida at a corpire sos ristorantes a su serradu, ma s’idea est cussa de prevìdere unu passaportu “lèbiu” pro chie at fatu una dose vatzinale ebbia, opuru su tampone negativu fatu in is ùrtimas 48 oras.

Custa diat èssere sa cunditzione indispensàbile pro cambiare is paràmetros chi mesurant sas zonas de arriscu e poderare totu s’Itàlia in zona bianca durante s’istiu.

In s’ora sa variante Delta de su virus sighit a s’ammanniare cun sos contàgios creschent ogni die, e su nùmeru de vatzinados aumentat a pagu meda.

Segundu is ùrtimos datos trasmìtidos dae s’Istitutu superiore de sanidade, cun is paràmetros de immoe unas cantas Regiones diant torrare in zona groga giai dae chenàbura. Sunt is àreas acanta su pesu de is contagiados noos est prus importante.

Cun su sistema nou custu indicadore no at a èssere prus fundamentale. A contare at a èssere prus che totu su nùmeru de ricoverados in àrea mèdica e in terapia intensiva. Su guvernu pensat a una pertzentuale de su 5% pro is terapias intensivas e de su 10% pro is repartos mèdicos. Is Regiones pedint de artziare custas pertzentuale a su 20 e a su 30 %. Sa cabina de regia cunvocada pro oe at a dèpere fissare su lìmite màssimu, e detzìdere sa lista de is logos acanta s’at a dèpere intrare cun su tzertificadu.

S’isetat sa detzisione de su guvernu, chi oe at a pònnere in s’elencu fintzas is trenos a percurrèntzia longa, is aeroplanos e sas naves.

S’òbrigu de su passaportu birde serbit a poderare abertas is atividades, ma fintzas a permìtere s’intrada de prus persones in is logos a su serradu. In is tzìnemas e in is teatros at a tocare a ddu presentare a s’intrada, ma no at a èssere indispensàbile a lassare postos bòidos tra un’ispetadore e s’àteru e is salas ant a pòdere èssere prenas totu.

In su mentres su tema in discussione in su guvernu est cussu de s’òbligu vatzinale in is iscolas. S’abetat su parre de su Comitadu tècnicu sientìficu.

Is presidentes de Regione isperant chi su guvernu racumandet sa vatzinatzione pro su personale iscolàsticu e universitàriu, siat dotzente siat tècnicu-amministrativu e mescamente chi, in casu orìgines pandèmicas in iscola, si fatzant sighire is letziones in presèntzia a su mancu a chie tenet su passaportu birde.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”