Jeff Bezos est torradu dae su biàgiu ispatziale.

Su milliardàriu fundadore de Amazon est decolladu dae su desertu de su Texas cun su veìculu New Shepard a merie e est torradu in sa Terra a pustis de unu cuartu de ora.

Sa missione, resèssida in manera perfeta, fiat cussa de fàghere su primu bolu suborbitale, superende sa lìnia de làcana tra s’atmosfera terrestre e s’ispàtziu.

Bezos cheret devènnere unu pionieri de su turismu ispatziale cun sa cumpangia sua Blue Origin.

Paris cun issu in intro de sa càssula Bezos, ddoe fiant is membros de s’echipàgiu e su frade Jeff, poi Wally Funk, 82 annos – sa primu fèmina devènnere ispetora de sa prus importante agèntzia americana chi règulat s’aviatzione tzivile e ex pilota chi in su 1969 fiat istada seletzionada pro fàghere parte de su programma Mercury 13 in su 1969 ma posca iscarrigada ca su guvernu federale aiat proibidu sas ispeditziones ispatziales a sas dèminas – e su pitzocu de 18 annos Oliver Daemen. Custos ùrtimos duos sunt devènnidos sa persone prus antziana e su prus giòvanu a andare in s’ispàtziu.

Pro su bolu no est istada seberada una data bastet chi siat: difatis est istada seberada sa die s’anniversàriu de s’allunàgiu de s’Apollo 11 de 52 annos a oe, e noe dies a pustis de su bolu de un’àteru imprendidore milliardàriu, su fundadore de sa Virgin Company Richard Branson chi s’11 de argiolas aiat fatu unu biàgiu sìmile cun sa Virgin Galactic.

Sa càssula est arribbada a un’artària de 106 chilòmetros (est a nàrrere 16 chilòmetros prus in artu respetu a su biàgiu fatu dae Branson) superende gasi sa lìnia de Karman: si tratat de sa chi benit reconnota comente sa làcana tra s’atmosfera terrestre e s’Ispàtziu.

Jeff Bezos e sos àteros tres cumpàngios de biàgiu ant fatu peri esperièntzia de bator minutos in ausèntzia de gravidade, ammirende de s’artu sa Terra dae is oblò de sa càssula.

A pustis de unu bolu duradu in totu 11 minutos, su New Sheperd at torradu a tocare sa terra terrestre. At a èssere un’àtera tapa cara a su progressu de s’umanidade? Pro como, bisos sos prètzios e sos costos, in pagos si dd’ant a pòdere permìtere.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Nues nieddas torrant a ameletzare is Olimpìades de Tokyo.

Giai si diant dèpere èssere fatas in s’istade 2020, ma pro more de su Covid-19 sunt istada istransidas a ocannu. Però immoe, comente at naradu su capu de su sótziu organizadore, nch’est s’arriscu chi cun s’aumentu de is cundiduras de custa pesta malaita, s’avenimentu isportivu prus importante de su mundu diat pòdere èssere cantzelladu a s’ùrtimu minutu.

Is faeddos de Toshiro Mutu, a pagos dies dae su cumentzu de is giogos a chimbe tzìrculos – su 23 de argiolas, ant fatu su giru de su Mundu e donant pensamentu. Difatis finas a pagu tempus a oe, mancari in Giapone fiant torrende a aumentare is cundiduras, is rapresentantes de su sótziu organizadore aiant garantidu chi non diant a èssere fatos àteros rinvios.

Immoe nch’est istadu custu càmbiu de positzione, chi est fàghendu cumprèndere chi in su Paisu asiàticu is cosas sunt andende male ca peus. In prus de s’àteru, agiumai totus is tzitadinos giaponesos – s’80% de sa populatzione – sunt contràrios a is Olimpìades.

Però, at a èssere difìtzile a beru chi ddoe siant àteros rinvios, pro duos motivos: pro ite is delegatziones de is 200 Paisos sunt giai lòmpidas e in prus sunt andende a in antis is cómpudos pro is atleta de 33 isport pro 50 disciplinas chi ant a partetzipare a is giogos finas a su 8 de austu.

Tzertu, chie at a èssere agatadu positivu a su Covid-19 nche at a pèrdere 4 annos de allenamentos e de sacrifìtzios.

Giai in custas dies calicunu atleta est resurtadu positivu e at a pòdere bìdere is garas in televisione ebbia, pròpiu comente ant a fàghere is amantiosos de is isport olìmpicos, sende chi no est permìtida s’intrada de su pùbblicu in is istàdios.

Sa rapresentativa de s’Itàlia at a proare a conchistare a su mancu 28 medàllias – comente cussas bìnchidas a Rio de Janeiro 2016 – ma no at a èssere aici fàtzile.

Duncas, chènabura amus a bìdere si is Olimpìades s’ant a fàghere e si is atletas, comente narat su ditzu nou de is giogos ant a tènnere sa possibilidade de mustrare a su mundu de andare “Prus a lestru, prus in artu, prus forte, in paris”.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”