Sa Federatzione italiana de su giogu de sa botza bolet torrare a cumintzare a giogare pro acabare s’istajone 2019-2020.

Is campionados suspéndidos pro more de s’emergentzia COVID-19 s’ant a tancare su 2 de austu. Custa sa detzisione de su presidente Figc, Gabriele Gravina, pustis sa reunione de is cumponentes de sa Federcalcio.

S’UEFA at lassadu iseberare a is federatziones e a is ligas natzionales totu is possibilidades pro fàghere concruire is campionados. S’ant a pòdere giogare is playoff pro decretare s’iscuadra chi at a bìnchere s’iscudetu.

Immoe sa “botza” – pro abarrare in tema – est passada a su Guvernu ca depet detzìdere cale sunt is tempos e is modos pro torrare a cumintzare is partidas de fùbalu.

Su Ministru de s’isport, Vincenzo Spadafora, immoe at a fàghere unu protocollu sanitàriu pro giogare is campionados a lestru.

Is àteras natziones europeas e ite ant detzisu de fàghere? Calicuna at cungiadu s’istajone, àteras sunt pro torrare a cumintzare is cumpetitziones de fùbalu.

In Germània sa Bundesliga torrat a partire su 9 de maju, si su Guvernu tedescu dd’at a permìtire. S’Ispagna imbetzes bolet fàghere is tampones sanitàrios a is giogadores sa chida benente, a in antis de cumintzare su campionadu.

Su presidente de su Coni, Giovanni Malagò, at naradu ca s’ùnica federatzione isportiva italiana chi est andada pro contu suo est istada sa Figc.

A pàrrere de Malago si depet fàghere unu pianu de séberu, si a bortas no si resessat a torrare a cumintzare a giogare.

Ca su chi contat de prus est sa salude, e tocat a fàghere giogare is garas de campionadu in seguresa.

Custu pro evitare chi s’ammalaident atletas, allenadores, dirigentes e is personas chi traballant in su mundu de su fùbalu – e is famìlias issoro -.

Chi is garas benentes de is campionados de sa Figc non s’ant a giogare? S’UEFA at detzisu ca ant a bàlere is classìficas de cando si sunt firmadas is cumpetitziones.

In Sèrie A, cun custa detzisione, sa Juventus at a tènnere sa possibilidade de s’agiudicare sa vitòria de s’iscudetu pro unu puntu a in antis de sa Lazio.

S’est arribados a custa detzisione a pustis de s’atopu intra Gianni Petrucci – presidente Fip -, Vincenzo Spadafora – ministru de s’isport – e Umberto Gandini – presidente Liga Basket -.

S’ùnica fiat a cungiare s’istajone, comente at afirmadu sa Federatzione italiana de basket.

S’Italia est bìvende un’emergentzia tràgica pro more de s’epidemia de su coronavirus, e pro mègius seguresa tocat a cantzellare is garas benentes de su campionadu.

S’est chircadu de sarvare su campionadu ‘19/’20, ma a sa fine s’est cumpresu ca no fiat possìbile.

Su prus de is giogadores istràngios sunt contoniados a is natziones insoro ma, a parte custu, custa detzisione s’est pigada pro contivigiare sa salude de totus.

Pro evitare chi s’ammalaidarent atletas, allenadores, dirigentes e is personas chi traballant in su mundu de su basket – e is famìlias insoro -.

Est una detzisione sàbia meda, chi at a serbire a evitare chi sa pesta de su coronavirus sigat a s’ispaianare.

Ca su basket est unu giogu de cuntatu, e non diat èssere istadu possìbile a fàghere disputare is garas de campionadu in seguresa in is zonas prus corpidas dae su COVID-19.

Est a bìdere immoe a chie at a èssere assignadu s’iscudetu de custa istajone. Sa detzisione finale at a tocare a sa Liga Basket e a is iscuadras de su campionadu natzionale.

Candu s’est firmada sa cumpetitzione sa classìfica a pustis de 21 partidas fiat custa: 1) Virtus Bologna 36 – 20 garas giogadas -, 2) Dinamo Tàtari 32, 3) Brescia e Milano 28, a fatu fatu is àteras iscuadras.

Tzertu chi su Bologna at a tènnere sa possibilidade de s’agiudicare sa vitòria de s’iscudetu, est una chistione segundària cunforma a cussa de istabilire chie sunt is falados de gradu de sa Sèrie A1, e chie is promóvidos de A2.

Is sardos de sa Dinamo Tàtari ant giogadu s’ùrtima partida ufitziale su 7 de martzu contra sa Roma foras de domo, bìnchende 93 a 88 puntos.

S’annu coladu puru s’iscuadra isolana fiat arribada segunda, perdende contra sa Reyer Venezia in sa finale de is playoff iscudetu.

Is tàtaresos, si totu at a andare bene, ant a torrare in campu in cabudanni pro giogare sa Super Copa italiana.

Pro su 2020 sunt istados suspéndidos fintzas àteros apuntamentos isportivos prus mannos, comente is Europeos de fùbalu e s’Olìmpiade de Tokyo.