Protzessu Grillo, derettu a sa sententzia intro de s’istiu.

Su protzessu chi biet comente accusadu Ciro Grillo, fizu de su fundadore de su Movimentu 5 isteddas Beppe Grillo, paris a tres amigos suos
genovesos est arrivande a s’accabu. Sos battoro zovanos sunt accusados de violentzia sessuale de ballumene a una istudiante italo-norvegesa,
chi diat aere patitu s’abbusu in s’istiu de su 2019 in Porto Cervo in Sardigna.

Pustis de unu protzessu de zudissiu longu e cumplessu, s’audentzia pius accurtza, est cunfirmada po su 24 de martzu in su Tribbunale de Tempio,
e at essere tennica. In custu logu, su zuighe Marco Contu e sa corte ant a istabilire su calendariu de sas concrusiones, chi prevedit
s’orassione de su Pubbricu Ministeru e de sos abocados de parte tzivile, sighidos dae sas orassiones de sa defensa. Custu momentu est importante meda po s’andamentu de su protzessu, chi diat podere concruire cun sa sententzia deffinitiva intro de s’istiu o a sos primos de atonzu.

In su mentres de s’urtima udientzia de frearzu, sa parte tzivile at presentadu memorias novas, una mossa chi at assupridu sa defensa. Unu de sos elementos pius chistionados de su protzessu est bistadu sa mancada testimonia de unu zovanu norvegesu naschidu in Nicaragua, consideradu unu testimonzu importante de sa defensa. Pustis de tres ausentzias una fattu de s’attera su tribbunale at detzisu de rinuntziare a sa testimonia sua.

Su protzessu at tentu unu corpu forte meda cun sos media fintzas dae s’incuminzu, siat po sa gravidade de sas accusas siat puitte in mesu bi
est su fizzu de una persona pubbrica importante meda. S’istudiante italo-norvegesa at semper nadu sa declaratzione sua de su chi est
sutzessu, mentres sos accusados ant semper nadu chi po sos appitzicos sunt bistados tottus de accordu.

In su mentres chi si est arrivande a sas concruidas e a sa sententzia, su pubbricu addurat in attesa de connoschere sa resessia de unu casu chi at pesadu meledas meda supra su tema de sa violentzia e de su cunsensu. Si sa cundenna diat essere cunfirmada, sos accusados diant arriscare penas graves.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Casteddu in difficultade: terza derrotta una fattu de s’attera e sa Cremonese si accurtziat.

Su Casteddu est bivinde unu mamentu complicadu meda.S’isquadra at perdidu po sa terza borta una fattu de s’attera e como sa classifica faghet un’attera borta frea. Sas atteras isquadras chi battagliant pro si salvare sunt recuberande puntos, e su vantazu de sos ruju e blau si est minimande semper de prus.

Su peus nuntzu est arrivadu dae Parma, inube sa Cremonese at binchidu.Cun custu risurtadu est arribada a solu tres puntos dae su Casteddu. Custu cheret narrere chi sa battalla po addurare in sa categoria est abberta de su tottu.

Sos numeros de sas urtimas partidas sunt negativos meda. In sas urtimas sette partidas, su Casteddu at leadu solu duos puntos. At perdidu chimbe bortas e pareggiadu duas. Est unu de sos peus risurtados intre sas isquadras chi chircant de si salvare. Eppuru, pagu tempus faghet, sa situsassione pariat divreassa meda: tres binchidas una fattu de s’attera aiant fattu isperare in d’unu finale de istajione prus tranchillu. Pustis de cussu mamentu positivu,peroe, s’isquadra si est frimmada. Fintzas sa sotziedade aiat leadu detzisiones pensande chi su peus esseret passadu, comente sa bendita de Luperto propriu a sa Cremonese, chi como est una cuncurrente diretta.

Sa classifica est ancora intzerta. Fintzas atteras isquadras si podent accostare o binchere su Casteddu. Sa Fiorentina diat podere andare a daenantis, mentres su Lecce podet tennere sos mattessi puntos. Tottu at a dipendere dae sos risurtados de sas partidas imbenientes prima de sa frimmada. Su mese de Aprile at essere importante meda. Su Casteddu at a deppere accomettare su Sassuolo in domo sua e pustis at a giogare in domo contra sa Cremonese. Sunt duas partidas de fundamentu pro cumprendere comente at andare a si accabbare s’istajone.

S’isquadra at a torrare a si allenare martis in Assemini, ma bi ant  essere medas ausentzias. Carchi giogadore est impignadu cun sa natzionale sua, comente Caprile e Palestra cun s’Italia. Fintzas Kilicsoy e Obert non bi ant a essere, gai comente Sulemana e fortzis Litetas, chi no est a su menzus. Unu nuntzu bonu arribat dae Borrelli, chi est recuberande e diat podere giogare dae s’incumintzu de sa prossima partida. Sa torrada sua est importante, pro itte su Casteddu at sinzadu pagu in sas urtimas partidas.

Como su Casteddu non podet prus isbagliare. Serbit una reatzione lestra pro evitare de finire in mesu de sos aggios. Sas partidas imbenientes ant a essere detzisivas pro si salvare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22