Ora legale 2025: cando si cambiat s’orariu e tottu cussu chi bi est de ischire.

Donz’annu, intre sa fine de Martzu e sa fine de Santu Aini, si ripitit unu classicu chi isphartit sa zente: su coladorzu dae s’ora solare a
cussa legale e su contrariu. Unu cambiamentu chi no passat mai turdinu, no solu pro itte fittat derettu supra su tempus de su sonnu de medas pessonas, ma fintzas pro itte fittat supra sos ritimos biologicos e supra sas abesadas de donzi die. Sa dibatta supra custu meccanismu est semper atzesu: bi est chie diat cherrere mantennere s’ora legale tottu s’annu e chie, invetzes sighit a narrere chi toccat de faghere comente si est semper fattu.

Su cambiu at essere su notte intre sapadu e dominiga de s’urtima chida de martzu, cando sas fretzas de sos relozos benint ispostadas un’ora a daenanti. Custu cheret narrere chi si dromit un’ora in mancu, ma si balanzat un’ora in pius de lughe naturale a su sero. Su protzessu contrariu at essere s’urtima chida de Santu Aini, cando si at a torrare a s’ora solare, recuberande s’ora de sonnu perdida in beranu.

S’ora legale est bistada introduida cun s’intentu printzipale de contipizare currente elettrica, isfruttande cantu pius si podet sa lughe de sa natura in sos meses pius cardos. Bell’ e gai, in sos urtimos annos, medas istudios ant pesadu dudas supra custu pensamentu. Una de sas bistas pius chistionadas de su cambiu de s’ora est su problema de sos ritimos circadianos, su relozu biologicu intro de su corpus chi regulat su sonnu e atteras funtziones de sa vida. Meda zente tenet istorbos de su sonnu, istracchesa, difficultade a si cuncentrare e attittidos de umore. In pius su cambiamentu creat problemas supra su tribagliu e sa rendida in iscola, mescamente in sos pitzinnos e in sos bachianeddos, chi intendent de pius sos problemas de su cambiu de orariu.

In sos urtimos annos, medas Istados ant chistionadu de che bogare su cambiu de s’ora. S’Unione Europea, po esempru, est chistionande de sa possibilidade de dassare su seperu a donzi istadu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Ozzastra terra de istoria: sos printzipales sitos archeologicos de bisitare intre nuraghes,biddas antigas e monumentos de sa tzivilidade nuragica.

S’Ozzastra est una de sas zuras de sa Sardigna prus riccas de istoria antiga. In cust’iscrocca si agattant sitos archeologicos meda chi contant sa vida de sas populassiones chi istaiant in s’isula mizza e mizza de annos faghet.

Intre montes, campedas e campagnas si podent biere nuraghes, tumbas de tzigantes, tumbas antigas irfossadas in sa rocca e restos de biddas. Bisitare custos logos est commente faghere unu biazu in su passadu e connoschere menzus s’istoria de sa Sardigna e de sas tzivilidades chi ant bividu s’isula prima de s’arrivu de sos romanos.

Unu de sos sitos prus connoschidos est su Nuraghe Ruinas, chi si agattat in s’iscrocca de Arzana. Custu nuraghe est unu de sos prus artos de sa Sardigna e si agattat in d’una posissione crara dae sa cale si podent biere sos montes de su Gennargentu. In s’iscrocca de Triei si agattat sa Tumba de sos Tzigantes de Osono, unu de sos monumentos de interru prus importantes de s’Ozzastra. Un’atteru situ interessante meda si agattat in s’iscrocca de Bari Sardo, inube bi est su Nuraghe Sellersu. In s’iscrocca de Cardedu si agattat invetzes sa Necropoli de Monte Arista, una zura in sa cale sunt bistadas agattadas tumbas meda irfossadas in sa rocca.

Intre sos sitos prus importantes de s’Ozzastra bi est fintzas su cumplessu archeologicu de s’Ortali’e su Monti, in s’iscrocca de Tortolì. Si trattat de unu de sos sitos prus bisitados de sa zura e accansat monumentos divressos intre sos cales unu nuraghe mannu, una tumba de sos tzigantes e restos de biddas antigas. Importante meda est fintzas su situ archeologicu de s’Arcu ‘ e is Forros, in s’iscrocca de Villagrande Strisaili. Custu logu fuit una bidda nuragica manna chi in passadu teniat fintzas unu rolu religiosu e de negossiu. Sos archeologos ant agattadu restos de cresias, magasinos e buttegas po tribagliare sos metallos.

S’Ozzastra est duncas un terra ricca de testimonzas archeologicas chi permittint de iscoperrere s’istoria prus antiga de sa Sardigna. Sos nuraghes, sas tumbas e sas biddas antigas sunt unu patrimoniu pretziosu meda chi contat s’issida de s’isula. Bisitare custos logos cheret narrere connoschere menzus su tempus passadu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22