Disaura in Casteddu: sa cropa morta in Cala Fighera, cunfirmada sa rutta atzidentale.

Una prenetta dolorosa est bistadu su motivu de sa morte de Paolo Durzu, 33 annos, e Manola Mascia, 29 annos, sos corpus de sos cales sunt bistados acciappados a duos dies unu dae s’atteru in su roccarzu de Cala Fighera, in sa punta accisante ma frunca de sa Sedda de su Diaulu in Casteddu. Sa lotomia fatta dae su duttore legale at cunfirmadu chi ambos ant perdidu sa vida po sa rutta atzidentale dae su roccarzu chi est in manera particulare periculosa e istabbile.

Sa lotomia, durada chimbe oras, at iscobiatu chi sas iscanniduras chi ant tentu Paolo Durzu e Manola Mascia sunt assotziabiles cun d’unu bolu de parizzos metros dae su roccarzu. Segaduras medas e graves fertas intro de sos corpos cunfirmant chi sa morte est abbennida po more de s’iscutta supra sas roccas e s’abba. Secundu cantu cunfirmant sas primas ideas, sa cropa diat podere essere rutta su sero de martis o su manzanu de merculis passadu.

Sos aberguadores escluidint de sicuru chi si  siant bocchidos o chi eppant brigadu intre issos: sos duos zovanos funt una cropa chi andaiat de accordu, connoschida e bene creffida dae amigos e familiares. S’Isquadra Mobile de Casteddu, cordinada dae Davide Carboni, est sighinde a iscudrignare po chircare de connoschere donzi momentu de sas urtimas oras de vida de Paolo e Manola. Un’abettu importante est su motivu po su cale si acciappaiant in d’unu logu gai periculosu e in su cale fit proibbidu de passare. Si pensat chi esserent arrivados in cussu  logu po una passizzada a sero non connoschinde sos arriscos mannos de smuronamentos e ruttas de su terrinu.

Sas autoridades sunt controllande sas friguras de sas telecameras de sa custodia po chircare de assebestare su momentu pretzisu in su cale sa cropa est arrivada e si bi siant bistados testimonzos de sa presentzia insoro.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

“Sindacopoli”, assolutzione de su tottu in Appellu: derruet su casteddu de accusas.

Una bortada istallida torrat a iscriere s’istoria de su protzessu “Sindacopoli”,chi in sos urtimos annos aiat iscuttinadu sa Sardigna, creande suspettos e condierras supra unu presumibbile intritzu de piagheres intre politica, amministrassione pubbrica e mundu de sas dittas. Sa Corte de Appellu de Casteddu at assolvidu tottu sos accusados, bortulande de su tottu sa sententzia de primu gradu chi aiat bogadu a fora su Tribbunale de Aristanis

Sos zuighes sunt bistados craros meda: “ Su fattu non bi est bistadu”. Sa detzisione sinzat unu cambiu de linea importante in cunfrontu a sa prima sententzia, chi aiat dadu penas pesantes meda po meda casos de piagheres ligados a porfias de appaltos,afficos e disignos pubbricos. A su tzentru de sas accusas, unu sistema presumidu de pretzebbos e piagheres chi diat aere interessadu amministradores locales, tennicos e meres de dittas chi tribagliaiant in medas comunes de sa Barbagia.

Assolutzione prena po tottu sos printzipales imputados de su protzessu. Sarbadore Pinna, inzenieri e mere de sa Essepi Engineering, in primu gradu fuit bistadu cundennadu a 7 annos e 6 meses po duos casos de piagheres. Cun issu, sunt bistados assoltos puru Rinaldo Arangino, ex sindigu de Belvì, a su cale aiant dadu 6 annos de presone, e Pier Paolo Sau, ex sindigu de Tonara, chi aiat tentu una cundenna a 4 annos e 3 meses.

Sa Corte at puru decraradu chi fuit passadu tempus meda po un’attera accusa chi interessaiat Pinna, Arangino e Pedru Crobu, ex vicesindigu de Ortueri, issu puru cundennadu  in primu gradu a 4 annos e 3 meses. S’apparitzu de sa sententzia est bistadu retzidu cun assulenu e suddisfassione dae sas defensas, chi dae tempus meda cuntestaiant sas accusas deffinindelas “ chidrinas e brivas de proas”. Cun sa pronuntzia de sa Corte de Appellu, su protzessu si serrat cun nudda de fattu po s’accusa, chi invetzes aiat contadu una retza ordiminzada bene de barattu de piagheres.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22