Novas feas arrivant dae su columune de Nugoro: sa candidadura commente Gabbale Italiana de sa Cultura, chi pariat essere un’occasione tzerta po sa tzittade, est bistada juigada “indeghile”. Custa detzisione est bistada leada dae Roberto Del Rio, dirigente de su Turismu e cultura de su columene de Nugoro, chi at bocadu a campu sa determina 3195, accrarande s’arrenuntzia.

In sa determina, Del Rio evidentziat commente su seperu dipendat “dae unu cunsideru pretzisu de sas occasiones” e de s’azzertamentu chi, fintzas a oe, nissunu culumene chi tenet unu commissariu istravanadu at mai partetzipadu a su bandu po divennere Gabbale Italiana de sa Cultura.

Sa situassione est cumplicada pro itte Nugoro est commo ghiada dae unu commissariu istravanadu, Giuanne Pirisi, numenadu su 12 de lampadas de cust’annu pustis chi fit bistadu illascadu su cunsizzu columale. Custa condissione at frimmadu custa initziativa ambitziosa, pro itte si pensat chi unu columene in custas cundissiones de amministrassione non potat espressare in manera cufforme una candidadura gai de grandesa.

S’incarrigu po preparare sos documentos de sa candidadura fit bistadu assinzadu a sa sotziedade casteddaja Poliste SRL, cun d’unu cuntrattu chi teniat unu gabbale de 48.000 euros. Bell’e gai, po su motivu de sa rinunzia a sa candidadura, solu una parte de custu dinari at essere dada a sa Poliste po sos servitzios giai fattos. Custu cheret narrere chi su s’ispesa fatta dae su Columene po preparare sos documentos chi serbint no at essere perdida de su tottu, ma at essere minimada cunfrontandela cun su tribagliu fattu fintzas a commo.

S’idea de candidare Nugoro commente Gabbale Italiana de sa Cultura non fit una novidade. Giai in su 2020, difattis, su Columene fit resessidu a si ponnere in mesu de sas deghe tzittades chi cheriant binchere su titulu de grandesa.Custu risurtadu, mancari no appat fattu binchere, aiat mustradu chi Nugoro podiat isperare de tennere unu rolu importante in sa bista culturale natzionale.

Sa rinunzia fortzada po sas ambitziones culturales de sa tzittade. Sa candidadura a Gabbale Italiana de sa Cultura podiat essere un’occasione uniga po faghere connoschere Nugoro, no solu dae su puntu de bista culturale, ma fintzas turisticu e de s’accolomia.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Inciassados in Dubai supra sa Msc Euribia: fintzas casteddajos intre sos passizeris chi isettant de torrare.

Sunt firmos in su portu de Dubai, supra sa Msc Euribia, pustis de sa frimmada de repente a sa tramuda a banda de Doha, aereoportu dae su cale deppiant leare su bolu po torrare in Italia. Intre sos passezeris bi sunt fintzas duas truppas de casteddajos: unu de sette pessonas e un’atteru de battoro-chimbe turistas. S’arribbu insoro si prevediat oe a Casteddu-Elmas, ma s’aggravamentu de sa situassione in Mediu Oriente at fattu brincare donzi programma.

In sas urtimas oras sa zura de su Gulfu est bistada interessada dae de bottu dae un’escalation militare chi at interessadu medat attores regionales, cun boleos de missiles, attaccos punnados e unu affortigamentu de sos sistemas de defensa aerea. Sa serrada partziale de sa zura aerea in carchi zura istrategica intre sa cale fintzas su Qatar, at custrintu parizzas cumpanzias a suspendere o cansare sos bolos, cun d’unu effettu domino supra sos cullegamentos internatzionales. Fintzas sas tramudas de sos crocieristas a sa banda de Doha sunt bistados iscancellados po motivos de siguresa, dassande sa nave frimma in Dubai.

A sos passezeris no est bistadu permittidu de s’ istesiare dae su terminal de su portu e, a custu mamentu, non sunt arrivadas comunicatziones deffinitivas supra sos tempos de torrada. Custu manzanu carchi crocierista at contadu de aere intesu attesu su sderroccu de iscoppiu, cosa chi at alimentadu sa timoria supra sa nave. Sas autoridades locales ant cunfirmadu sa balidia de sos sistemas de defensa chi diffendent sa zura de Dubai.

Cun sa colada de sas oras accreschet s’anneu e sa tesone, mescamente intre chie tenet abbojas perdidas o impignos urgentes in Italia. Carchi passezeri diat essere baludande de si movere po contu suo, comente arrivare in Oman e tentare unu bolu dae inie a s’Europa, ma si tratta de supposissiones cumplicadas e no privas de problemas- Medas preferrint isettare s’uffitzialidade e sa possibbile ordimizzassione de unu pianu
po torrare, cordinadu dae sa Farnesina.

In su mentres sa nave addurat unu puntu de relata e benit cussiderada comente unu logu siguru in cunfrontu a sa dudesa de fora.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22