Claudio Denzi, presidente de s’Assotziu operadores navales Nord-Est Sardigna, at fattu una proposta chi est faghinde discutire, attirande s’attentzione supra unu tema importante meda po su tempus benidore de sas isulas de Sa Madalena: sa protessione de su suo sistema biologicu delicadu.

Secundu Denzi, po preservare sa bellesa e s’interesa de custas plajas inidas, si diat teppere coffuzire s’intrada solu nadande, proibbinde a sos bisitadores de che leare calesisiat oggettu, escludinde su costumene de bagnu. Custa proposta, chi paret detzisa, naschet dae sa preoccupassione chi est creschinde po s’effettu negativu de su turismu de massa supra un’ambiente gai delicadu e pretziosu.

Sa bisione de Denzi est crara: minimare meda s’imprenta umana supra sas plajas de Sa Madalena, chi sunt sas pius bellas e puriles de su Mediterraneu. S’idea de minimare s’intrada solu a sas pessonas chi sunt dispostas a andare a sas plajas nadande est puntada a preservare, no solu sa rena, chi arriscat de che essere bogada dae chie che leat assugamanos, bussas e atteras cosas, ma fintzas su prantamine de sa costa, chi ispissu benit abbattigada chentza chi sos turistas si nde rendant contu.

In pius, custa mesura tiat serbire po iscansare addobios cun sos animales de su logu, chi tiant podere essere ammuinados dae sa presentzia de medas pessonas e dae sos trajos insoro chi, no semper rispettant s’ambiente. Denzi non si frimmat cun custa proposta.Su presidente de s’Assotziu navale at espressadu critigas meda in su cunfruntu de su modellu turisticu chi bi est como, chi issu considerat debile po unu tempus longu meda.S’arribbu de medas bisitadores, paritzos de sos cales no connoschent sas conseguentzias de su chi faghent, est guastande in manera a sa cale non si podet ponnere rimediu un’ ecosistema chi est giai debile.

Denzi evidentziat commente sa frazadura de sas plajas, caminare supra de sos coronzos de rena e s’ammuinu de sos animales sunt problemas semper pius graves, chi dimandant unu cambiu lestru. Sa proposta sua, po cantu pottat essere cunsiderada una intriscada, bogat a campu una dibatta netzessaria supra commente toccat de torrare a pensare e torrare a ordiminzare su turismu in sos logos chi sunt diligos po s’ecologia.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Iscoperta una necropoli in su Nord Sardignain su mentres de sos tribaglios po un’approntu solare.

Un’iscoperta archeologica importante meda est bistada fatta in su Nord Sardigna in su mentres de tribaglios ligados a sa produssione de energia pulida. In sa zura industriale de truncu Reale-Sant’Agostino, accanta a Tattari,sos iscavos de ammaniada pro fraigare un’approntu solare ant fattu bessire a pizu una necropoli chi fintzas a oe non fuit bistada mai iscoperta.

S’accattu est sutzessu in sa zura curada dae su Consorziu Industriale de Tattari. Sos iscavos sunt incumintzados in su mese de martu de su 2024, cando sunt bistados cunviados sos controllos de su terrinu prima de fraigare s’impiantu. In su mentres de custos controllos sos archeologos ant acciappidu istrutturas sutta de terra e, sighinde cun sos iscavos, ant cumpresu chi si trattaiat de unu logu antigu de tumba.

Secundu su chi pensant sos espertos, su logu est importante meda po s’istoria e s’iscentzia. In sa zura sunt bistadas agattadas tres tumbas mannas iscavadas in sa rocca, istrutturas mannas chi faghent pensare a tumbas de balore mannu po sas populatziones chi biviant in custa zura in s’antichidade. S’iscoperta est fintzas prus interessante pro sa presentzia de decorassiones fittadas supra sas barras’e muru de sas tumbas. Si trattat de signos e pintas fittados in sa rocca in sos seculos passados. Custa fittadas faghiant parte de su connottu de sos interros de sas populatziones antigas de sa Sardigna e a s’ispissu teniant unu signifficu simbolicu o religiosu.

Po sos istudiosos custos elementos sunt importantes meda pro itte podent azzuare a cumprendere menzus comente biviant sas comunidades de su tempus passadu e cale esserant sas credentzias insoro. Sas tumbas e sas decorassiones diant podere dare novas supra su connottu, sa cultura e sa vida de sas pessonas chi biviant in s’iscrocca tattaresa mizza e mizza de annos faghet.

Sos archeologos ant a sighire a istudiare sa zura e analizzare tottu su chi est bistadu acciappidu in su mentres de sos iscavos. Donzi particulare novu diat podere accreschere sas informatziones chi serbint pro fraigare s’istoria de su logu. Custa iscoperta mustrat un’attera borta cantu sa Sardigna siat ricca de testimonzas de su passadu. Fintzas in su mentres de tribaglios modernos, comente cussos ligados a sa produssione de energia, podet capitare de acciappare andalas de tziviltades antigas meda chi contant s’istoria longa de s’isula.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22