Allegria manna meda po s’Italia e, in manera particulare po sa Sardigna:
Marta Maggetti, sa windsurfista casteddaja prena de talentu, at binchidu
sa medalla de oro a sas Olimpiades in su windsurf de sas feminas. Custa
binchida istravanada arribat pustis de annos de tribagliu tostu meda,
passione e dedissione.
Marta Maggetti, 28 annos, at mustradu a tottus s’abilidade e sa
determina sua in sas abbas de Marsiglia, inue ant fattu sas garas olimpicas
de sa vela.
Sa proa sua est bistada perfetta, e at binchidu atletas de livellu artu
meda.
Sa vinta de Marta non est bistada solu unu triunfu de sa pessona sua, ma
puru una testimonia importante de su talentu suo e de s’eccellentzia de
sos atletas italianos ina sa bista internatzionale de su windsurf. Giai dae
cando fit pitticca, Marta aiat mustradu una passione manna po
cust’isport, creschinde in sas costas prenas de bentu de sa Sardigna, chi li
ant apparadu su terrinu perfettu po si allenare e isfroscare sas
capatzidades suas.
Su percursu de Marta Maggetti in su mundu de su windsurf est bistadu
marcadu dae medas sutzessos e riconnoschimentos. Giai in sas classes
zovaniles, aiat fattu faeddare de issa binchinde sos campionados
natzionales e internatzionales. Sa creschida custante sua che l’at leada a
partetzipare po s’Italia in medas garas europeas e de su mundu, faghinde
esperientzia e fraigande una fama forte commente una de sas menzus
windsurfiste de s’ingendra sua.
Sa gara olimpica de Marsiglia est bistada una dimustratzione de linia,
resistentzia e abilidade tecnica. Marta at ischidu leggere bene meda sas
conditziones de su bentu e de su mare, manteninde semper su controllu e
sa cuncentratzione.Sa determina sua li at permittidu de accomettare e

binchere sas porfias de sas chi l’ant cuntrastada, donande a s’Italia una
istorica medalla de oro.
Su triunfu de Marta Maggetti est bistadu accollidu cun galabera meda in
tottu s’Italia. Sos media natzionales ant tzelebradu sa binchida sua,
mentres supra de sos social network bi sunt bistados paritzos nuntzos de
norobbonas dae sos tiffosos, amigos, cumpanzos e zente importante de
su mundu de s’isport. In Casteddu, tzittade in sa cale est naschida, ant
ordiminzadu affestamentos in onore suo, cun abbenimentos e
manifestassiones a sas cales at partetzipadu tottu sa tzittade.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa Sardigna s’impignat contra sa cuncentrassione de sos 41-bis in s’isula.

Sa Sardigna si ammaniat a un’impignu populare contra sa detzisione de su Guvernu de destinare a s’isula tres de sas sette presones italianas riservadas solu a sa manera de su 41-bis, cussos de Uta, Bancali e Badu e’ Carros. Unu seperu chi at azzesu su cunfrontu politicu e istitutzionale e chi benit cussideradu irmasionadu in cunfrontu a su restu de s’iscrocca natzionale.

Sa bogada a campu si prevedit po sapadu 28 de frearzu in Casteddu. A la poderare est sa presidente de sa Regione Alessandra Todde impare a sos sindigos de sas iscroccas interessadas, assotzios e tzittadinos.S’initziativa si presentat comente un’appellu mannu e rucradittu chi puntat a binchere sas pertoccas politicas e ponnere impare tottu sa comunidade sarda.

A su tzentru de sa cuntestassione non bi est sa lutta a sa criminalidade ordiminzada ne sa balididade de su 41-bis. Sa critica est po s’ispartidura de sas presones de massima sicuresa supra s’iscrocca natzionale. Secundu sa Regione, assinzare a sa Sardigna casi sa metade de sas presones chi si prenettant est una detzisione demasiada, leada chentza unu cunfrontu de faghere prima e chentza una balutazione pubbrica de sos corpos sotziales, accolomicos e de s’iscrocca.

In su documentu, ispartu dae s’amministratzione regionale si evidentziat chi pustis de deghinas de annos sinzados dae su pesu de sas teracchias militares, s’isula arriscat de deppere accomettare cussa chi benit deffinida sa teracchia nova de sas presones. Un’afficcu chi, secundu sos chi ant ordiminzadu s’initziativa, diat podere gravare supra iscroccas giai debiles.

Un’atteru elementu de affuscu est po su possibile tramudu de sos presoneris sardos in su Continente, creande problemas a sas familias e a sos ligamenes affettivos. Sa Presidente Todde aiat giai espressadu a su Ministru Nordio s’arrealia de sa Regione nande chi sa Sardigna non si podet revertire in sa Cayenna de s’Italia. Sa detzisione ets bistada pustis formalizzada in su mese de Nadale in sa cunferentzia Istadu-Regiones, coladorzu chi secundu s’amministratzione regionale non
diat aere rispettadu de su tottu su printzipiu de leale collaborassione chi est prenattadu po sas autonomias ispetziales.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22