Pustis de s’esperientzia a su Rayo Vallecano e su sorbimentu de su cuntrattu cun s’Avezzano, Cristian Totti at dezisu de si unire a su Terranoa, isquadra allenada dae su Campione de su mundu Marco Amelia. Su zovanu tzentrucampista, fizzu de sa contassia de sa Roma Francesco Totti, at a bestire sa camisa de su club gadduresu.

Cristian Totti, naschidu in su 2005, at tentu una creschida in su fubbalu chi l’at bidu colare in sas isquadras importantes de sos zovanos de sa Roma e su Frosinone, innantis de arribare in Ispagna po un’esperientzia de formassione cun su Rayo Vallecano. Dae pagu tempus aiat firmadu cun s’Avezzano, un’isquadra de sa serie D, ma at seperadu de sorbere su cuntrattu pro itte at tentu sa possbilidade de tribagliare cun Marco Amelia, chi est bistadu portieri de sa naztionale italiana e chi est amicu de familla.

Su Terranos, pustis de una istagione diffitzile chi est finida cun sa calada dae sa serie C a sa serie D, est chircande de si ordiminzare po alcansare menzus su pius accurtzu campionadu de serie D. Su cuntrattu cun Marco Amelia, commente allenadore at giai azzesu sas isperantzias de sos tiffosos, ma est s’arribu de Cristian Totti chi che faghet pigare sa galabera.

Sa zovana promissa de su fubbalu italianu battit cun issu non solu sa grandesa de su sambenadu, ma fintzas unu talentu chi medas chi cumprendent de fubbalu pensant chi potat bessire a pizzu in su tempus benidore.

Su seperu de Cristian Totti de si ligare cun su Terranoa, no est solu unu passu importante meda po sa carriera sua, ma puru unu sinzale de sacunfiantza chi su zovanu tenet in su disignu tecnicu de Amelia. S’ex
portieri, cun s’esperientzia e sa bisione sua de su giogu, at essere unu mastru pretziosu po Totti, azzuandelu a isfroscare sas abilidades suas e a si’inficchire menzus in s’isquadra.

Po sos tiffosos de su Terranoa, s’arrivu de Cristian Totti est commente s’arrivu de aera frisca e una promissa po su tempus benidore. Sa sotziedade isperat chi su zovanu tzentrucampista potat dare unu contribbudu de signifficu a s’isquadra, siat commente prestassione in su campu chi commente ispiritu de isquadra. Sa galabera chi at battidu su
cuntrattu cun Totti, si podet toccare cun sas manos, e sa comunidade locale si est preparande a accollire su zovanu cun corfidu e afficu artos meda.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

At binchidu sos duos miliones de bisualissassiones su video pubbricadu supra sos canales social uffitziales de ExpoItalia e dedicadu a sos Zigantes de Mont’e Prama, interpretes de sa partetzipassione italiana a s’Expo 2025 de Osaka. Unu sutzessu chi cunfirmat s’interessu internatzionale mannu po custos istravanados testimonzos de s’antiga tzivilidade nuragica.

Sas istatuas, presentes in Giappone cun battoro copias in 3D, in mesu de sas cales sas conas Efis e Gherreri, che sunt bistadas leadas a Osaka gratzias a s’interessamentu de sa Fundatzione Mont’e Prama, chi at curadu donzi partigulare de su disignu apparadu. “ Unu elementu chi testimonzat s’attentzione internatzionale manna po custa importante testimonia de s’istoria”, at nadu Mario Vattani,cummissariu istravanadu po s’Expo.

Po Antony Muroni, presidente de sa Fundatzione Mont’e Prama, est unu risurtadu desampladu, fruttu de una cooperassione forte intre istitussiones e cultura. “Sos Zigantes sunt su coro chi toccheddat de un’esperientzia chi tzelebrat su faeddu intre passadu e tempus de oe”, at nadu. Muroni at puru ammentadu comente, cun dinari propriu, sa Fundatzione eppat assiguradu fintzas s’ispeditzione de sas pedras sonantes de Pinuccio Sciola, issas puru in mustra in Osaka e accasazzadas cun interessu mannu dae su pubbricu.

Sa partetzipassione de sa Fundatzione Mont’e Prama a s’Expo faghet parte de unu disignu de tres annos partidu in su mese de nadale de su 2024 in s’ambasciada italiana de Tokyo e finantziadu de su tottu dae sa Fundatzione de Sardigna. Su caminu culturale at andare a daenanti fintzas a su 2026, cun s’intentu ambitziosu meda de che leare sos Zigantes in d’una de sas pius de archida realtades museales  de Tokyo.

Galabera e partetzipassione ant marcadu fintzas s’abbenimentu accasazzadu in “Domo Sardigna”, in su mentres de sa serana dedicada a s’iscrocca e sas dittas de s’isula.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22