Sa Sardigna at dae pagu attiradu s’attentzione de sa gasettera Laura Rysman, chi at dedicadu un’articulu longu a sa terra nostra po un’archida testera americana. Dae sos contos particulares, bessit a pizu in manera clara cantu siat bistada accisada e corpida dae sa bellesa e ricchesa culturale de s’isula, iscopertas in su mentres de su tribagliu de chirca po su petzu suo.

“ Fimmos imbitzados a nos cunsiderare rusticos, isolados in cust’isula arretrada” at nadu Venturino Vargiu, un’istoricu laicu locale, in su mentres de s’originale ispettaculu de donz’annu de costumenes populares de sa tzittade de sant’Efis. Ma sos sardos sunt incumintzande a cumprendere chi sa cultura nostra tenet unu valore reale po nois e po sos istranzos.

In Casteddu, custu rennovadu sensu de identidade si bogat a pizu cun d’unu isviluppu urbanu derettu a su turismu. Su cuarteri Marina, unu tempus de sos piscadores, oe est unu pipirudu mix de zente chi benit dae fora e zente chi b’istat dae meda tempus. Inoghe, s’architetto Boeri at disignadu una passizzada chi at a divennere unu parcu abborboradu accanta a su mare.

In pius, sunt fraigande sa linia de sa metropolitana lizera chi a gameddare sa Marina cun sa parte interna de Casteddu, e unu portu nou, chi si prevedid po su 2026, che at a istesiare sas naves de crociera pius attesu, permittinde puru a sos Yacht de arribare a su tzentru de sa tzittade, battinde opportunidades novas po s’accolomia.
Custu isviluppu de su turismu, bell’e gai, pesat dimandas supra su tempus benidore de sa regione. Po Casteddu e su mesudie, un’aundada de turismu podet essere una distrussione oppuru un’acchittu po una regione chi tenet pagas opportunidades. S’istoria de sa Costa Ismeralda, in su nord de sa Sardigna, chi est divennida unu logu po riccos, est unu ammunimentu e simbulu de commente su turismu potat cambiare s’iscrocca.

S’articulu de Rysman non si firmat in Casteddu, sa gasettera no che leat a iscoperrere atteros logos accisantes de s’isula commente Gergei,Barumini, su giardinu de sas pedras chi sonant de Sciola, Molentargius e Piscinas. Custos logos, riccos de istoria, arte e natura, sunt su coro chi toccheddat de una Sardigna si cheret mustrare a su mundu
chentza perdere sa berterera sua.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

S’Alighera-Firenze, partit su bolu novu de Volotea: pius de 5.000 postos po s’istiu.

Dominiga 6 de triulas at marcadu s’incumintzu de su collegamentu novu intre s’Alighera e Firenze, fattu dae Volotea, una novidade chi arricchit s’offerta de bolos dae e po su Nord Sardigna. Su servitziu at essere disponibile duas bortas a chida, cun tuccadas donzi merculis e dominiga, offerrinde a sos biazadores pius de 5.000 postos chi ant essere bendidos po tottu s’istagione de s’istiu. Custa tratta nova s’inferchit in d’unu cuntestu de attentzione forte assa parte de s’accreschimentu de s’aggianghimentu de s’isula, in manera particulare po favoressere s’intrada de turistas italianos e istranzos assa parte de una de sas destinatziones de s’isula pius appretziadas po su turismu de mare, culturale e de sa nadura.

Sa cumpanzia aerea evidentziat comente custu caminu siat bistadu pensadu po agguantare su turismu chi arribat assa parte de su Nord Sardigna, una zura ricca de bellesas nadurales a attrassiones istoricas. S’intentu est cussu de apparare a sos biazadores un’opportunidade bera po seperare s’Alighera comente logu po s’istiu, gratzias a sa cumbinada intre mare cristallinu, bistas innidas e unu patrimoniu culturale de balore mannu.

A su mattessi tempus, su collegamentu est una novidade importante puru po chie partit dae s’Alighera, accreschinde sas possibilidades de biazu cun bolos direttos po Firenze, tzittade de arte intre sas pius amadas e bisitadas de s’Italia, famada po s’istoria sua, s’architettura de su Rinaschimentu e sos museos de fama mondiale.

Su trettu novu cunfirmat su pianu de isviluppu de Volotea supra de s’Alighera, chi po su 2025 prevedit in tottu chimbe collegamentos derettos.Addià de Firenze, novidade assoluda de cust’annu, sa cumpanzia sighit a apparare bolos po Torino e Verona, duas importantes tzittades de su Nord Italia, gai comente duas destinatzione frantzesas, Parigi Orly e Bordeaux, ambas duas affiladas propriu in su 2025.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22