Unu abbenimentu de violentzia grave meda at bantzicadu s’ispidale Brotzu de Casteddu. Duas operadoras sanidarias de sa setzione de Neurologia, impignadas in su tribagliu insoro a de notte, sunt bistadas affraccadas in manera ifferiada dae sa muzzere de un’omine chi fit mortu dae pagu tempus.

Sa femina, arrenegada meda, est bintrada intro de s’istantzia inue bi fit su corpu de su maridu, isfogande s’arrenegu sou cun violentzia meda supra de sas duas operadoras sanidarias. Custas urtimas sunt bistadas corpadas e amminettadas de morte dae sa femina, chi aiat perdidu de su tottu su compudu de sa situassione.

Murracino, responsabbile de sa Regione de Nursing Up Sardigna, at espressadu indignassione meda po cantu est capitadu, deffinindelu un’atteru attu de violentzia grave meda contra sos operadores sanidarios. Murracino at evidentziadu chi sas duas operadoras sanidarias non ant tentu solu dannos fisigos, ma puru dannos mentales, po s’affraccu chi ant tentu. Su personale sanidariu est intervennidu in presse meda po azzudare sas cumpanzas fertas, mentres sa politzia at provvididu a faghere torrare sa calma e che istesiare sa femina dae s’istantzia, mancari custa epperet amminettadu de torrare armada.

Sas duas operadoras sanidarias pius a tardu che sunt bistadas leadas a su prontu Succursu, inube sos duttores ant controlladu sos dannos chi aiant tentu, fisigos e mentales. Su sindacadu Nursin Up at esprasessadu accottu prenu a sas chi sunt bistadas affraccadas e at appelladu sas autoridades, dimandande chi benzant pigadas in presse mesuras po garantire sa sicuresa de sos operadores chi sunt tribagliande.

Su sindacadu at dimandadu puru a sa Direzione Aziendale, a sa Regione Sardigna e a s’uffitziu de Guvernu de si interessare a sa lestra po faghere in manera chi cosas commente cussas non torrent a capitare, bidu chi sunt capitande semper de pius e non si podent atzettare in d’unu logu de tribagliu chi est giai istraccante meda. At evidentziadu chi sa situatzione in sos ispidales est divennida insupportabbile, cun d’unu aumentu chi affroscat meda de affraccas a su personale, duttores e operadores sanidarios.

At evidentziadu puru s’importantzia de dare azzudu mentale a sos chi ant tentu dannos dae custos abbenimentos e de creare unu logu de tribagliu siguru, inue sos chi tribagliant in sa sanidade lu potant faghere chentza timmere nudda.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

S’iscola sarda si preparat a bivere un’annu iscolasticu riccu meda de novidades, cun s’arrivu de 1.400 mastros novos intro de su mese de Nadale 2024. Un’innietzione de fortzas friscas chi at affortigare meda s’istruttura de sas iscolas de s’Isula, rispondinde gai a sas esigentzias de firmesa e calidade de su métodu.

De custos, 893 mastros ant arrivare gratzias a sos cuncursos finantziados dae su PNRR, chi si sunt concruinde propriu in custos meses. Su PNRR si cunfirmat unu pilotto de fundamentu po s’ annoamentu de su sistema iscolasticu italianu, e sa Sardigna non faghet eccessione. Intro de su 10 de Nadale 2024, difattis, si prevedid s’assuntzione de 893 mastros chi ant binchidu sos cuncursos finantziados dae su PNRR.

Custos mastros novos ant a leare servitziu giai in su mentres de s’annu iscolasticu 2024/2025, contribbuinde a minimare su problema cronigu de personale e garantinde unu mezoru in sa calidade de s’insinzamentu. Sas ammissiones a rolu tiant podere giughere su numeru totale de sos mastros novos a tempus deffinitivu po cust’annu, fintzas a 1.392 unidades, una tzifra chi mustrat un’aumentu mannu in cunfrontu a sos annos passados.

In pius de sos mastros assuntados a tempus deffinitivu, bi ant essere puru 104 cuntrattos a tempus subrasseidu, chi si tiant podere trasformare in rolos firmos cando at a finire s’annu de proa. Custos cuntrattos ant essere
fattos pius che atteru po sos mastros de accottu, una figura de sa cale bi est semper pius dimanda in sas iscolas sardas e chi, gratzias a custas assuntadas novas, at a biere s’insertu de 168 mastros novos cualifficados.

Custu affortimentu de s’istruttura de accottu est unu passu de fundamentu po garantire un’assistentzia cufformada a sos dischentes chi tenent bisonzu de s’educassione ispetziales e mezorare s’inscluisione in s’iscola. Non solu su PNRR, ma puru sos cuncursos fattos prima ant a contribbuire a accreschere su numeru de sos mastros. Intro de su 2024 ant essere assuntados, cun incumintzu dae su primu de capudanni 2024 e leande servitziu dae su primu de capudanni 2025, sos chi ant binchidu su cuncursu de su 2020.

Custu giru novu de assuntadas si at a faghere supra postos in pius autorizados po faghere bintrare in rolu e supra possibile postos francos dassados dae chie at renuntziadu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22