Claudio Ranieri, cumprida un’attera porfia de sa carriera sua, incumintzada propriu in Casteddu in su 1988 cun sa binchida doppia dae sa serie C a sa serie A, at a dassare sa banchina ruju e blu a sa fine de s’istagione. In d’unu nuntzu-video a sos tiffosos, su tecninu romanu chi tenet 72 annos, non faeddat de su tempus benidore sou.

At a sighire a allenare o che l’at accabbare? De sicuru sas offertas non mancant. Mancari su mattessi Ranieri eppat nadu pius bortas chi su Casteddu est bistadu s’urtimu club e chi mancari tiat aere sighidu a allenare una “Nazionale”. “Casteddu est e at essere semper sa domo tua.

Po semper reconnoschentes, Mister” iscriet sa sotziedade de su presidente Giulini supra su locu, in d’unu post longu meda in su cale si torrat a colare sa carriera de Ranieri, cun sas medas binchidas suas. Sa prima, in s’istagione 1988/1989: pigada in serie B. S’urtima, dominica passada. Binchida a su Mapei stadium 2-0 contra su Sassuolo e sardos salvos cun sa matematica. Chentza ispettare s’urtima zorronada, contra sa Fiorentina. Chi a custu puntu at divennere su Ranieri day. Cun tottu s’istadiu chi at acclamare s’omine de sos miraculos. Dae s’attera parte de sa Manica, a Leicester ne ischint carchi cosa. “ Su viaggiu meu est incumintzadu in su 1988. Tres annos ispantosos, pustis mi che so andadu e so diventadu mannu”.

Pustis de su passaggiu in serie A, chi mancari non nos ispettaimis gai in presse cando so arrivadu in su mese de Bennarzu, e custa salvesa mi paret zustu dassare, narat Ranieri. Est una detzisione tribulosa, tosta, leada cun su coro in manu, ma est zustu dassare como. Preferzo andare gai e non addurare un’atteru annu e cun sas cosas chi no podent andare bene. Giai timmia in su torrare, timmia de imbruttare sos tres annos chi appo bividu inoche e chi mi ant prenadu su coro.

In sos momentos de difficultade, mi attaccaia a Casteddu e a cust’isula galaverosa. E non cheria bennere, pustis cando appo leggidu sas paraulas de Gigi Riva (“Claudio est unu de nois”), so torradu. Appo pensadu de lassare sos egoismos e de andare a bi acconcare. Como est arrivadu su momentu de nos dassare. Mi auguro de essere ammentadu commente una persona positiva, chi at dimandadu azzudu a sos casteddajos e a sos sardos, chentza issos non bi l’ammos aere fatta, su pubbricu est bistadu s’omine in pius, non nos at abbandonadu mai. Appo bividu un’annu e mesu istravanadu. Gioggia bi at essere s’urtima partida e bos appo abbrazzare cun calore meda.”

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Istadiu de Casteddu, cursa detzisiva assa parte de su bandu:s’intentu est  lampadas pro alcansare Euro 2032.

Su caminu a banda de s’istadiu novu de su Casteddu Fubbalu bintrat in d’una fase importante. S’intentu chi tenent su Club e s’amministratzione comunale est cussu de arribbare a sa pubbricassione de sa porfia pubbrica internatzionale intro de su mese de lampadas, coladorzu importante pro permittire a sa tzittade de Casteddu de addurare intre sas candidadas pro accasazzare carchi partida de UEFA Euro 2032.

Su puntu supra de s’isviluppu de su disignu est bistadu fattu in Roma, in sa sede de sa FIGC, in su mentres de un’addobiu cun s’UEFA, su Comune e sa sotziedade ruju e blau. A su tzentru de su cunfrontu mescamente su rispettu de sos tempos e su livellu de creschida de su disignu tennicu, amministrativu e accolomicu finantziariu de s’impiantu,destinadu a remplasare s’istoticu Istadiu S.Elia, chi che at essere imboladu pro faghere logu a su novu modernu e chi at a serbire pro medas cosas.

Sos tempos sunt serrados. Sa pubbricassione de su bandu intre s’incumintzu de s’istiu est una cosa essentziale pro itte s’UEFA potat ponnere Casteddu in sa lista de sas tzittades candidadas giai intre triulas 2026. Pro custu motivu, intre sas chidas chi ant a bennere si at a cuntzentrare su tribagliu supra sos urtimos coladorzos amministrativos chi sunt de deffinire.

Addurant difattis de ispinnicare paritzos crobos ligados a su dirittu de supraffitzie e a su canone, chi sunt tzentrales po deffinire su Pianu accolomicu e finantziariu chi est preparande s’amministrassione comunale. Solu pustis chi ant essere deffinidos custos puntos at essere possibile trasmittire su Pef a su Ministeru de s’Accolomia e de sas Finantzias, po retzire sa decrarassione de Interessu Pubbricu in Cunsizzu comunale e faghere su bandu internatzionale.

Dae s’incontru romanu est bessidu a pizzu unu cuncordu istitutzionale supra s’importantzia istrategica de s’opera e unu apprezziamentu pro su tribagliu fattu fintzas a como. Su disignu, secundu cantu si connoschet, diat aere apperricadu unu livellu de isviluppu chi benit cussideradu coerente cun cantu benit dimandadu pro un’accadessimentu internatzionale comente s’Europeu 2032.

Parallelamente, si registrat unu mezzoru in sa propriedade de su club. Unu coladorzu chi diat podere garantire meda prus fortesa finantziaria e agguantare s’imbestimentu ligadu a s’impiantu novu, elementu crae in su pianu de creschida de su club.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22