Pustis de un’abbentura de contassia, durada 120 dies in mare, su carraffale Andria Mura cun sa barca a bela sua, at conchistadu unu postu in s’istoria de sa bela, arrivande a sa fine de sa porfia, a sas 13.45 UTC de su 17 de martu in su portu de Sa Coruna e binchinde su tetrzu postu in sa graduatoria de sa cumpetissione.

Partidu su 18 de su mese de sant’Andria supra de su sou fideli Open 50 “Bentu de Sardigna”, unu scippri chi tenet casi 24 annos de vida, Andria at rugadu sos mares e sas temporadas, po accattare custu resurtadu de carraffale.

S’arrivu sou in su cataffale est bistadu anticipadu solu dae Philippe Delamare, frantzesu, chi at segadu s’arrivu su 24 de frearzu supra de “Mowgli”, unu Actual 46 de su 2012, e puru dae Cole Bauer, una giovana americana e puru sa sola femina partetzipante, arribada su 7 de martu supra “First Light” unu Class 40 de su 2008.

Sa partezipatzione de Andria Mura a sa Golden Globe Singlehanded Challenge, aggiunghet unu capitulu nou a su sou giai meda illustru elencu de bintas, unu resurtadu destinadu a addurare commente una cosa chi non si podet burrare in s’istoria de sa bela de su mundu.

In d’unu atteru momentu signifficativu de s’abbentura sua, su 7 de frearzu a sas 00.40 UTC, Andria at doppiadu su de contassia Cabu Horn, bintrande a faghere parte de sa International Association of Cape Horners, una organissasione chi tzelebrat sas presuras de cussos chi ana fattu custu risurtadu de carraffale a sa sola. Solu 188 skipper ant accattadu custa cosa chena si arresettare, e Andria est unu se sos battoro italianos a l’aere fattu.

Custu sutzessu ritraede puru unu ingraenzu a Pascale de Gregorio, chi in su 2001 at finidu sa Vendee Globe cun su mattessi scippru , chi tando si giamaiat “Wind” e pius a tardu torrada a battizzare commenre “Bentu de Sardigna”, e a sa sua fidele cumpanza de biazzu chi at cundivisu cun issu custa porfia, duas bortas. Est puru unu riscattu po sa Vendee Globe de su 2016, unu sognu chi si est arrogadu in d’unu momentu.

In deffinitiva, Andria Mura, sighit a iscriere paginas de istoria po su mundu de sa bela, mustrande una determina e una passione chi ant fattu divennere unu beru eroe de su mare. Sa Sardigna puru custa borta,chilometru pustis chilometru, at sighidu sas abbenturas de Mura, agguantandelu e suffrinde po issu, fintzas a su momentu de gioia in su cale l’at bidu arritzare in finis su troffeu meritadu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Ozzastra terra de istoria: sos printzipales sitos archeologicos de bisitare intre nuraghes,biddas antigas e monumentos de sa tzivilidade nuragica.

S’Ozzastra est una de sas zuras de sa Sardigna prus riccas de istoria antiga. In cust’iscrocca si agattant sitos archeologicos meda chi contant sa vida de sas populassiones chi istaiant in s’isula mizza e mizza de annos faghet.

Intre montes, campedas e campagnas si podent biere nuraghes, tumbas de tzigantes, tumbas antigas irfossadas in sa rocca e restos de biddas. Bisitare custos logos est commente faghere unu biazu in su passadu e connoschere menzus s’istoria de sa Sardigna e de sas tzivilidades chi ant bividu s’isula prima de s’arrivu de sos romanos.

Unu de sos sitos prus connoschidos est su Nuraghe Ruinas, chi si agattat in s’iscrocca de Arzana. Custu nuraghe est unu de sos prus artos de sa Sardigna e si agattat in d’una posissione crara dae sa cale si podent biere sos montes de su Gennargentu. In s’iscrocca de Triei si agattat sa Tumba de sos Tzigantes de Osono, unu de sos monumentos de interru prus importantes de s’Ozzastra. Un’atteru situ interessante meda si agattat in s’iscrocca de Bari Sardo, inube bi est su Nuraghe Sellersu. In s’iscrocca de Cardedu si agattat invetzes sa Necropoli de Monte Arista, una zura in sa cale sunt bistadas agattadas tumbas meda irfossadas in sa rocca.

Intre sos sitos prus importantes de s’Ozzastra bi est fintzas su cumplessu archeologicu de s’Ortali’e su Monti, in s’iscrocca de Tortolì. Si trattat de unu de sos sitos prus bisitados de sa zura e accansat monumentos divressos intre sos cales unu nuraghe mannu, una tumba de sos tzigantes e restos de biddas antigas. Importante meda est fintzas su situ archeologicu de s’Arcu ‘ e is Forros, in s’iscrocca de Villagrande Strisaili. Custu logu fuit una bidda nuragica manna chi in passadu teniat fintzas unu rolu religiosu e de negossiu. Sos archeologos ant agattadu restos de cresias, magasinos e buttegas po tribagliare sos metallos.

S’Ozzastra est duncas un terra ricca de testimonzas archeologicas chi permittint de iscoperrere s’istoria prus antiga de sa Sardigna. Sos nuraghes, sas tumbas e sas biddas antigas sunt unu patrimoniu pretziosu meda chi contat s’issida de s’isula. Bisitare custos logos cheret narrere connoschere menzus su tempus passadu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22