Sa presone de Lanusè Santu Danieli, pagu tempus faghede at accasazzadu un’emossionante presentada de su romanzu “Animas” de s’iscriptora prena de talentu Federica Cabras, naschida in BiddaManna e chi at giai pubbricadu atteros libros.

Postu in su disignu de tres annos “Abberimos sas giannas a su teatru, a sa musica e sa lettura” s’accadessimentu at mustradu unu momentu fungudu de cambiu de sos presoneris cun s’iscriptora ozzastrina. Sos chi ant partetzipadu si sunt mustrados interessados e appassionados meda, faghinde paritzas dimandas chi mustraiant s’interessu insoro in sa lettura de custu romanzu affianarzu nieddu,chi fundet elementos de sa tradissione sarda, ritos antigos e misterios e chi at giai bogadu a fora in Sardigna, interessu mannu.

Sa naschida de custu disignu est bessida dae sa volontade de sa Commissione Didattica de sa presone de Lanusè, po apparare a sos presoneris logos e momentos, non solu de formatzione, ma puru creativos, chi pottant favoressere s’issida po mesu de sa recitatzione, su cantu e sa lettura.

S’accabbu primarzu est cussu de promovere relatziones in mesu de sos presoneris, e dare unu contribbutu in manera balida a sa torrada in mesu de sa sotziedade, arrendinde sa presonia un’opportunidade de creschida personale, in logu de unu tempus chi siat solu de isolamentu limitadu.

S’initziativa est bistada posta in campu e chistionada intro de sa Commissione, in linia cun sos intentos de educassione de sa presone s’impignu de onzi die da parte de sa Direzione, po favoressere s’integrassione de sos presoneris in sa sotziedade tzivile. Onzi accadessimentu culturale, ordimizzadu,diventat gai un’opportunidae de cambiamentu e de iscoperta de sas capatzidades de issida de donzunu, permittinde a sos presoneris de curreggere su chi ant bividu in d’unu cuntestu positivu e abbaidande cun isperantzia a su tempus benidore.

Su disignu si isfroscat supra de duos filones printzipales: su teatru, cun duos ispettaculos de burrattinos, uno de sos cales a tema de su Nadale e s’atteru intituladu: “chi lu faghet, si l’ ispettet, e sa litteradura, po mesu de imparu de litteradura creativa e addobios cun atteros autores mascros e feminas.

Cussu cun Federica Cabras est bistadu solu unu de sos primos addobios de cultura:de sicuru su disignu de Lanusè at a sighire a andare a daenanti tostu e custante in su tempus.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa Dinamo Bancu de Sardigna patit sa secunda derrotta una fattu de s’attera in sa fase duos de sa Europe Cup, perdinde 76-83 cun sos frantzesos de Le Portel, in d’una partida giogada e pattada po casi tottu su tempus, ma chi est bistada detzisa in sos urtimos minutos .

Po sos tattaresos un’attera occasione perdida pustis de su passu falsu contra Bilbao, ma sas isperantzias de si qualifficcare addurant bivas. S’isquadra de coach Markovic si est presentada in Le Portel cun determina, mustrande dae sos primos minutos de podere cumpetere in manera chitta cun sos frantzesos.

Sa gara est bistada bilantzada in sas primas tres partes, cun sas duas isquadras chi sunt bistadas a su cumandu una fattu de s’attera chentza mai si che andare a daenanti. Sa terza parte si est serrada cun sos merese de domo a daenanti solu de unu puntu(61- 60), dassande suspentare una parte finale intzerta e chertadora.

In s’urtima parte, peròe, sun bessidas a pizzu sas difficultades de sos tattaresos, mescamente in s’attaccu. Mentres Le Portel at pottidu contare supra sas prestassiones istravanadas de Konate, Diawara e Nunge, sos tattaresos ant fatigadu a acciappare continuidade. A battoro minutos dae sa fine, sos frantzesos ant approffittadu de carchi sbeliu de sa deffensa de sa Dinamo po allonghiare.

Bell’ e chi custu, sa Dinamo no at mai molladu. Sos tiros de tres puntos de Veronesi e Fobbs, su menzus marcadore tattaresu cun 12 puntos, ant torradu a azzendere sas isperantzias de sos istranzos, chi sunt arrivados a -4 puntos. A donzi manera, in sos momentoz detzisivos, Le Portel at mustradu una frittesa e fortesa pius mannas, serrande sa gara cun su risurtadu de 83-76 conchistande duos puntos pretziosos in sa cursa po si qualifficare.

Mancari eppat perdidu, sa Dinamo at mustradu signales de corazzu. S’isquadra at gherradu a sa chitta contra unu cuntrariu de livellu artu, evidentziande tramas de giogu bonas e impignu mannu, ma est mancada, in sos momentos pius importantes, una cosa supra sa cale coach Markovic at a teppere tribagliare. Sa fase de s’attaccu in s’urtima parte de sa gara, in manera particulare, at evidentziadu una mancantzia de lutidade, mentres in sa defensa si sunt bidas mancantzias chi ant permittidu a sos frantzesos de approffittare de situassiones de favore.

Cun duas derrottas in duas garas, sa Dinamo est como in d’una posissione cumplicada , ma su caminu po passare sa muda benidora no est cumpromissu. Ant essere de fundamentu sos impignos pius accurtzos.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22