Su misteru de sas Domos de Janas, tumbas antigas istuvuccadas in sas roccas e chi agattamos in tottu sa galanosa Sardigna, sunt bistadas candidadas commente riconnoschimentu de Patrimoniu de su mundu de s’umanidade, in sa cummissione Natzionale de s’Unesco.

Assegus de una baludazione longa meda, sa proposta at rezzidu s’approbazione, e commo est retzinde unu cunsideru mannu dae parte de sos espertos de su Comidadu de su Patrimoniu de su Mundu, chi est in Parigi.

Sos documentos, presentados dae su Cesim, chi est su Tzentru po sos Istudios de s’Identidade e sa Memoria,agguantadu dae sa Regione e da sa retza de sos Comunes de sas Domus de Janas, diliniada unu passu importante meda e puru istoricu in su bandire custos monumentos carraffales.

Poninde a pare 37 amministrassiones, cun s’Alighera commente puntaresu, su comidadu de promotzione at mustradu un’impignu cumone e fungudu custoinde custa parte importante de su patrimoniu culturale sardu.

Puru su Ministru de sa Cultura, Gennaro Sangiuliano, at espressadu suddisfasione funguda, po sa collida positiva de sa proposta dae sa Cummissione Natzionale Unesco. Sas Domus de janas, cun sos 26 logos insoro, sunu una testimonia de desampladu balore, in su campu de s’istoria e de sa cultura universale. Custos monumentos, chi pertoccana a unu tempus dae su V e su III millenniu A.C., apparana una mirada nodida supra su passadu de sa Sardigna e supra sas presuras suas cun su mare Mediterraneu e sos populos suos.

Su chi rendede custa proposta unica, est sa natura sua primorosa,pro itte tenet 26 elementos bogados a campu, chi annodditana unu periudu detzisivu de s’isula nostra. Custos monumentos, chi appartennene a su Neoliticu mediu e a s’edade de su ramene, testimonzant s’importantzia de sos elementos ipogeicos e de su Megaliticu in sa Sardigna antiga. Bell’e chi fenomenos commente custos bi esserent puru in atteras tziviltades de s’Europa de su mattessi tempus,in sa Regione nostra tenent collogamentu chi si distinghent, e sunt unicas, chene remissione unicas, commente pensant sos istudiosos, poninde in evidentzia sos cambios de cultura cun su foranu chi sos isfroscos unicos de su cuntestu logale.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa Dinamo Bancu de Sardigna patit sa secunda derrotta una fattu de s’attera in sa fase duos de sa Europe Cup, perdinde 76-83 cun sos frantzesos de Le Portel, in d’una partida giogada e pattada po casi tottu su tempus, ma chi est bistada detzisa in sos urtimos minutos .

Po sos tattaresos un’attera occasione perdida pustis de su passu falsu contra Bilbao, ma sas isperantzias de si qualifficcare addurant bivas. S’isquadra de coach Markovic si est presentada in Le Portel cun determina, mustrande dae sos primos minutos de podere cumpetere in manera chitta cun sos frantzesos.

Sa gara est bistada bilantzada in sas primas tres partes, cun sas duas isquadras chi sunt bistadas a su cumandu una fattu de s’attera chentza mai si che andare a daenanti. Sa terza parte si est serrada cun sos merese de domo a daenanti solu de unu puntu(61- 60), dassande suspentare una parte finale intzerta e chertadora.

In s’urtima parte, peròe, sun bessidas a pizzu sas difficultades de sos tattaresos, mescamente in s’attaccu. Mentres Le Portel at pottidu contare supra sas prestassiones istravanadas de Konate, Diawara e Nunge, sos tattaresos ant fatigadu a acciappare continuidade. A battoro minutos dae sa fine, sos frantzesos ant approffittadu de carchi sbeliu de sa deffensa de sa Dinamo po allonghiare.

Bell’ e chi custu, sa Dinamo no at mai molladu. Sos tiros de tres puntos de Veronesi e Fobbs, su menzus marcadore tattaresu cun 12 puntos, ant torradu a azzendere sas isperantzias de sos istranzos, chi sunt arrivados a -4 puntos. A donzi manera, in sos momentoz detzisivos, Le Portel at mustradu una frittesa e fortesa pius mannas, serrande sa gara cun su risurtadu de 83-76 conchistande duos puntos pretziosos in sa cursa po si qualifficare.

Mancari eppat perdidu, sa Dinamo at mustradu signales de corazzu. S’isquadra at gherradu a sa chitta contra unu cuntrariu de livellu artu, evidentziande tramas de giogu bonas e impignu mannu, ma est mancada, in sos momentos pius importantes, una cosa supra sa cale coach Markovic at a teppere tribagliare. Sa fase de s’attaccu in s’urtima parte de sa gara, in manera particulare, at evidentziadu una mancantzia de lutidade, mentres in sa defensa si sunt bidas mancantzias chi ant permittidu a sos frantzesos de approffittare de situassiones de favore.

Cun duas derrottas in duas garas, sa Dinamo est como in d’una posissione cumplicada , ma su caminu po passare sa muda benidora no est cumpromissu. Ant essere de fundamentu sos impignos pius accurtzos.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22