Locheri, est in dolu, mentres at cummemoradu sa vida carraffale de Maria Mulas, s’amada chentenarza, chi at dassadu sa comunidade de Locheri, carchi die faghede, a s’edade de 101 annos.

Sa morte sua at creadu unu boidu chi si potet apprappuzzare in su coro de sa zente de sa bidda, influentzande non solu sos istimados suos, ma tottu sa comunidade, chi como si accattat a ammentare sa memoria istorica biva de Maria.

Sa presentzia sua chi fit arroddita e prena de amore,at prenadu onzi cuzone de sa idda ozzastrina, inube Maria Mulas est bistada pro tottus sa mannai adottada. Sa vida sua est bistada una pintura a friscu de adizos cundivisos cun sa comunidade, chi sunt arrivados a su momentu pius artu cun sa festa de su 4 de austu 2022, cando at cumpridu chent’ annos.

Tottu sa idda si est unida cun issa, in cussu momentu de allegria pro tottus, poninde a pare ingendras divressas, cun d’una tzelebrassione chi at dassadu un’imprenta chi non si potet iscanzellare in sos coros de chieù l’at connoschida.

In mesu de sos chi la sunt pranghinde, bi est sa nepode Rosanna Mulas, cun sa cale Maria cundividiat sa domo sua, in su galanosu tzentru istoricu de Locheri. In prus de Rosanna, atteros 5 nepodes, e tottu sa comunidade lis fint meda affetzionados. Maria Mulas beniat dae una famizza chi teniat raighinas fungudas in Locheri, e sa figura sua fit diventada una custode de s’istoria locale.

Su sindigu Gianfranco Lecca, paris cun sos assessores e a sos consizzeris de su Comunu, ammentant cun affettu sa figura de Maria: “At allogadu parte de s’istoria de sa idda nostra. Non ammos mai ismentigare sas paraulas suas de accottu pro sos prus debiles, sa cunbintzione sua chi s’amistantzia e s’azzudu a sas pessones chi suffrint siant sas cosas prus importantes.

Inoche, in Locheri, at bividu una vida serena, ammustrandenos cun gentilesa sa partiatzesa e sa fortza suas, affrontande cun atza sas difficultades de onzi die. S’interru, unu momentu de adiosu, po onorare sa vida de Maria Mulas, si est fattu sapadu 3 de frearzu in sa parrocchia de santu Pedru Apostulu in Locheri. Sa comunidade si est assortida po ammentare paris una vida carraffale, cundividinde su dolu mannu pro sa perdida, e tzelebrande s’ammentu de una femina chi at dassadu un’ormina chi non si potet iscantzellare in s’istoria de Locheri.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Dramma in Arzachena, duos piccioccos mortos in d’unu atzocchiu orrorosu comunidade abbolottada.

Serradu po dolu su parcu de s’abba inube tribagliaiant sos zovanos mortos. Sa die de deris si est abberta cun d’unu dramma chi che at bettadu Arzachena in su dolore. A s’arbeschida, in d’una de sas carrelas provintziales chi cameddant sa bidda a su logu turisticu de Baja Sardinia, bi est bistadu un’atzocchiu forte meda intre una Ford Fiesta e unu SUV. Supra de sa Fiesta biazaiant tres piccioccos zovanes meda, de 16,17 e 18 annos, tottus de bessida marocchina e chi bistaiant in Arzachena.

Si fuint affilande a su tribagliu in su parcu de s’abba Aquadream, inube aiant incumintzadu dae pagu un’esperientzia de tribagliu po s’istiu. Po duos de issos s’atzocchiu est bistadu mortale. S’atteru, su pius zovanu de sa truma, ch’est bistadu leadu in s’ispidale in cunditziones graves meda. Fintzas sas duas feminas chi si acciappaiant intro de su SUV sunt adduradas fertas e cuberradas in s’ispidale de Nugoro.

S’atzocchiu rebbestu est sutzessu in d’unu trettu de carrela chi paret simple de attraessare, ma chi no est privu de transas. Sos motivos de s’atzocchiu sunt in accertamentu. In su logu de s’atzocchiu sunt arrivados sos de sa politzia istradale e sos vigiles de su comune, impignados a cumprendere sos motivos de s’atzocchiu po accrarare sas responsabilidades.

Su nuntzu si est isparghidu in presse meda in sa bidda, dassande chentza paraulas sos chi bistant inie.Supra sos social medas sunt bistadas sas bogadas a campu de affettu e de dolu. Sos tres piccioccos funt connoschidos bene e funt appretziados po su trazu rispettosu e sa gana de s’impignare. Funt insertados in sa sotziedade de s’iscrocca e medas los aiant bidos creschere.

In sinzu de dolu, s’Aquadream at detzisu de suspendere sas attividades. Sos cantzellos de su parcu de s’abba, sunt addurados serrados po tottu sa die. Su personale ancora no creet a su chi est sutzessu, e si est assortadu in d’unu momentu de mudore e collimentu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22