Custa muda, chi eris at ispantadu sa zente, at bidu s’applicazione de mesuras de cautela in cunfrontu de unu connoschidu meda, mere de una ditta de Casteddu, commente dimandadu dae sa Procura de sa Repubblica de Casteddu, finzas cun s’autorissasione de su zuighe po sas scruccullas chi si faghen a daenanti de su Tribunale de Casteddu de s’8 de ennarzu 2024. In manera distinta, si est dezisu de mandare s’omine a sos arrestos in domo, usande puru su compudu elettronicu cun d’unu bratzale elettronicu.

S’omine si ada acattadu a manzanu, intro de sa domo sua de Sinnai, sos carabinneris e sa Guardia de Finanzia, cun sa notificassione de s’arrestu.

Sas intimassiones cuntra de su mere casteddaju, appartenini a cosas, commente cussas de che aere furadu benes de una sotziedade de sa cale teniada sa responabilidade. Sa sotziedade de sa cale si est allegande l’aiana posta sutta de licuidatzione da parte de su zuighe, su 12 de triulas de su 2023, sighinde sa detzisione de su Tribunale de su fallimentu de Casteddu, po sos deppidos chi aiant superadu sos tres milione de euros.

De custos 3 miliones, prus de unu fidi po tassas mai pagadas. Sas scruccullas chi ant fattu paris sos Carabbineris de sa Setzione de P.G. e sos finantzieris de sa Politzia de culumia finantziaria, ant fattu cumprendere chi su mere de sa ditta faghiada tottu sas cosas, pensande solu a s’interessiu personale sou. Sa cosa printzipale chi est bistada notada, apparteniada a sa bendida de benes de sa sotziedade, fatta in s’annu 2019/2020 de sa propriedade de un’attera sotziedade.

Cust’urtima, at dae pagu finidu de fraigare unu cumplessu de domos e villas de isfartzu, chi ant bendidu a pretzios artos meda, onzuna costaiat prus de paritzas chentinajas de miza euros. Sa cosa, duncas, jughet rilevantzia economica,chi si faghet abbrembigare, cun operas de dinari e benes de valore artu meda. Su mere de sa ditta, como, si ada a amparare daenanti a sa leze, e accrarare sa posissione sua po sas intimassiones chi li sunt faghinde.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Tribulìa in sa plaja in Casteddu: piccioccu de seighi annos agattadu mortu pustis de una festa a denotte.

Un festa in atta ‘e mare est finida in sa manera pius drammatiga. Est ancora imboddicada in su misteru sa morte de Mariano Olla, 16 annos, naschidu in Casteddu, ma chi dae carchi annu bistaiat in Sestu, su corpus de su cale est bistadu acciappidu a s’arbeschida de dominiga 15 de lampadas in sa plaja intre su portu de Su Siccu e sa passizzada scalu de Sant’Elia.

A iscoperrere su corpus, a deghe metros dae sa riva, sunt bistados piscadores e zente chi faghiat su bagnu in cussu logu. In presse meda sunt arrivados sos Viglies de su Fogu po su recuberu de su corpus, sighidu dae s’arribu de sa politzia e de su 118, chi ant potidu solu cunfirmare chi su zovanu fit mortu. Su piccioccu teniat ancora sas iscarpas e sos pantalones curtzos, ma non teniat sa maglia. No presentaiat sinzos de violentzia.

Secundu sos primos pensamentos, intre su notte bi diat essere bistada una festa propriu in cussa plaja pitticca e franta, pagu attesu dae su coro de sa “movida” de sos zovanos de su portu turisticu de Su Siccu. Addurat peroe de accrarare si Mariano esserat deabberu intre sos partetzipantes a sa festa e, si custu est beru, itte potat essere capitadu in sas oras imbenientes.

Sa plaja in sa cale est bistadu agattadu su corpus, una limba de rena pitticca in daesegus de su molu de su portu, si podet segudare dae una caminera de terra chi partit dae su parchizu Coro, su mattessi impittadu dae sos tiffosos po sas partidas a sa Unipol Domus, s’Istadiu de su Casteddu. A curtzu si agattant puru s’istadiu bezzu e su Lazzaretto. Sa Politzia at fattu partire sas scruccullas po accrarare sos motivos de sa morte. Sunt gia bistados iscurtados sos familiares de su piccioccu e si est chircande de torrare a fraigare sas urtimas oras de sa vida sua.

Unu puntu de fundamentu de s’iscrucculla at essere de cumprendere si su piccioccu si siat istesiadu a sa sola, si si siat intesu male, o si bi siant bistados elementos de arriscu in sa serana. At essere importante sa resessia de lotomia.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22