Un’òpera de arte sagrada, prena de traditzione e ispiritualidade, s’agatat in Casteddu, in sa crèsia de Sant’Efis. Finas a su 4 de freàrgiu 2024, su bighinadu Stampaxi at a acasagiare unu presèpiu ispantosu meda, frutu de sa maestria artìstica de sa GIOC, Gioventude Italiana Operaja Catòlica, e realizadu cun passione dae s’Artzicunfraria de su Gonfalone de Sant’Efis Màrtire.

Su presepe, a su cumintzu onoradu de su primu prèmiu in una rassigna internatzionale de presèpios in su 1961, donat sa Crèsia de Stampaxi s’incantu de sos colores suos, de sos bestires traditzionales, de sos pessonàgios e de sas atmosferas tìpicas de sa professone de su Màrtire Gherreri.

Una rapresentatzione rafinada, cumposta dae belle dughentos istatueddas, est su donu de su pòpulu sardu a su Pipiu Gesùs. Cada figura, isculpida cun atentu e a sa minuda, contribuit a creare una pintura chi atzapat s’essèntzia de sa traditzione e de s’adoratzione.

Su presèpiu, espostu a s’internu de sa Crèsia de Sant’Efisi, donat a sos visitadores sa possibilidade de bìvere un’esperièntzia ùnica. Sos ispàtzios internos de sa crèsia acollint sas  figuras sacras, imboligadas dae un’atmosfera de ispiritualidade e devotzione. Sa bìsita a su presepe est aberta a su pùblicu cada die dae sas 10:00 a sas 12:00 e de sas 16:00 a sas 20:00, oferende a totus s’oportunidade de s’imbèrghere in s’atmosfera incantada de custa traditzione de Paschighedda.

Custa òpera, cun s’istòria raighinada sua in su tempus, non tzèlebrat sa Natividade ebbia, ma fintzas su cultu de Sant’Efis Màrtire. Sas duas dimensiones si fundent in una rapresentatzione rmuniosa chi cramat sos visitadores a riflètere subra de sa connessione intre sa sacralidade de su Nadale e su respetu pro su martìriu.

Su presepe devenit in custa manera unu ponte intre su passadu e su presente, un’ocasione pro torrare a iscobèrrere sa richesa de sa cultura sarda e su ligàmene profundu suo cun sa fide. S’espositzione chi at a abarrare finas a freàrgiu permitit a residentes e turistas de gosare de custa òpera mastra durante sas festividades, sutaliniende s’importu de preservare e avalorare sas traditziones chi arrichint su patrimòniu culturale de sa comunidade.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Sa fine drammatiga de su zovanu benturzu Arricelli, pustis de su bolu attrividu dae sa Sardigna a sa Sicilia, nos ammentat sos arriscos de sos movimentos de ispartinadura de sos zovanos alabros.

Su destinu sou, interrumpidu cando fit bolande supra su mare in mesu de Punta Raisi e San Vito lo Capo, nos ponet daenanti a sa debilesa de custas creaduras magniffigas, in d’unu mundu semper pius bortadu a sos interessios de sos
omines.

Arricelli fit unu de sos 15 benturzos de sa colonia noa de su Sarrabus- Gerrei, e sa perdida sua est una disgrassia non solu po sa comunidade iscentifica chi lu compudabat, ma puru po tottus sos chi appretziant e si affuscant de sa rimunida de sos animales arestes.

Bell’e chi non tottu est perdidu. In su mentres chi pranghimos sa perdida de Arricelli, semus animados dae sos sutzessos e dae sa resistentzia de sos atteros membros de sa colonia de Villasalto. Su benturzu Sannicolò sighit s’iscumbattamentu de sa Sardigna, ispinghindesi cun atza in medas regiones de s’isula, cun su bentu chi che lu diat leare fintzas in Corsica.

A sa mattessi manera, sos atteros benturzos commente Sinnai,Ballao,Gerrei,Armungia,Quirra e Muravera, mustrant unu adattamentu chi surprendet meda, addurante po su pius tempus in sa sura de sos Sette Frades, ma iscumbattande puru iscroccas pius attesu, ma torrande semper a sa sicuresa de sa gabbia Forestas. S’azzudu de sos pastores, commente sos frades Aledda, est importante meda po garantire unu approvistamentu de cosa de pappare po sos benturzos.

Su rolu insoro non solu assicurat chi custas creaduras ispantosas potant bivere, ma azzuat puru a su sutzessu totale de su disignu po conservare sos benturzos, apparande unu ispartimentu ecologicu de sas carasas chi faghet bene siat a s’ambiente siat a sa comunidade locale.

In su mentre chi pranghimos sa perdida de Arricelli, rennovamos s’impignu nostru po diffendere e preservare sas zenias minettadas, pro itte atteras disgrassias commente custa si potant iscansare e chi su chelu sigat a essere surcadu dae sas alas de custos alabros magnifficos.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22