Su skipper sardu, Andrea Mura, si cunfirmat unu de sos mègius de sos italianos in sa Global Solo Challenge, una cumpetitzione de nàvigu èpica a inghìriu de su globu a sa sola, sena iscalos e sena assistèntzia, in intro de  s’Open 50 Vento di Sardegna. Mura dae pagu at iscaladu sa classìfica, colende dae sa de chimbe a sa de bator positziones in pagu prus de una chida de gara.

A su cumandu de sa classìfica b’est Mowgli, sa barca de su frantzesu Philippe Delamare, chi at inghitzadu su 30 cabudanni. Sighint First Light de s’istadunidensu Cole Brauer e Shipyard Brewing de s’àteru istadunidensu Ronnie Simpson, ambos duos mòvidos su 29 de santugaine. Sa barca Bendigedig de su gallesu Dafydd Hughes, mòvida su 26 de austu, est a su de bator postos.

Andrea Mura, mòvidu su 18 de santandria dae A Coruña, dimustrat su determinu e s’abilidade suos, ocupende sa de chimbe positziones. Como, nche at isciaddisu s’ecuadore e s’agatat in s’Atlànticu Meridionale a largu de sas costas de su Brasile. S’obietivu imbeniente suo est de cròmpere a Cape Town e rugrare su Capu de Bona Speranza, su primu de sos tres mannos capos chi at a afrontare in su percursu de 26 mìgia mìllios nàuticos.

Sa marrania de Mura est difìtzile meda sende chi li tocat a surcare  sos otzèanos solu, sena firmadas e sena assistèntzia, at a pòdere contare petzi in sa barca sua, Vento di Sardegna, sa cumpàngia sua in custa ventura.

Sa cumpetitzione est unu bancu de proa pro sas abilidades nàuticas e sa resistèntzia fìsica e mentale de sos skipper, e Andrea Mura dimustrat de tènnere totu sas cartas in règula pro cumpètere a sos màssimos livellos. Cun galu medas mìllios marino de de percùrrere, cada die rapresentat unu disafiu nou e un’oportunidade pro Mura de dimustrare sa capassidade sua de naigare a sa sola sos otzèanos.

Sa Global Solo Challenge oferit una vetrina istraordinària pro sos amantiosos de vela de totu su mundu. Sa cumpetitzione no est petzi una gara de lestresa, ma fintzas una proa de resistèntzia e determinatzione, e Andrea Mura est de seguru unu de sos protagonistas de custa ventura istraordinària. Isetamus de bìdere comente  at a andare custu disafiu èpicu a inghìriu a su mundu e cales impresas noas at a afrontare Mura in sos tretos imbenientes de navigatzione.

 “Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Onne, iscoperta una prantadura manna de marijuana: arrestados duos zovanos de Gavoi.

Un’operassione antidroga manna abberu conduida dae s’Isquadra mobbile de Nugoro, cun s’accottu de sos politziottos de su Commissariadu de Gavoi, at permittidu de iscoperrere una prantada de marijuana in sas campagnas de Onne e a s’arrestu de duos zovanos, ambos de Gavoi.
S’azione de sa politzia sighit un’attividade de collidura accurada, durada paritzas chidas, chi at prevedidu fintzas appostamentos longos meda in d’una zura chi est frunca meda e de diffitzile atzessibilidade.

Propriu in cussu trettu de campagna, cuadu bene in mesu de sas prantas, fit bistadu  prantadu unu campu prantadu cun casi 4.500 prantas de
cannabis, medas de sas cales, giai maduras e prontas po essere buddidas. Sas prannucas analizzadas ant evidentziadu una cuncentrazione arta meda de THC, cumintzu attivu chi deffinit s’effettu psicoattivo de sa marijuana.

Secundu sas istimas, sa regorta diat aere pottidu ingendrare casi 50 kilos de droga, giai pronta po sa bendita, cun d’unu balore in su mercadu illetzidu de chentinaia de mizzas de euros. Un’affare chi rendet meda, chi peroe est bistadu frimmadu gratzias  s’interventu lestru de sa politzia. Sos duos zovanos sunt bistados agattados in su logu in su mentres chi funt segande e tribagliande sas prantas. Bloccados mentre funt faghinde su crimene, sunt bistados arrestados cun s’accusa de contipitzu de sustantzias chi abberelant.

Comente at dispostu sa Procura de sa Repubblica de Nugoro, chi tenent in manu sas scruccullas, sunt bistados postos a sos arrestos in domo ispettande s’audentzia de cunvalida. Sas scruccullas sunt andande a daenanti po accrarare si sos duos arrestados faghiant a sa sola oppuru si fagherant parte de una retza meda pius manna. Sos aberguadores sunt abberguande si puru su terrinu esseret bistadu impittadu po atteras prantadas e si bi siant responsabilidades cun atteros po faghere custa attividade illetzida.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22