Sa protesta de sos dipendentes de sos entes locales in Casteddu est esplòdida cun fortza, evidentziende sa farta grave de personale chi corpit sas amministratziones locales in totu sa Sardigna. Unas duamìgia pessones ant prenadu sa Pratza de sos Chentumìgia, cun capeddos e mallieddas biancos comente sinnu de unione e mobilitatzione.

Su corteu, chi at cumintzadu pagu a pustis de sas 10:30, s’est dirìgidu cara a su Cussìgiu regionale, atirende partetzipantes bènnidos dae cada parte de s’ìsula. Sos manifestantes ant pesadu su problema de sos reduidos e de sos discumbènios chi minant sa frunidura de sos servìtzios a sos tzitadinos e a sas impresas. Sa presèntzia in pratza est istada significativa, cun una trentina de sìndigos e diversos esponentes polìticos de importu, intre custos Alessandra Todde e Renato Soru, candidados a sas eletziones regionales imbenientes.

Su coro de sa protesta est sa rechesta de adotare unu “cumpartu ùnicu” cun règulas e tratamentos econòmicos paragonàbiles a cuddos de sos dipendentes regionales. In su manifestu de protesta, si sutalìniat chi petzi sa Sardigna, paris cun sa Sitzìlia, no at galu adotadu custu cumpartu pro sos entes locales.

Sos manifestantes denùntziant sa diferèntzia de salari intre sos dipendentes regionales e cuddos de sos entes locales, nointames acumprant mansiones sìmiles. Sa creatzione de unu cumpartu ùnicu, afirmant, diat garantire un’echilìbriu in sa distributzione de su personale, cunsentende una programatzione integrada de sos servìtzios pùblicos sardos. Si punnat a prevìdere assuntziones noas, mescamente in sos comunos piticos, pro parare fronte a s’ispopulamentu de sas àreas internas causadu dae sa farta de servìtzios.

Su 22 de santandria, acanta s’àula consiliare de su Comunu de Aristanis, est istadu istituidu unu comitadu dedicadu a custu tema, rapresentende su cumintzu de unu percursu de mobilitatzione paghiosa e democràtica. S’obietivu est de reformare sa pùblica amministratzione de sa Sardigna pro garantire unu servìtziu pùblicu efitziente e ecuànime in totu sa regione, ponende fine a una situatzione chi minat sa calidade de sa vida de sos tzitadinos sardos.

Una delegatzione de sos dipendentes de su Comunu de Tortolì est presente a sa manifestatzione, evidentziende sas diversisade  salariale e sas diferèntzias de tratamentu respetu a sos dipendentes regionales.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Sa birra sarda sighit a si distinghere a livellu natzionale e europeu, accuccurrande una filera de riconnoschimentos de grandesa chi ponent in lughe s’estremadia de su prodottu isolanu e sa solidesa de sa filera regionale de sa birra. Custos premios cunfirmant su sutzessu creschente de sas favricas artigianales de sa birra in Sardigna e s’effettu de signifficu supra su mercadu regionale e addia.

Dae pagu tempus, sas favricas de birra isulanas ant brilladu in medas manifestatzione importantes, incluinde abbenimentos meda connoschidos commente su Vinitaly 2024 e su Bartzellona Beer Challenge, unu de sos cuncursos de sa birra pius de grandesa de Europa, addia a su Cuncursu Internatzionale de Lione.

In mesu de sos personaggios printzipales de custa serie de sutzessos, si est annoddittada sa favrica de birra Puddu de Santa Giusta,Aristanis, chi at conchistadu tres medallas (oro,arghentu e brunzu) a su Bartzellona Beer Challenge po sas variedades Porter,Saison e Coffee Porter, binchinde puru su titulu de menzus favrica de birra zovana de sa gara. Sa favrica de birra Battor Moros de Guspini, at binchidu duos oros po sas birras Puttu 16 Helles e Puttu 9 Vienna Lager, e sa favrica Artigiana Horo de Sedilo at retzidu una medalla de oro po sa Tifo Mourinho e una de arghentu. Puru sa favrica de birra Agricola Reforte de Benetutti at binchidu una medalla de brunzu cun sa birra Su Boboti, e sa favrica de Birra Keja de Bari Sardo at conchistadu una medalla de arghentu cun sa Calmedia, un’India Pale
Lager.

A su cuncursu internatzionale de Lione, sa favrica Birrificio “Isula” de Thiesi at binchidu medas medallas de oro po medas variedades, in mesu de sas cales sa Pale Ale, sa coffee stout e sa pils, addia una medalla de arghentu cun sa Session Ipa. In pius a su Vinitaly, su premiu “silver” a su design po sa classe birras, est bistadu dadu a sa Wine Explosion – IGA Mogorese a su Semidano favrica de birra Bam de Mogoro.

Su presidente e su direttore de Coldiretti Sardigna, Battista Cualbu e Luca Saba, ant evidentziadu s’importantzia de custos riconnoschimentos, chi premiant su tribagliu tostu de sas favricas de birra artigianales de sa Sardigna in s’agguantare tottu sa filera de sa birra regionale. Coldiretti Sardigna at fattu partire unu disignu ambitziosu meda po azzuare custa filera, faghinde partetzipare sos chi produene su ranu,s’orzu,malto e luppulu, paris cun sas favricas de birra e su Consorziu de sa Birra Italiana.

Custu disignu cheret favoressere una produssione de s’isula cumpleta, dae sas materias primas a su prodottu finidu, cun s’intentu de rispondere a tottu sas esigentzias de sa filera. Gratzias a custa initziativa, sunt arrivados finatziamentos importantes meda dae sa Regione, po agguantare sas favricas de birra a sos produttores de orzu, preparande su terrinu po accomettare sas porfias de su tempus benidore cun ressignu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22