S’Arbutzu, connotu fintzas comente  Cadrilloi, Cadrillòni, Cadilloni, Cadrigione, Irbutu, Ischiria, Iscraria, est una mata connota meda in sas traditziones de sa Sardigna. Cun su  frore suo, custu fundu ispontàneu de sa mantza mediterrànea tenet unu ruolu màgicu e cun meda impreos in sa cultura isolana.

Cumintzat a frorire in maju. Unu tempus, in sas domos sardas, non mancaiant mai sas cranistas cun s’arbutzu in sos cabidales de sas isposas. Custas cranistas, cun formas e mannària diferentes, fiant essentziales pro sas fainas fitianas in coghina e pro sa traballadura de su pane e de àteros alimentos preparados in domo. Sos frustigos de arbutzu, robustos e mujaditos, costituiant sa matèria prima pro sa realizatzione de custas cranistas, ma non pro custu ebbia: su frore istilizadu fiat impreadu a s’ispissu in traballos de recramu e tessidura, arrichende su patrimòniu artìsticu e artesanale de s’ìsula.

S’Arbutzu s’impreaiat fintzas pro abrontare su màndigu. Sa patata cora suta de sa chisina, rapresentaiat una risursa pro sas classes prus pòberitas,  cumpletende pastos modestos. Sos rebuddos friscos de su cambu, ammaniados in vàrias maneras, deveniant parte de su màndigu de onga die, unidos a àteros vegetales e ortalìtzias. Sas fògias friscas, imbetzes, fiant impreadas pro imboligare formas piticas de casu, lis donede a sos nidolos unu sabire e unu nuscu partcuculae, chi istesiaiat fintzas sos babbois.

In prus de sas calidades alimentares suas, s’arbutzu possedit propiedades benèficas pro sa pedde. Sas fògias suas sunt impreadas pro infriscare sa pedde e pro curare sas brusiaduras causadas dae su sole. In su Medioevu, s’arbutzu fiat devènnidu un’alleadu pretziosu pro sa bellesa de sas fèminas, pro ite s’impitaiat pro nde peare sas mantzas de sa pedde, comente sas lentìgias.

Ancora oe, s’Arbutzu est assotziadu a creìngios antigos: si creiat chi custu fundu poderet agire comente rimèdiu pro abenenamentos o ispìtzulos de babbois velenosos, una traditzione chi tenet raighinas in sas influèntzias de sos Gregos e de sos Romanos, lòmpidos a Sardigna. In sa mitologia grega, s’arbutzu beniat postu a inghìriu de sas tumbas, pro more chi si creiat chi agiudaret sos mortos pro su biàgiu in s’aldilà.

In su cuntestu cristianu, su cambu de s’arbutzu leat su nùmene de “Bàculu de Santu Giosepe”. Sa paristòria  contat chi Santu Giosepe, a sa chirca de unu maridu pro Maria, giughiat unu bàculu de arbutzu chi aiat froridu in modu meraculosu, inditende in custa manera s’isposu adatu pro Maria.

 “Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Sardigna, un’isula unica: a s’iscoperta de sas castas ispartas suas.

In su coro de su Mediterraneu, sa Sardigna custoit unu patrimoniu naturale istravanadu e po sa parte pius manna unigu in su mundu.
S’isolamentu geograffigu, sa variedade de sos logos e su tempus chi favoressit ant permittidu, in sos miza e miza annos, s’isviluppu de paritzas castas ispartas, chi cheret narrere organismos biventes chi si acciappant solu in s’isula e in nessunu atteru logu de su pranetta.

Sa Sardigna est a s’ispissu considerada unu bera e propia “buttega de isviluppu” inube fundos e animales si sunt mezorados in manera bastante, dande vida a frommas de vida originales. Si pensat chi pius de treghentos castas de prantamine e deghinas de castas animales siant ispartas de s’isula, calicuna de sas cales si agattat solu in sa accurtza Corsica.

In su regnu de su prantamine, brillant mattas istravanadas, comente sa Centaurea horrida, una casta ispinosa chi creschet solu in sos logos de sa costa sud-occidentale, o su Limonium laetum, chi frorit accanta a sos istagnos salidos. Custas mattas sunt medas bortas minettadas dae sa frazadura de su terrinu, dae sos fogos e s’attividade de sos omines, e po custu motivu sunt istudiadas in manera iscientifica e cun progettos de tutela ambientale.

Fintzas sos animales sardos contant un’istoria de isolamentu e arranzu. Su cherbu sardu ,po esempiu, est una variedade de su cherbu europeu,
pius pitticcu e affarruncadu, chi fuit disparridu po unu tempus ma est bistadu fattu torrare cun sutzessu in habitat divressos. Su matzone sardu, simile a cussu continentale ma pius pitticcu, est un’attera fromma de mezoramentu insulare.

In sos logos lentos de s’isula si podet intendere su zubilu de s’arrana birdi sarda, un’animale de doppia vida dae sos colores pipirudos, mentres in sas zuras de sos montes pius attesu si cuat in mesu de sas roccas la tziligherta de Bedriaga, presente in pagos logos.

Addià de sos chi tenent sas lorigas, sunt medas sos babbarrotzis, sas cocciulas e atteros cun sas lorigas  ispartos, calicunos de sos cales ancora  pagu connoschidu.

Attività realizzata col contributo della Regione Sardegna — IMPRENTAS 2024-2025