Su 28 Cabudanni 2023 at a rapresentare una data memoràbile pro sa giòvana bariesa, Sara Scattu, chi at retzidu un’importante reconnoschimentu in sa Càmera de sos Deputados. Si tratat de su “Prèmiu Amèrica Giòvanos” intregadu dae sa Fundatzione Itàlia Istados Unidos, unu reconnoschimentu de cabbale cunferidu a sos giòvanos laureados de sas universidades italianas cun prus mèritu e cun percursos de istùdiu universitàrios de primore.

S’istòria de Sara est una testimonia de impinnu e de istùdiu acadèmicu. A pustis de àere otentu sa Làurea Triennale in Iscièntzias de sa Comunicatzione in s’Universidade de Sàssari, at sighidu su percursu suo de formatzione e, in su martzu de su 2023, s’at chistidu sa Làurea Magistrale in Iscièntzias Criminològicas pro s’investigatzione e sa seguridade in s’Universidade de Forlì. Ma non s’est firmada inoghe.

Sara at dimustradu sa passione sua pro sas matèrias acapiadas a sa criminologia e a sa psicologia e at detzìdidu de perfetzionare sas cumpetèntzias suas. At printzipiadu unu Màster acanta s’ANFOC, un’aficu chi l’at permìtidu de otènnere su tìtulu de Peritu Ispetzializadu in Criminologia e Peritu Ispetzializadu in Psicologia de sas Setas. Custos resurtados testimòniant s’istraordinàriu impinnu suo pro sos istùdios e su determinu suo a persighire sa carriera acadèmica.

Ma sas bonas noas no agabbant  inoghe. Paris cun s’importante “Prèmiu Amèrica,” Sara at fintzas conchistadu una bursa de istùdiu chi l’at a permìtere de frecuentare su Màster esclusivu ofertu dae sa Fundatzione Itàlia Istados Unidos in “Leadership pro sas relatziones Internatzionales e su Made in Italy.” Custa oportunidade rapresentat un’àteru traguardu e una crèschida professionale chi promitet de abèrrere ghennas significativas pro su benidores suo.

Su Comunu de Barì, in una nota in sos canales sotziales, at natadu de èssere orgolliosu de sas resessidas de Sara Scattu, una ambasciadora de primore de sa tzitade e un’esèmpiu positivu pro sos giòvanos bariesos. S’istòria sua dimustrat craramente chi cun impinnu, passione e aficu, est possìbile cròmpere traguardos istraordinàrios in s’àmbitu acadèmicu e professionale. Sa comunidade de Barì dat sas prus sintzeras congratulatziones a Sara e a sa famìlia sua e aùgurat a Sara una carriera prena de satisfatziones.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Sa fine drammatiga de su zovanu benturzu Arricelli, pustis de su bolu attrividu dae sa Sardigna a sa Sicilia, nos ammentat sos arriscos de sos movimentos de ispartinadura de sos zovanos alabros.

Su destinu sou, interrumpidu cando fit bolande supra su mare in mesu de Punta Raisi e San Vito lo Capo, nos ponet daenanti a sa debilesa de custas creaduras magniffigas, in d’unu mundu semper pius bortadu a sos interessios de sos
omines.

Arricelli fit unu de sos 15 benturzos de sa colonia noa de su Sarrabus- Gerrei, e sa perdida sua est una disgrassia non solu po sa comunidade iscentifica chi lu compudabat, ma puru po tottus sos chi appretziant e si affuscant de sa rimunida de sos animales arestes.

Bell’e chi non tottu est perdidu. In su mentres chi pranghimos sa perdida de Arricelli, semus animados dae sos sutzessos e dae sa resistentzia de sos atteros membros de sa colonia de Villasalto. Su benturzu Sannicolò sighit s’iscumbattamentu de sa Sardigna, ispinghindesi cun atza in medas regiones de s’isula, cun su bentu chi che lu diat leare fintzas in Corsica.

A sa mattessi manera, sos atteros benturzos commente Sinnai,Ballao,Gerrei,Armungia,Quirra e Muravera, mustrant unu adattamentu chi surprendet meda, addurante po su pius tempus in sa sura de sos Sette Frades, ma iscumbattande puru iscroccas pius attesu, ma torrande semper a sa sicuresa de sa gabbia Forestas. S’azzudu de sos pastores, commente sos frades Aledda, est importante meda po garantire unu approvistamentu de cosa de pappare po sos benturzos.

Su rolu insoro non solu assicurat chi custas creaduras ispantosas potant bivere, ma azzuat puru a su sutzessu totale de su disignu po conservare sos benturzos, apparande unu ispartimentu ecologicu de sas carasas chi faghet bene siat a s’ambiente siat a sa comunidade locale.

In su mentre chi pranghimos sa perdida de Arricelli, rennovamos s’impignu nostru po diffendere e preservare sas zenias minettadas, pro itte atteras disgrassias commente custa si potant iscansare e chi su chelu sigat a essere surcadu dae sas alas de custos alabros magnifficos.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22