Sa Regione at istantziadu 10 milliones de èuros pro agiudare sas famìlias in dificultade chi non resèssente a  afrontare sos costos artos meda de sas pesones de sas abitatziones. Sa detzisione est istada pigada dae sa Giunta ghiada dae Christian Solinas, pro de proposta de s’Assessore a sos Traballos Pùblicos, Pierluigi Saiu, cun s’aprovatzione de una deliberatzione chi assignat custas risursas a sos Comunos de sa Sardigna a traessu de su Fundu pro s’amparu a s’atzessu a sas abitatziones a pesone.

Como tocat a sos Comunos fàghere connòschere e annuntziare publicamente sas oportunidades pro individuare sos benefitziàrios, sighende sos critèrios istabilidos in sa matessi deliberatzione.

Si tratat de una mesuta significativa a beru  in favore de sas famìlias a rèditu bassu chi devent parare fronte a sas ispesas de sa pesone. S’Assessore Saiu at ispiegadu chi pro massimizare s’agiudu, sos Comunos sunt autorizados a agiùnghere eventuales risursas chi non sunt istadas gastadas s’annu pretzedente a sos fundos assignados.

Pro s’assegnatzione de sos contributos, sunt istadas identificadas duas fascas cun importos màssimos chi podent èssere donados a sos benefitziàrios, chi vàriant dae unu màssimu de 3.098 èuros a unu màssimu de 2.320 èuros, a segunda de sos recuisitos de rèditu (carculados pro mèsiu de s’Isee) e dae su pesu de su cànone de pesone annuale subra de su rèditu etotu. In prus, intro sas làcanas màssimas previstas pro sas duas fascas, est prevìdidu un’aumentu de su 25 pro chentu de su contributu pro sas famìlias chi tenent cumponentes cun prus de sessantachimbe annos e persones chi tenent calicuna disabilidade. No est cunsentidu amuntonare su contributu cun su Rèditu de tzitadinàntzia.

Totu sas fases relativas a custa mesuta, dae sa publicatzione de sos bandos a s’annùntziu de sas graduatòrias dae banda de sos Comunos, ant a èssere compidadas cun atentu dae s’Assessoradu a sos Traballos Pùblicos.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Dae su 30 de lampadas a su 4 de triulas, sos creadores de moda Domenico Dolce e Stefano Gabbana, ant a seperare s’iscrocca casteddaia po presentare sas propostas insoro de couture de Moda Arta, de Atelier e de Oreria Arta.

Pustis de aere seperadu sa Puglia s’istiu passadu, po presentare sas creassiones insoro, sa cropa Dolce e Gabbana, arribat cust’annu in Sardigna. Dae su 30 de lampadas a su 4 de triulas, su sinnu famosu de moda at a presentare sas collessiones novas de Moda Arta, de Oreria Arta e de Atelier.

Sas traditziones, sos colores e sos nuscos de sa Sardigna, ant essere su filu ruju de su “Gran Tour d’Italia”, su disignu firmadu Dolce &Gabbana chi, dae su 2012, tzelebrat sas regiones de s’Italia po mesu de s’artigianadu e sos produttos fattos a manu.

A faghere de guarnissa a sas isfartzosas isfiladas chi donzi istiu animant s’iscena de sa Moda Arta, at essere s’iscrocca casteddaia. Su geniu creativu chi non si podet chistionare de Dolce e Gabbana at duncas a donare po sa prima borta, a sa Sardigna, unu viaggiu istravanadu in su cale arte e abilidade si ant addobbiare, dande vida a cuadros de moda chi che bogant s’alenu, bortados a pesare in artu s’incantu de sa tradissione populare sarda. Donzi isfilada de sas collessiones haute couture firmadas Dolce e Gabbana non est unu simple defilé, ma unu beru e propriu ispettacolu, capatze de toccare emossiones unicas chi binchent s’immazinariu cumone.

Su seperu de sa Sardigna commente logu po custu abbenimentu de grandesa, no est occasionale. S’isula,apparat un’iscenariu perfettu po tzelebrare sa bellesa e s’originalidade de sas creassiones de Dolce e Gabbana. Sas isfiladas ant a bennere in logos de cona de s’iscrocca casteddaia, isseperados po su valore istoricu e culturale insoro, creande
un’unione perfetta de moda e patrimoniu locale.

E commente donzi appuntamentu D&G chi si rispettat, non ant a mancare de certu sos personaggios mannos de su Star system globale. Tzelebridades, influencer e figuras importantes de su mundu de sa moda, ant a arrivare in Sardigna po assistire a custu abbenimentu unicu, cuntribbuinde a rendere meda pius ischintiddosu su clima de sas isfiladas.

Po s’occasione, intro de su nomenadu Forte Village, at essere abbertu unu ispeciale pop-up store. Custa buttega chi abberit po pagu tempus at a presentare unu seperu unicu de sas creassiones pius de cona de Dolce e Gabbana, permittinde a sos istranzos pius fortunados de comporare cantos unicos e pretziosos, fruttu de s’ abilidade de sos artigianos e de sa creatividade chentza laccanas de sa cropa de istilistas.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22