Sa Sardigna at ofertu un’ispetàculu ispantosu in sa puntada de Linea Blu de Rai Uno, lassende su pùblicu incantadu mentras esploraiat sa bellesa de su mare, s’istòria e sa cultura de s’ìsula. Sa trasmissione, andada in direta su 9 de cabudanni, at fatu bìdere sas bellesas de sa Sardigna in modu istravanadu e essentziale.

Su programma televisivu at comintzadu su biàgiu suo esplorende sa costa de sa Gaddura e s’Arcipèlagu de sa Maddalena. Donatella Bianchi at ghiadu sos ispetadores dae su promontòriu de Capu Testa cun sas imponentes rocas suas de granitu, finas a sas meravigiosas marinas de arena bianca e rosa de su Parcu de s’Arcipèlagu de sa Maddalena. Su pùblicu est istadu ghiadu in unu mundu de bellesas naturales sena paragones, ue sa maestosidade de sa naturalesa si fundet cun s’istòria e sa cultura de s’ìsula.

Sa trasmissione at fintzas fatu bìdere sos relitos de època romana e de sa Segunda Gherra Mundiale, logos chi tenent unu significadu istòricu profundu e in prus sunt fintzas ricos de vida sutamarina, creende un’esperièntzia visiva ùnica.

Fabio at giutu sos ispetadores fatu fatu de sa costa, movende dae su promontòriu calcàreu de Capu Figari finas a Palau. Durante su percursu, sunt istadas iscobertas formatziones pedrosas maestosas, grutas cuadas, caligeddas  incantadoras e sas famadas marinas de sa Costa Ismeralda. Custa parte de sa Sardigna est famada pro sa bellesa sua e sa trasmissione est istada capassa de atzapare e valorizare ogna particulare, regalende a su pùblicu una panoràmica cumpleta de custa terra.

Sa puntada at fintzas ammustradu sas  isculturas naturales longu sa costa gadduresa, comente sa de Roca de s’Ursu, una destinatzione bisitada ogni die dae chentinas de escursionistas. Su programa at fatu tapa a Santu Pantaleo, connotu comente sa bidda de sos artistas.

In fines, cun Valentina Bisti su programma at esploradu sas àndalas e sos percursos geomineràrios chi giughent dae sas dunas de Piscinas a su giassu de archeologia industriale de Monti Bèciu. Custu logu, unu tempus fiat una tzentrale elètrica, est istadu riqualificadu e trasformadu in unu birrifìtziu, rapresentende un’esèmpiu de comente a a Sardigna siat a tretu de coniugare su patrimòniu istòricu industriale suo cun oportunidades e initziativas culturales noas.

In concrusione, sa puntada de Linea Blu dedicada a sa Sardigna at ofertu un’esploratzione ispantosa de sas bellesas naturales, istòricas e culturales de s’ìsula, atzapende s’atentzione de su pùblicu e cumbidende totus a iscobèrrere e apretziare sas prendas de custa terra ùnica.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Dae su 30 de lampadas a su 4 de triulas, sos creadores de moda Domenico Dolce e Stefano Gabbana, ant a seperare s’iscrocca casteddaia po presentare sas propostas insoro de couture de Moda Arta, de Atelier e de Oreria Arta.

Pustis de aere seperadu sa Puglia s’istiu passadu, po presentare sas creassiones insoro, sa cropa Dolce e Gabbana, arribat cust’annu in Sardigna. Dae su 30 de lampadas a su 4 de triulas, su sinnu famosu de moda at a presentare sas collessiones novas de Moda Arta, de Oreria Arta e de Atelier.

Sas traditziones, sos colores e sos nuscos de sa Sardigna, ant essere su filu ruju de su “Gran Tour d’Italia”, su disignu firmadu Dolce &Gabbana chi, dae su 2012, tzelebrat sas regiones de s’Italia po mesu de s’artigianadu e sos produttos fattos a manu.

A faghere de guarnissa a sas isfartzosas isfiladas chi donzi istiu animant s’iscena de sa Moda Arta, at essere s’iscrocca casteddaia. Su geniu creativu chi non si podet chistionare de Dolce e Gabbana at duncas a donare po sa prima borta, a sa Sardigna, unu viaggiu istravanadu in su cale arte e abilidade si ant addobbiare, dande vida a cuadros de moda chi che bogant s’alenu, bortados a pesare in artu s’incantu de sa tradissione populare sarda. Donzi isfilada de sas collessiones haute couture firmadas Dolce e Gabbana non est unu simple defilé, ma unu beru e propriu ispettacolu, capatze de toccare emossiones unicas chi binchent s’immazinariu cumone.

Su seperu de sa Sardigna commente logu po custu abbenimentu de grandesa, no est occasionale. S’isula,apparat un’iscenariu perfettu po tzelebrare sa bellesa e s’originalidade de sas creassiones de Dolce e Gabbana. Sas isfiladas ant a bennere in logos de cona de s’iscrocca casteddaia, isseperados po su valore istoricu e culturale insoro, creande
un’unione perfetta de moda e patrimoniu locale.

E commente donzi appuntamentu D&G chi si rispettat, non ant a mancare de certu sos personaggios mannos de su Star system globale. Tzelebridades, influencer e figuras importantes de su mundu de sa moda, ant a arrivare in Sardigna po assistire a custu abbenimentu unicu, cuntribbuinde a rendere meda pius ischintiddosu su clima de sas isfiladas.

Po s’occasione, intro de su nomenadu Forte Village, at essere abbertu unu ispeciale pop-up store. Custa buttega chi abberit po pagu tempus at a presentare unu seperu unicu de sas creassiones pius de cona de Dolce e Gabbana, permittinde a sos istranzos pius fortunados de comporare cantos unicos e pretziosos, fruttu de s’ abilidade de sos artigianos e de sa creatividade chentza laccanas de sa cropa de istilistas.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22