In s’intervista de Walter Veltroni a Gianfranco Zola, s’ex calciadore sardu cumpartzit sas raighinas ùmiles suas e sa passione chi l’at giutu dae sa bidda de Ulìana a su fùbbalu de professionista. Zola at iscoviadu chi a pipiu s’ispiraiat a sos calciadores chi bestiant sa màllia nùmeru deghe, ammirende sa tècnica, creatividade e inventiva issoro.

Contende de s’infàntzia sua, Zola at natadu chi acudiat dae una famìlia pòvera e chi su babbu non connoschiat mancu su fùbbalu finas a cando sos amigos l’aiant portadu a pompiare una partida. Dae cuddu momentu, su babbu si fiat apassionadu a su giogu e l’aiat acumpangiadu a sos allenamentos finas dae cando teniat tres annos. Custu gestu at aviadu sa carriera de Zola in su mundu de su fùbbalu, dimustrende s’importu de sos babbos pro incarrelare sos fìgios cara a sas passiones issoro.

Zola at allegadu posca de su nùmeru deghe in su fùbbalu modernu, sutaliniende comente  giogadores comente a issu e a Roberto Baggio si siant agatados a dèvere adatare s’istile de giogu issoro a ischemas tàticos tèteros. Su nùmeru deghe clàssicu, cun sa libertade sua de creare e imbentare, paret èssere iscumpartu dae sos campos de fùbbalu, remplassadu dae ruolos prus ispetzìficos.

In s’intervista, Zola cumpartzit fintzas sas impressiones suas subra  Diego Maradona, bantende non petzi sas abilidades istraordinàrias suas in campu ma fintzas sa generosidade sua comente a persone. Zola ammentat a Maradona comente unu giogadore chi pensaiat semper a sos cumpàngios suos de iscuadra e chi biviat cun simplidade nointames sa tzelebridade globale sua.

S’ex calciadore sardu in s’intervista at naradu fintzas de àere sentidu meda sa morte de Maradona, e chi non meritaret totu su chi est sutzèdidu.

In fines, Zola at concruidu s’intervista narende chi diat àere chertu fàghere unu passàgiu a Gigi Riva, s’atacante prus famadu de su Casteddu. Custu disìgiu testimòniat su respetu mannu e s’ammiratzione chi Zola tenet pro unu de sos nùmenes prus importantes de su fùbbalu italianu.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Mortoriu pustis de sa festa, un’omine de 26 annos cundennadu a 14 annos po su mortoriu de Assemini.

Si serrat cun d’una cundenna a 14 annos de presone su protzessu a carrigu de s’omine de 26 annos chi aiat cunfessadu su mortoriu de Alessandro Cambuca, s’omine de 27 annos mortu cun paritzos corpos de burteddu in su mese de Santu Aini de su 2024 in Assemini, in sa tzittade metropolitana de Casteddu. Su mortoriu fuit bistadu fattu intro de una domo inube su mortu e su chi l’at mortu fuint passande sa notte imparis cun atteros amigos, pustis de essere bistadosa sa festa de santa Greca in Decimo. Unu seru de festa chi si fuit trasformada in disgrassia in sas oras imbenientes a su cuccurale de una briga chi fuit finida cun s’affraccada mortale.

Sa sententzia est bistada fatta a s’accabbada de su protzessu tzelebradu in accurtziadu. In su cursu de s’urtima audientzia, in sa reprica, su Pubbricu Ministeru aiat dimandadu de dare un cundenna prus bassa, dae 17 annos e 4 meses a 14 annos e 8 meses. Su zuighe at istabilidu una pena de 14 annos de presone, riconnoschinde a s’imputadu sas abbrandadas cumpressivas.

Intre sos elementos cussiderados po sa detzisione bi sunt bistados sa cunfessione fatta dae su zovanu fintzas dae su primu mamentu e s’azzudu dadu a sos iscrucculladores, chi aiat permittidu de acciappare s’arma impittada po bocchire Alessandro Cambuca. Unu comportamentu chi at fittadu supra sa balutatzione de sa posissione sua in su protzessu. In su mentres de su dibattimentu, sa defensa aiat bogadu a pizu sa chistione de unu possibbile vissiu de mente a su mamentu de su mortoriu, presentande una perissia de parte secundu sa cale s’imputadu diat aere fattu in su mentres chi non fuit capatze de cumprendere e de bolere.

Una visura chi est bistada discutida in aula e at a podere essere oggettu de atteras balutatziones in sos atteros protzessos chi si ant a faghere.
Como si isettat su depositu de sas resones de sa sententzia, coladorzu de fundamentu po cumprendere in particulare sas resones chi ant giuttu a custa pena. Solu pustis de aere esaminadu sos motivos, sa defensa at a detzidere si presentare appellu contra sa cundenna de primu gradu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22