Casteddu, una tzitade dèchida  e rica de  istòria s’aprontat a acasagiare unu de sos eventos prus abetados de s’annu: s’esibitzione de sas Fritzas Tricolores. Sa data signada in ruju subra de sos calendàrios est sa de su 20 austu 2023, ma sas proas sunt fissadas  sa die pretzedente, sàbadu 19 austu.

S’eventu est patrotzinadu dae su Comunu de Casteddu e promitet de regalare a sos presentes un’ispetàculu aèreu chi at a restare imprìmidu in sa memòria de totus. Su tzentru de sas fainas at a èssere sa zona de s’Ispidale Marino, gràtzias a sa collaboratzione cun sa Aereonàutica Militare. Ambas dies de esibitzione ant a tènnere cumintzu a sas 17:15, oferende a totu sos presentes un’esperièntzia ùnica.

Una de sas caraterìsticas chi rendent custa manifestatzione dèchida est s’atzessu lìberu a sa marina de su Poetu. Su pùblicu at a pòdere assistire a sas evolutziones aèreas sena peruna  proibitzione imposta dae sos òrganos de Pùblica Seguridade. Nointames, est importante notare chi at a èssere proibidu s’atzessu a sos veìculos in su caminu chi acòstiat su Poetu de Casteddu e finas a su tretu de mare de su Comunu de Cuartu Sant’Aleni dae sas 14:00 a sas 19:00 de ambas sas dies, sàbadu 19 e domìniga 20 austu 2023.

S’esibitzione  comintzat cun su passàgiu de su tricolore subra de s’àrea de sa manifestatzione, tragiadu dae s’aeroplanu militare AW139 AM. Su chelu s’at a illuminare cun sas evolutziones de duos veìculos acrobàticos tziviles chi ant a atzapare s’atentzione de totu sos ispetadores. A aumentare su brègiu  at a èssere posca s’aeroplanu militare AW139 de su 15° Stormo – 80°CSAR cun base in Dèximu Mannu. Su màssimu de s’adrenalina s’at a tènnere cun s’esibitzione  de sa Patùllia Acrobàtica Natzionale, mègius connota comente a “Fritzas Tricolores”. Custos pilotas àbiles ant a intrare a s’àrea de bolu de su Poetu a inghìriu a sas 18:05, regalende a su pùblicu un’ispetàculu ispantosu chi at a acabbare a sas 18:30.

Unu particulare de regordare est chi durante sas proas de su 19 austu, sa Patùllia no at a impreare sos caraterìsticos fumos tricolores. Custu ispetàculu visivu at a èssere riservadu a sa die sighente, su 20 de austu, garantende un’esperièntzia galu prus ammajadora.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Sa Maniffattura de su Tabaccu de Casteddu est pronta a accasazzare dae su 16 a su 18 de Aprile, un’abbenimentu dedicadu a tzelebrare sa zura blue de sa Sardigna. Po mesu de unu disignu riccu de dibattidos, musica e attividades de coghina, s’abbenimentu chircat de iscumbattare e balorizzare sa vida longa, commente un’ istrumentu chi serbit po faghere arrivare turistas, poninde s’attentzione supra sa ricchesa de sa coghina locale, commente elementu chi siat sa crae de un’esperientzia turistica bera e chi non si potat ismentigare.

Martis 16 Aprile, sos espertos de su marketing de su turismu, de sa salude, de sa tradissione de sa coghina e de s’accolomia pubbrica, ant a discutire de commente sa vida longa si potat trasformare in d’unu beru jubilu po visitadores dae tottu su mundu, chi disizzant de iscoperrere sos segretos po una vida pius longa e sana. S’addobiu at accommettare chistiones divressas de interessiu particulare, in mesu de sas cales, s’istoria de su pane de sos chi tenent chent’annos “Kentos” de Orroli, s’esperientzia de sa cooperativa Allevatrici de Sardigna e sa pubblicidade de sos prodottos sardos in sos paisos de s’Iscandinavia.

Merculis 17 bi at essere unu laboratoriu de buttega; bi ant a partetzipare espertos de custu campu, commente Raimondo Mandis e Luigi Mundula. At a sighire una mustra de coghina cun s’azzudu de su Casteddu Calcio, inue carchi giogadore ruju e blu si at a chimentare cun sas retzettas de sa tradissione sarda, ghiados dae sos coghineris William Pitzalis e Marco Abis.

Su colominzu de s’abbenimentu at essere gioggia 18 Aprile, cun d’unu laboratoriu de buttega, dedicadu a su mandicu de s’identidade de sa Sardigna, sighidu dae unu laboratoriu de coghina, dedicatu a sa preparassione de sas minestras e de sas suppas de sa tradissione, de sas cales sos chi ant a partetzipare ant a tennere s’occasione de las assazzare paris cun sos coghineris. Sa serana, si at a congruire cun d’unu cuntzertu “Bisajos” de su musicista Gavino Murgia e cun sa partezipatzione de su mastru Luigi Lai cun sas launeddas suas.

“Chent’annos paris!” est un’occasione unica po esplorare sos segretos de sa vida longa sarda, imparande derettu dae sa tradissione de sa coghina e da sa sabidoria de chie at fattu de sa vida longa e de sa salude un’usantzia.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22